រាជធានីភ្នំពេញ ៖ ភិន សុទី មកពីក្លិបកងពលតូចអន្តរាគមន៍លេខ៨ភ្នំទ្រព្យ និងឡន លឿប មកពីក្លិបកងពលតូចលេខ៧០ កំពុងត្រៀមកណ្ដាប់ស្វាគមន៍កីឡាករបរទេសនៅលើសង្វៀនទូរទស្សន៍ CTN ថ្ងៃសៅរ៍ទី៨ តុលា
រាជធានីភ្នំពេញ ៖ ភិន សុទី មកពីក្លិបកងពលតូចអន្តរាគមន៍លេខ៨ភ្នំទ្រព្យ និងឡន លឿប មកពីក្លិបកងពលតូចលេខ៧០ កំពុងត្រៀមកណ្ដាប់ស្វាគមន៍កីឡាករបរទេសនៅលើសង្វៀនទូរទស្សន៍ CTN ថ្ងៃសៅរ៍ទី៨ តុលា ខានស្អែកនេះ។ អ្នកនិយមទស្សនាកីឡាប្រដាល់ភាគច្រើនកំពុងទន្ទឹងរង់ចាំមើលការប្រកួតមួយនេះ ថា តើកីឡាករកម្ពុជាទាំងពីររូបនេះអាចយកឈ្នះកីឡាករបរទេសបានឬយ៉ាងណា ខណៈកីឡាករមកពីទ្វីបអឺរ៉ុបទាំងពីរសុទ្ធតែមានសមត្ថភាពពិបាកប៉ាន់ស្មានអីុចឹងនោះ។
កីឡាករ ភិន សុទី ដែលធ្លាប់ប្រកួតបាន៣០ដង ឈ្នះ២២ដង ចាញ់៧ដង ស្មើ១ដង និងផ្ដួលគូប្រកួតឱ្យសន្លប់បាន១២ដង នឹងជួបប្រកួតជាមួយកីឡាករអាមេរិកឈ្មោះJustin Wong ក្នុងប្រភេទទម្ងន់៦៤គីឡូក្រាម។ កីឡាករអាមេរិករូបនេះ ធ្លាប់ប្រកួតបាន៧ដង ឈ្នះ៦ដង ចាញ់១ដង និងផ្ដួលគូប្រកួតឱ្យសន្លប់បាន១ដង ។ គូនេះបើគេប្រៀបធៀបទៅលើប្រវត្តិនិងបច្ចេកទេសប្រកួតគឺមិនអាចទៅរួចជាមួយកីឡាករ ភិន សុទី បានឡើយ ។
ចំណែកឡន លឿប ដែលធ្លាប់ប្រកួតបាន៤២ដង ឈ្នះ៣០ដង ចាញ់១១ដង ស្មើ១ដង និងផ្ដួលគូប្រកួតឱ្យសន្លប់បាន២១ដង នឹងជួបប្រកួតជាមួយកីឡាករបេឡារុសឈ្មោះ
Susha Aliak Sander ក្នុងប្រភេទទម្ងន់៧១គីឡូក្រាម ។ កីឡាករបេឡារុសរូបនេះធ្លាប់ប្រកួតបាន១៧ដង ឈ្នះ១២ដង ចាញ់៤ដង ស្មើ១ដង និងផ្ដួលគូប្រកួតឱ្យសន្លប់បាន៣ដង ។ គូនេះអ្នកណាក៏មានជំនឿចិត្តលើឡន លឿប ច្រើនជាងដែរ ។
ក្រៅពីគូអន្ដរជាតិក៏មានការប្រកួតមិត្តភាពរវាងកីឡាករកម្ពុជានិងកម្ពុជាដែរ ដូចជាកីឡាករគង់ វិរៈ មកពីក្លិបសុភានូមានជ័យ ប្រកួតជាមួយកីឡាករ រឿង ធារិន មកពីក្លិបសម្បត្តិគុនខ្មែរ ។ កីឡាករ រស់ វិបុល មកពីក្លិបសាលវ័ន្តកីឡា ប្រកួតជាមួយកីឡាករ ថាន រ៉ាឌី មកពីក្លិបសម្រែករាជសីហ៍ខេត្តបន្ទាយមានជ័យ និងកីឡាករ សួង សុវណ្ណថា មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករ ផាន់ សារុន មកពីក្លិបគជសារកីឡា ។
ចំណែកសមាសភាពគូប្រកួតដណ្ដើមខ្សែក្រវាត់គោជល់ក្នុងប្រភេទទម្ងន់៦៥គីឡូក្រាមនៅលើសង្វៀនទូរទស្សន៍ CNC នាយប់ថ្ងៃសៅរ៍នោះដែរ កីឡាករឃុន សំខាន់ មកពីក្លិបកងពលតូចលេខ៧០ ប្រកួតជាមួយកីឡាករថៃឈ្មោះKongmethy SitPumpeun និងកីឡាករផង់ សុភាព មកពីក្លិបតាឡីដំរីមានរិទ្ធ ជួបប្រកួតជាមួយកីឡាករថៃឈ្មោះManavthong Nethnamchai ។
