ខេត្តតាកែវ ៖ ស្ត្រីម្នាក់ដែលមានកូនក្នុងបន្ទុក៥នាក់ ហើយពេលនេះក្លាយជាស្ត្រីមេម៉ាយ ដោយសារបុរសជាប្តីបានសម្រេចចិត្តគិតខ្លីដុតផ្ទះខ្លួនឯងចោលអស់ទាំងទ្រព្យសម្បត្តិហ្មត់ទាំងស្រុង ខានប្រពន្ធកូនរស់នៅ កាលពីយប់ថ្ងៃទី៣០ ខែកញ្ញា ឆ្នាំ២០១៦ ហើយខ្លួនត្រូវបានសមត្ថកិច្ចចាប់ឃុំឃាំងតាមនីតិវិធីច្បាប់ ។
ពេលនេះ ស្ត្រីមេម៉ាយកូន៥នាក់កំពុងដង្ហោយរកសប្បុរសជនជួយដល់គ្រួសារគាត់ ដោយសារពេលនេះគ្មានអ្វីទីពឹងឡើយ ។
បុរសដែលដុតបំផ្លាញផ្ទះចោលនេះឈ្មោះ សៀង សាផល អាយុ៣៧ឆ្នាំ រីឯភរិយាមានឈ្មោះ អ៊ុយ សាបាន អាយុ៣៤ឆ្នាំ ។ ទាំង២នាក់ប្តីប្រពន្ធ បានរួមរស់ជាមួយគ្នាជាង១០ឆ្នាំមកហើយ រហូតមានកូន៥នាក់ (ប្រុសនាក់៣ ស្រី២ នាក់)។
អ្វីជាការកក់សម្គាល់ជុំវិញហេតុការខាងលើនេះ គឺបុរសជាប្តីក្រោយ ពេលសមត្ថកិច្ចឃាត់ខ្លួនបាន បាននិយាយថា មូលហេតុដែលរូបគាត់ដុតផ្ទះចោល គឺដោយសារបងប្អូនមិនអោយខ្លួនរស់នៅជួបជុំប្រពន្ធនឹងកូន ។
ដោយឡែកស្ត្រីជាភរិយាវិញបាននិយាយថា មូលហេតុដែលបុរសជាប្តីដុតផ្ទះចោលគឺដោយសារផឹកស្រាស្រវឹង ហើយតែងរករឿងប្រពន្ធកូនមិនជួយគិតគូររកស៊ីទាល់តែសោះ ។ ដោយនៅថ្ងៃកើតហេតុ បុរសជាប្តីបានផឹកស្រាស្រវឹង ហើយមកគំរាមសុំលុយប្រពន្ធ ដោយសារប្រពន្ធគ្មានលុយអោយ។ ម្យ៉ាងទៀតប្រពន្ធរៀបរាប់ថា គ្រាន់តែរកលុយទិញសណ្តែក ទិញសាច់ ដើម្បីវេចនំអោយកូនទទួលទានក្នុងរដូវបុណ្យភ្ជុំនិងគេក៏គ្មានផង ហើយខ្លួនឯងជាប្តីមិនជួយរកស៊ីហើយបែរជាសុំលុយប្រពន្ធកូនយកទៅផឹកស៊ីទៀត អីចឹងប្រពន្ធកូនមានលុយមកពីណាអោយ ។ និយាយបានប៉ុណ្ណឹង បុរសជាប្តីក៏បានផ្ទុះកំហឹងប៉ុនប៉ងហិង្សា ទើបប្រពន្ធចុះចេញពីផ្ទះ ទៅនៅផ្ទះអ្នកជិតខាងក្បែរជាមួយកូន ។ ដោយសារហៅប្រពន្ធ មិនមកផ្ទះវិញ បុរសខាងលើ បានបញ្ចេញកំហឹងដុតផ្ទះចោលតែម្តង ។ ក្នុងហេតុការណ៍ខាងលើនេះដែរ ក្រោយពេលកើតហេតុភ្លាមៗ នគរបាលប៉ុស្តិ៍ឃុំរវាង ស្រុកសំរោង បានចុះអន្តរាគមន៍ឃាត់បុរសជាប្តី កសាងសំណុំបញ្ចូនទៅតុលាការខេត្តតាកែវ ដើម្បីចាត់ការតាមនីតិវិធីច្បាប់ ។
ជាការកត់សម្គាល់ គឺក្រោយពេលកើតហេតុ ស្ត្រីជាប្រពន្ធដែលមានកូនរហូតដល់ទៅ៥នាក់ បានក្លាយជាស្ត្រីមេម៉ាយ កូនរស់យ៉ាងវេទនាដូចលលកញីឈ្មោល បានលើកម្រាមដៃ១០ ដង្ហោយរកសប្បុរសជនគ្រប់ទិសទីមេត្តាជួយដល់រូបគាត់ផង ដោយសារពេលនេះ កុំថាឡើយផ្ទះសម្បែង សូម្បីតែប្រាក់កាស១សេន ១រៀលក៏គ្មានដែរ ស្រែចំការត្រូវជំពាក់ធនាគារបំណុលគេអស់រលីងគ្មានអីសល់ទីពឹងឡើយ មានតែលើកម្រាមដៃ១០ សុំក្តីសណ្តោសប្រោះប្រណីពីសប្បុរសជនជិតឆ្ងាយជួយដល់ក្រុមគ្រួសារបស់នាងផង ដែលកំពុងមានទុក្ខជាទម្ងន់បាត់បង់ទីជម្រកអស់ទៅហើយ ។
គួរបញ្ជាក់ថា ក្រោយពីប្តីចិត្តកំណាចដុតផ្ទះចោលខាងលើនេះ គឺក្រុមគ្រួសារស្ត្រីរងគ្រោះ និងកូន៥នាក់ រស់ដោយសារបានអ្នកជិតខាងជួយជ្រោមជ្រែងមួយគ្រាៗតែប៉ុណ្ណោះ ដែលបញ្ហានេះមិនអាចដោះស្រាយបានមួយជីវិតឡើយ ដូច្នេះមានតែសង្ឃឹមលើសប្បុរសជននៅគ្រប់ទិសទីដែលធ្លាប់មានចិត្តសណ្តោសប្រោសប្រណីជួយដល់ទុរគត៌ជនទាំងឡាយ សូមមេត្តាជួយឧបត្ថម្ភដល់គ្រួសារគាត់ផង ព្រោះគាត់ទីទ័លទុក្ខលំបាកស្មើនឹងទឹកដល់ច្រមុះមែនទែនហើយ ។ ក្នុងនោះដែរដោយទឹកចិត្តអាណិតអាសូរ កុមារ៉ា ម៉ម លីហួរ បានឧបត្ថម្ភគ្រួសារខាងលើនេះនូវថវិកាចំនួន១០ដុល្លារ ។ សង្ឃឹមថានិងមានបងប្អូនសប្បុរសជនយើងជួយឧបត្ថម្ភដល់ទុរគត៌ជនខាងលើនេះជាបន្តបន្ទាប់ទៀតជាក់ជាមិនខានឡើយ ដើម្បីរូបគាត់បានផ្សំផ្គុំកសាងទ្រនំរស់នៅជុំកូនចៅបន្តទៅមុខទៀត៕
ចែករំលែកព័តមាននេះ