រាជធានីភ្នំពេញ ៖ នៅព្រឹកថ្ងៃអាទិត្យ ទី៩ តុលា ខានស្អែក កីឡាករជើងខ្លាំង២រូបគឺ ម៉ន រដ្ឋា និង សារឿន ច័ន្ទ នឹងក្លាយជាបេក្ខភាព២រូបថ្មីត្រូវឡើងប្រកួតជាមួយកីឡាករថៃដែលសុទ្ធតែជាជើងខ្លាំងនៅក្នុងព្រឹត្តិការណ៍
រាជធានីភ្នំពេញ ៖ នៅព្រឹកថ្ងៃអាទិត្យ ទី៩ តុលា ខានស្អែក កីឡាករជើងខ្លាំង២រូបគឺ ម៉ន រដ្ឋា និង សារឿន ច័ន្ទ នឹងក្លាយជាបេក្ខភាព២រូបថ្មីត្រូវឡើងប្រកួតជាមួយកីឡាករថៃដែលសុទ្ធតែជាជើងខ្លាំងនៅក្នុងព្រឹត្តិការណ៍ប្រដាល់អន្តរជាតិពេលព្រឹករបស់ទូរទស្សន៍អាស៊ីអាគ្នេយ៍។ អ្នកទាំងពីរនឹងប្រកួតជាមួយកីឡាករថៃក្នុងនាមជាគូមិត្តភាពដើម្បីស្ទង់កម្លាំងគ្នាទៅវិញទៅមក ។
ការប្រកួតដែលនឹងធ្វើឡើងចាប់ពីម៉ោង៨ព្រឹកនេះ ពិតជាធ្វើឱ្យមានការចាប់អារម្មណ៍ពី អ្នកស្នេហាវិស័យប្រដាល់ទៀតហើយ ដោយសារតែមានសមាសភាពជើងខ្លាំងល្អៗ ។ ការប្រដាល់ដែលបានធ្វើឡើងនៅរៀងរាល់ថ្ងៃអាទិត្យពេលព្រឹកនេះ រមែងបង្ហាញខ្លួនដោយសមាសភាពកីឡាករថៃល្អៗទើបគេកត់សម្គាល់ថា ព្រឹត្តិការណ៍អន្តរជាតិមួយនេះទទួលបានការគាំទ្រខ្លាំង ដោយក្នុងព្រឹកខ្លះអត់មានកន្លែងអង្គុយទស្សនាទៀតផង ។ អ្នករៀបចំការប្រកួតបានអះអាងថា នៅថ្ងៃទី៩ តុលា ព្រឹត្តិការណ៍នេះនឹងបើកឆាកប្រដាល់អន្តរជាតិដោយគូល្អៗ ដោយកីឡាករម្នាក់ៗក្រៅពីទទួលបានតម្លៃខ្លួនខ្ពស់ ក៏ទទួលបានក្រេឌីតមិនធម្មតាគ្រប់ការប្រកួតឈ្នះម្ដងៗនោះផងដែរ ។
ងាកមកកាន់ការប្រកួតមិត្តភាពនៅព្រឹកខានស្អែកវិញ សមាសភាពដែលឡើងប្រកួតគឺសុទ្ធតែល្អតែម្ដង ដោយកីឡាករ ម៉ន រដ្ឋា មកពីក្លិបការិយាល័យទី៥កងទ័ពជើងគោគ ជួបប្រកួតជាមួយកីឡាករថៃឈ្មោះChuok Phechhit ដែលល្បីឈ្មោះនៅសង្វៀនប្រដាល់ថៃ ។ ជំនួបពួកគេមានការរំពឹងខ្ពស់ថា នឹងបែកផ្កាភ្លើងនៅលើសង្វៀនទូរទស្សន៍អាស៊ីអាគ្នេយ៍ ដោយសារតែអ្នកទាំងពីរសុទ្ធតែត្រូវការឈ្នះដើម្បីរក្សាមុខមាត់ និងក្រេឌីត ។ ផ្អែកតាមបទពិសោធន៍អ្នកទាំងពីរមានកម្រិតប៉ុនគ្នាដោយកីឡាករកម្ពុជា ក៏មានប្រវត្តិប្រកួតច្រើន ហើយកីឡាករថៃក៏មានប្រវត្តិប្រកួតច្រើនដែរ ។ លោកញាណ សុធី អ្នករៀបចំការប្រកួតបានអះអាងថា លោកបានសម្រេចដាក់ឱ្យកីឡាករទាំងពីរប៉ះគ្នាដោយសារតែម៉ន រដ្ឋា នៅមានក្រេឌីតលើសង្វៀនប្រដាល់អន្តរជាតិ ហើយគ្រូបង្វឹករបស់គេក៏បានប្រកាសថា គេហ្វឹកហាត់បានច្រើនតាំងពីមុនមានការផ្គូផ្គង ។ លោកថា កីឡាករថៃជាជើងខ្លាំង ហើយដោយសារតែចង់ឱ្យ ម៉ន រដ្ឋា បានស្ដារមុខមាត់ល្អប្រសើរជាងមុន ទើបរៀបចំឱ្យគេប៉ះគ្នានៅលើសង្វៀនទូរទស្សន៍អាស៊ីអាគ្នេយ៍ស្អែក ។ លោកថា កីឡាករកម្ពុជាធ្លាប់ប្រកួតបាន៧៣លើក ឈ្នះ៦១លើក ចាញ់១១លើក និងស្មើ១លើក ក្នុងពេលដែលកីឡាករថៃធ្លាប់ប្រកួតបាន៥៦លើក ឈ្នះ៤៩លើក និងចាញ់៧លើក គឺអាចថា ល្អជាងទាំងបច្ចេកទេស និងប្រវត្តិប្រកួត ។ ដូច្នេះកីឡាករកម្ពុជាបើឈ្នះ នឹងកាន់តែទទួលក្រេឌីត ប៉ុន្តែបើចាញ់ទំនងជាត្រូវមហាជនរិះគន់ទៀតហើយថាប្រកួតមិនល្អ ។
កីឡាករ សារឿន ច័ន្ទ ក៏នឹងត្រូវជួបប្រកួតជាមួយកីឡាករជើងខ្លាំងថៃឈ្មោះRe Da និងជាគូឯកនៅក្នុងព្រឹត្តិការណ៍ប្រដាល់អន្តរជាតិមួយនេះ ។ ទោះបីយ៉ាងណា គេមិនទាន់ដឹងថាគូនេះនឹងទាក់ទាញជាងគូរងឯកឬយ៉ាងណានៅឡើយទេ ។ កីឡាករថៃត្រូវគេស្គាល់ថាជាជើងខ្លាំងម្នាក់ ខណៈដែល សារឿន ច័ន្ទ គឺជាកីឡាករមានការគាំទ្រខ្លាំងនាពេលកន្លងមក ។ យោងតាមប្រវត្តិ កីឡាករកម្ពុជាគូនេះធ្លាប់ប្រកួតបាន៨៣លើក ឈ្នះ៦៩លើក ចាញ់១២លើក និងស្មើ២លើក ខណៈដែលកីឡាករថៃក៏មានប្រវត្តិឡើងរេញបាន៩៩លើក ឈ្នះ៨៣លើក ចាញ់១៥លើក និងស្មើ១លើក ។ អ៊ីចឹងហើយទើបគេចាំមើលថាតើកីឡាករកម្ពុជាធ្វើបានល្អឬអត់នៅពេលប៉ះគូប្រកួតខ្លាំងនៅក្នុងព្រឹតិ្តការណ៍ប្រដាល់អន្តរជាតិព្រឹកខានស្អែក ៕
ចែករំលែកព័តមាននេះ