ខេត្តព្រះសីហនុ៖ លោក តាំង សុចិត្តគ្រឹះស្នា ប្រធានមន្ទីរទេសចរណ៍ ខេត្តព្រះសីហនុ បានឲ្យដឹងថា ចំនួនភ្ញៀវទេសចរ​ទាំងជាតិ និងអន្តរជាតិ មកលេងខេត្តព្រះសីហនុ កើនឡើងក្នុងឱកាសបុណ្យចូលឆ្នាំថ្មី បន្ទាប់ពីអាក់ខាន រយៈពេលពីរឆ្នាំ កន្លងមក ដោយសារវិបត្តិជំងឺកូវីដ១៩ បងប្អូនប្រជាពរដ្ឋភ្ញៀវទេសចរ មកលេងកម្សាន្ត ក្នុងឱកាសចូលឆ្នាំប្រពៃណីជាតិខ្មែរ​រយៈពេល៣ថ្ងៃ ថ្ងៃទី១៤-១៦ មេសា ឆ្នាំ២០២២ នៅខេត្តព្រះសីហនុ សរុបប្រមាណ ២៣២.២៦៤ នាក់ ដោយមានភ្ញៀវជាតិ ២១៨.៨៥៣នាក់ និង​ភ្ញៀវ​បរទេស ១៣.៤១១នាក់។

លោក​ប្រធានមន្ទីរទេសចរណ៍ខេត្ត ក៏បានបញ្ជាក់បន្ថែមថា នៅក្នុងឱកាសនៃពិធីបុណ្យចូលឆ្នាំថ្មីនេះ គឺភ្ញៀវទេសចរ ដើរកម្សាន្ត នៅតាមតំបន់ឆ្នេរដីគោក ដីកោះ និងរមណីយដ្ឋានតំបន់ទឹក​ធ្លាក់ និងតំបន់រមណីយដ្ឋានថ្មីៗ ដែលវិស័យឯកជន បានរៀបចំសម្រាប់ទទួលភ្ញៀវទេសចរមកលេងកំសាន្ត នៅក្នុងភូមិសាស្ត្រស្រុកព្រៃនប់ ស្រុកកំពង់សិលា ស្រុកស្រុកស្ទឹងហាវ ដែលជាកន្លែងពេញនិយម សម្រាប់ភ្ញៀវទេសចរ ទៅលេងកម្សាន្តផងដែរ។

នៅក្នុងក្រុងព្រះសីហនុ រដ្ឋបាលខេត្តព្រះសីហនុ ក៏បានរៀបចំឲ្យមានព្រឹត្តិការណ៍កម្មវិធីកម្សាន្តផ្សេងៗ ដូចជា ការប្រគុំតន្ត្រី ការតាំងពីព័រណ៍ ការរៀបចំសង្រ្កានឆ្នាំថ្មី ដើម្បីបង្កើនបរិយាកាសសប្បាយរីករាយជូនបងប្អូន​ប្រជាពលរដ្ឋ​ភ្ញៀវទេសចរទាំងជាតិ និងអន្តរជាតិ មកលេងកម្សាន្ត ក្នុងឱកាសឆ្នាំថ្មី បន្ទាប់ពីបងប្អូនប្រជាពលរដ្ឋ​អាក់ខានសប្បាយរីករាយក្នុងឱកាសបុណ្យចូលឆ្នាំថ្មី រយៈពេល ២ឆ្នាំកន្លងមក ដោយសារវិបត្តិនៃជំងឺកូវីដ១៩។

ដោយឡែក បញ្ហាសន្តិសុខសណ្តាប់ធ្នាប់លោកឧត្តមសេនីយ៍ទោ ជួន ណារិន្ទ ស្នងការនគរបាល​ខេត្តព្រះសីហនុ បានឲ្យដឹងថា គឺមានសុវត្ថិភាពល្អ មិនមានបាតុភាពអសន្តិសុខ កើតឡើង ដែលបង្កអសន្តិសុខ ដល់ការសប្បាយ​របស់បងប្អូនប្រជាពលរដ្ឋ ភ្ញៀវទេសចរ មកលេងកម្សាន្ត ក្នុងឱកាសនៃពិធីបុណ្យចូលឆ្នាំថ្មីនេះផងដែរ។ ទាំងអស់​នេះ គឺដោយការខិតខំយកចិត្តទុកដាក់ពីឯកឧត្តម គួច ចំរើន អភិបាលខេត្តព្រះសីហនុ ក្នុងការដាក់វិធានការ​ការពារ​សន្តិសុខ​សណ្ដាប់ធ្នាប់ ជូនបងប្អូនប្រជាពលរដ្ឋភ្ញៀវទេសចរ មកលេងកម្សាន្ត ក្នុងឱកាសឆ្នាំថ្មី ប្រកបដោយភាពសប្បាយរីករាយ៕