ខេត្តកំពង់ធំ ៖ អតីតអ្នកគ្រូបង្រៀននៅសាលាបឋមសិក្សាបល្ល័ង្កចូលនិវត្តន៍មួយរូបបានអះអាងថា ត្រូវគេបង្ខំឲ្យរុះរើផ្ទះចេញពីដីសាលា ចំណែកខាងនាយកសាលាអះអាងថា …
ខេត្តកំពង់ធំ ៖ អតីតអ្នកគ្រូបង្រៀននៅសាលាបឋមសិក្សាបល្ល័ង្កចូលនិវត្តន៍មួយរូបបានអះអាងថា ត្រូវគេបង្ខំឲ្យរុះរើផ្ទះចេញពីដីសាលា ចំណែកខាងនាយកសាលាអះអាងថា គេរុះរើចេញអស់ហើយនៅឡើយតែអ្នកគ្រូចូលនិវត្តន៍រូបនេះមិនព្រមរុះរើចេញខណៈគាត់មានផ្ទះថ្មី១កន្លែងទៀតហើយនោះ ។
ពាក់ព័ន្ធករណីខាងលើនេះ អ្នកស្រី ប៉ែន ស៊ីចាន់ថុន អាយុ៦១ឆ្នាំ រស់ក្នុងដីជ្រុងសាលាបឋមសិក្សាបល្ល័ង្កលិច សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ ជាគ្រូបង្រៀនចូលនិវត្ត បានប្រាប់ឲ្យដឹងថា រូបគាត់ និងប្រជាពលរដ្ឋ៣គ្រួសារទៀតបានមកសុំរស់នៅលើដីសាលារៀនខាងក្រោយតាំងពីឆ្នាំ១៩៩៧មកម្ល៉េះ កាលនោះគាត់ជាគ្រូបង្រៀននៅសាលានេះ ក្រោយពីចូលនិវត្តន៍គាត់បានចូលបម្រើការងារជាមន្ត្រីកិច្ចសន្យានៅក្នុងសាលាខេត្ត មួយរយៈចុងក្រោយនេះស្រាប់តែត្រូវបានខាងសាលាប្រាប់ថា ការិយាល័យអប់រំក្រុងតម្រូវឲ្យគាត់រើផ្ទះចេញពីលើដីនេះ ដោយពុំមានដំណោះស្រាយអ្វីនោះឡើយ ហើយគាត់បានដាក់ពាក្យសុំឲ្យអាជ្ញាធរខេត្តជួយអន្តរាគមន៍ចំពោះរឿងនេះ ព្រោះអ្នករស់នៅលើដីនោះមាន៤គ្រួសារ ហេតុអ្វីដេញតែគាត់ ហើយ៣គ្រួសារទៀតគេផ្តល់ប័ណ្ណកម្មសិទ្ធិឲ្យ ចំណែករូបគាត់បែរជាបង្ខំឲ្យរុះរើផ្ទះចេញ ខណៈខាងអាជ្ញាធរខេត្តមិនទាន់បានចុះមកដោះស្រាយផង ។
អ្នកស្រី ប៉ែន ស៊ីចាន់ថុន បានសំណូមពរដល់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មេត្តាជួយរកយុត្តិធម៌ដល់រូបគាត់ដែលជាអតីតគ្រូបង្រៀនចូលនិវត្តន៍ និងជាស្ត្រីមេម៉ាយផង ។ តើឲ្យគាត់ទៅរស់នៅឯណា ម្យ៉ាងខ្លួនជាស្រីមេម៉ាយទៀត ។
ជុំវិញបញ្ហាខាងលើនេះ លោក ភា សុខុម នាយកសាលាបឋមសិក្សាបល្ល័ង្ក បានប្រាប់នៅថ្ងៃទី២៧ ខែកញ្ញា ឆ្នាំ២០១៦នេះថា កាលពីមុនមាន២គ្រួសារបានមកសុំធ្វើផ្ទះស្នាក់នៅបណ្តោះអាសន្ននៅជ្រុងសាលាខាងមុខ ទី១-ខាងសហគមន៍ និងទី២-ខាងអ្នកគ្រូ ប៉ែន ស៊ីចាន់ថុន ។ កាលនោះលោកនាយកសាលាមុនបានសម្រេចឲ្យអ្នកគ្រូ ប៉ែន ស៊ីចាន់ថុន មកនៅខាងក្រោយ ដោយមានកិច្ចសន្យាត្រឹមត្រូវ នៅពេលសាលាត្រូវការ ត្រូវតែប្រគល់ដីមកឲ្យសាលាវិញ ។ ដល់ពេលសាលាត្រូវការអភិវឌ្ឍន៍ ខាងសហគមន៍ព្រមរើផ្ទះចេញតាំងពីដើមខែកញ្ញា ឆ្នាំ២០១៦មកម្ល៉េះ នៅតែខាងអ្នកគ្រូមិនព្រមចេញសោះ ខណៈដែលរូបគាត់មានផ្ទះថ្មី១កន្លែងទៀតហើយនោះ ។ លោករង់ចាំតែខាងអាជ្ញាធរខេត្តសម្រេចពីព្រោះដីនេះជាដីរបស់រដ្ឋទេ ។
លោក យិន ប៊ុនហួត ប្រធានការិយាល័យអប់រំក្រុងស្ទឹងសែនបានប្រាប់ឲ្យដឹងដែរនេះថា ករណីខាងលើនេះខាងសាលាទេជាអ្នកដេញ ព្រោះត្រូវសាងសង់អាគារបន្ថែម ដែលជាអំណោយរបស់សម្តេចតេជោ ហ៊ុន សែន ។
ចំណែកខាងអាជ្ញាធរខេត្តកំពង់ធំវិញបានប្រាប់ឲ្យដឹងដែរថា ចំពោះបញ្ហារបស់អតីតអ្នកគ្រូ ប៉ែន ស៊ីចាន់ថុន គណៈកម្មការដោះស្រាយទំនាស់ដីធ្លីខេត្តនឹងចុះទៅពិនិត្យមើលនៅពេលបុណ្យភ្ជុំបិណ្ឌរួច រីឯថា ត្រូវដោះស្រាយទៅតាមវិធីណានោះនៅមិនទាន់ដឹងនៅឡើយទេ រង់ចាំពិនិត្យជាក់ស្តែងសិន ៕
ចែករំលែកព័តមាននេះ