ឃុន សំខាន់ ធ្លាប់ប្រកួតបាន៨១ដង ឈ្នះ៦០ដង ចាញ់១៨ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន១២ដង ។ រីឯកីឡាករថៃធ្លាប់ប្រកួតបាន១០១ដង ឈ្នះ៨០ដង ចាញ់១៨ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន១០ដង ។ ទោះបីកីឡាករថៃមានប្រវត្តិប្រកួតច្រើនជាងមែន ប៉ុន្តែកីឡាករកម្ពុជាគូនេះធានាថាមិនធ្វើឱ្យអ្នកគាំទ្រខកចិត្តនោះទេ ។
ចំណែក ផង់ សុភាព ធ្លាប់ប្រកួតបាន៧៥ដង ឈ្នះ៦០ដង ចាញ់១៣ដង ស្មើ២ដង និងផ្ដួលគូប្រកួតឱ្យសន្លប់បាន១៣ដង ។ រីឯកីឡាករថៃធ្លាប់ប្រកួតបាន៩០ដង ឈ្នះ៧៥ដង ចាញ់១០ដង ស្មើ៥ដង និងធ្លាប់ផ្ដួលគូប្រកួតឱ្យសន្លប់បាន១០ដង ។ យោងតាមប្រវត្ដិប្រកួត គូនេះអាចស៊ីសងគ្នាបាន ដោយសារផង់ សុភាព ទោះបីមានប្រវត្តិប្រកួតតិចជាងមែនតែគេមានមហិច្ឆតាចង់ឈ្នះកីឡាករថៃឱ្យខាងតែបាន ។
ដោយឡែកគូប្រកួតមិត្តភាពនៅលើសង្វៀនដដែលតម្រូវទៅលើកីឡាករ ខុន បូឡា មកពីក្លិបកងពលតូចអន្តរាគមន៍លេខ៨ភ្នំទ្រព្យ ប្រកួតជាមួយកីឡាករ សុខ វាសនា មកពីក្លិបឃ្លាំងមឿងកីឡា និងកីឡាករ សុខ ទូ មកពីក្លិបឃ្លាំងមឿងកីឡា ប្រកួតជាមួយកីឡាករ ពេជ្រ ប៊ុនឆេន មកពីសមាគមកីឡាប្រដាល់ក្រសួងការពារជាតិ ។
នៅថ្ងៃអាទិត្យទី៩ តុលា នៅលើសង្វៀនទូរទស្សន៍ CNC ដដែលក៏មានការប្រកួតអន្ដរជាតិរវាងកីឡាករកម្ពុជា-ថៃផងដែរ ។ កីឡាករ សេក ចាន់រាជ មកពីក្លិបអង្គរមានជ័យខេត្តសៀមរាប នឹងជួបប្រកួតជាមួយកីឡាករថៃឈ្មោះHeunfa Sit Nayukthai និងកីឡាករ លាស់ យីន មកពីក្លិបតាព្រហ្មមានជ័យ ប្រកួតជាមួយកីឡាករថៃឈ្មោះRerngnoy Vor Panyvai ។ ចំណែកគូប្រកួតមិត្តភាពវិញមានកីឡាករ សំខាន់ ប៉ាវចិន មកពីក្លិបរ៉ាហាប់ស្វាយប៉ាក ប្រកួតជាមួយកីឡាករសិទ្ធ ស៊ីនេត មកពីក្លិបសាមគ្គីគុនខ្មែរ ។ កីឡាករ ឡុង សុថេត មកពីក្លិបខ្លារខិនមានរិទ្ធ ប្រកួតជាមួយកីឡាករ កូយ ឡាយ មកពីក្លិបទ័ពពិសេសឆត្រយោង៩១១ ។ កីឡាករ ជ័យ ប៊ុនសុង មកពីក្លិបគីសែមានរិទ្ធ ប្រកួតជាមួយកីឡាករ ចាន់ រក្សា មកពីក្លិបអេភូថងកីឡា និងគូចុងក្រោយ កីឡាករ ចាន់ កំសត់ មកពីក្លិបកងពលតូចអន្តរាគមន៍លេខ៨ភ្នំទ្រព្យ ប្រកួតជាមួយកីឡាករ លីន គឹមឆៃ មកពីក្លិបបុរីរាជសីហ៍មានរិទ្ធ ៕
ចែករំលែកព័តមាននេះ