រាជធានីភ្នំពេញ ៖ នៅល្ងាចថ្ងៃទី៦តុលាខានស្អែកនេះ ក្រុមបាល់ទាត់ជម្រើសជាតិកម្ពុជានឹងត្រូវជួបប្រកួតជាលក្ខណៈមិត្តភាពអន្តរជាតិជាមួយក្រុមជម្រើសជាតិហុងកុង ដើម្បីដកស្រង់បទពិសោធន៍ និងបច្ចេកទេសពីគ្នាទៅវិញទៅមកក្នុងនាមប្រទេសនៅក្នុងតំបន់អាស៊ីដូចគ្នា ។
គេនៅចាំបានថា ក្រុមជម្រើសជាតិកម្ពុជាធ្លាប់ប្រកួតចាញ់ក្រុមជម្រើសជាតិហុងកុងនៅក្នុងលទ្ធផល៤-២នៅលើទឹកដីហុងកុងកាលពីថ្ងៃទី១ ខែកញ្ញា កន្លងមក ទើបលើកនេះមានការចោទជាសំណួរថា តើក្រុមម្ចាស់ផ្ទះកម្ពុជាមានលទ្ធភាពអាចសងសឹកក្រុមភ្ញៀវហុងកុង បានឬអត់នៅល្ងាចថ្ងៃខានស្អែកនេះ ?
ឆ្លើយតបនឹងសំណួរនេះ លោក ឆាំង ពិសិដ្ឋ ប្រធានក្រុមបាល់ទាត់ជម្រើសជាតិកម្ពុជា បានឱ្យដឹងថា សម្រាប់ការប្រកួតលើកនេះក្រុមកម្ពុជាពិតជាត្រៀមខ្លួនបានយ៉ាងល្អបំផុត។ ជាក់ស្ដែង សហព័ន្ធកីឡាបាល់ទាត់កម្ពុជាបានឱ្យកីឡាករទាំងអស់ស្នាក់នៅហ្វឹកហាត់រួមគ្នានៅក្នុងមជ្ឈមណ្ឌលយ៉ាងតឹងរ៉ឹងបំផុត ។ អ្វីដែលធ្វើឱ្យលោកកាន់តែមានជំនឿចិត្តខ្លាំងថែមទៀតនោះ គឺដោយសារតែការប្រកួតនៅពេលនេះធ្វើឡើងនៅលើទឹកដីខ្លួនឯងមានអ្នកគាំទ្រច្រើន ធ្វើឱ្យក្រុមជម្រើសជាតិកម្ពុជាមានកម្លាំងចិត្តជាងការប្រកួតនៅក្រៅទឹកដី។ ដូច្នេះសម្រាប់ការប្រកួតលើកនេះលោកមានសង្ឃឹមឈ្នះច្រើនជាងចាញ់ ។ ការប្រកួតនឹងប្រព្រឹត្តទៅនៅថ្ងៃទី៦ ខេតុលា វេលាម៉ោង៦និង៣០នាទីល្ងាចនៅពហុកីឡដ្ឋានជាតិអូឡាំពិក ។ ចំពោះដំណើរការលក់សំបុត្រនៅបញ្ជរខ្លោងទ្វារចូលពហុកីឡដ្ឋានជាតិអូឡាំពិក គេសង្កេតឃើញថា មិនសូវមានអ្នកមកទិញកកកុញដូចមុននោះទេ តែអ្នកមកទិញម្នាក់ពី៥ទៅ១០សន្លឹករហូតដល់ទៅ២០សន្លឹកក៏មានដែរ។ គេមិនដឹងថា អ្នកមកទិញនោះយកទៅលក់បន្ត ឬយ៉ាងណានោះទេ ប៉ុន្តែបើតាមការសាកសួរ គឺពួកគេជួយទិញឱ្យមិត្តភក្ដិ ឬបងប្អូនដែលរវល់ធ្វើការងារមិនបានមកទិញផ្ទាល់ទើបធ្វើឱ្យកន្លែងលក់សំបុត្រមិនមានមនុស្សកកកុញដូចមុន។ ចំណែកតម្លៃសំបុត្រគឺ១០.០០០រៀលសម្រាប់កន្លែងមានដំបូល និង៥.០០០រៀលសម្រាប់កន្លែងគ្មានដំបូល ។
បានកត់សម្គាល់ឃើញថា បច្ចុប្បន្នវិស័យកីឡាបាល់ទាត់នៅកម្ពុជាមានការរីកចម្រើនយ៉ាងខ្លាំង ។ ជាក់ស្ដែងស្ទើរតែគ្រប់ការប្រកួតជាលក្ខណៈមិត្តភាព ឬលក្ខណៈជម្រុះក្នុងតំបន់កន្លងមក ក្រុមកម្ពុជាទទួលបានលទ្ធផលវិជ្ជមានច្រើនជាងមុនឆ្ងាយណាស់ ។ លោក គល់ សុផាន់ណា អគ្គលេខាធិការសហព័ន្ធកីឡាបាល់ទាត់កម្ពុជា បានឱ្យដឹងថា ភាពរីកចម្រើនរបស់វិស័យកីឡាបាល់ទាត់នាពេលនេះដោយសារតែមានការខិតខំប្រឹងប្រែងយ៉ាងខ្លាំងរបស់លោកនាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជាផង និងដោយមានការចូលរួមគាំទ្រយ៉ាងពេញទំហឹងពីសំណាក់បងប្អូនប្រជាពលរដ្ឋខ្មែរស្ទើរទូទាំងប្រទេសផង ជាពិសេសប្អូនៗយុវវ័យតែម្ដង ៕
ចែករំលែកព័តមាននេះ