ទីក្រុងញូវយ៉ក ៖ មនុស្សយ៉ាងហោចណាស់ ១៧នាក់បានរងរបួស ក្នុងការបាញ់ប្រហារមួយ ក្នុងអំឡុងពេលម៉ោងដ៏មមាញឹក នាម៉ោង០៨និង៣០នាទីព្រឹកថ្ងៃទី១៣ មេសា ២០២២(ម៉ោងក្នុងតំបន់) នៅស្ថានីយ៍រថភ្លើងក្រោមដី…
ទីក្រុងញូវយ៉ក ៖ មនុស្សយ៉ាងហោចណាស់ ១៧នាក់បានរងរបួស ក្នុងការបាញ់ប្រហារមួយ ក្នុងអំឡុងពេលម៉ោងដ៏មមាញឹក នាម៉ោង០៨និង៣០នាទីព្រឹកថ្ងៃទី១៣ មេសា ២០២២(ម៉ោងក្នុងតំបន់) នៅស្ថានីយ៍រថភ្លើងក្រោមដី ប្រ៊ូគ្លីន ផ្លូវលេខ៣៦ ក្នុងទីក្រុងញូវយ៉ក នេះបើយោងតាមកាសែត The New York Times ។
ខ្មាន់កាំភ្លើងមិនទាន់ត្រូវបានគេស្គាល់អត្តសញ្ញាណជាផ្លូវការនៅឡើយទេ បានពាក់របាំងមុខការពារឧស្ម័ន បំផ្ទុះគ្រាប់បែកផ្សែង និងបើកការបាញ់ប្រហារទៅលើអ្នកដំណើរ ដែលកំពុងជិះរថភ្លើង មុនពេលរត់គេចពីកន្លែងកើតហេតុ ។ ក្នុងចំណោមអ្នកដំណើរដែលរងរបួស បានរត់គេច និងស្រែកអោយគេជួយ! ពេលរថភ្លើងចូលមកដល់ស្ថានីយ៍ ។ ក្នុងទូរថភ្លើងពោរពេញដោយផ្សែង និងឈាមហូរលើកម្រាល ប៉ុន្តែគ្មាននរណាម្នាក់ស្លាប់នោះទេ ។
លោកស្រី Keechant Sewell ស្នងការប៉ូលិសទីក្រុងញូវយ៉ក បាននិយាយថា កម្លាំងប៉ូលិសកំពុងតាមប្រមាញ់បុរសអាយុ ៦២ឆ្នាំម្នាក់ ដែលមន្ត្រីជំនាញដាក់ឈ្មោះ Frank James ជាជនជាប់សង្ស័យខ្លាំង ក្នុងការបាញ់ប្រហារខាងលើនេះ ។ ជនសង្ស័យបានជួលរថយន្តមួយគ្រឿង នៅក្នុងរដ្ឋ ហ្វីឡាដែលហ្វៀ ។ កូនសោររបស់រថយន្ត ត្រូវបានរកឃើញនៅក្នុងបណ្តុំរបស់របរនៅលើរថភ្លើង ដែលប៉ូលិសជឿថា ជារបស់ខ្មាន់កាំភ្លើង រួមមានកាំភ្លើងខ្លីម៉ាក Glock ៩មិល្លីម៉ែត្រ ទស្សនាវដ្តី គ្រាប់រំសេវមួយចំនួន មួក និងវត្ថុរាវដែលគេជឿថាជាសាំង ។ បន្ទាប់មកប៉ូលិសបានរកឃើញរថយន្តដែលគេទុកចោល ។
លោកស្រីស្នងការប៉ូលិសក្រុងញូវយ៉ក បាននិយាយនៅក្នុងសេចក្តីថ្លែងការណ៍មួយថា រង្វាន់រហូតដល់ ៥០,០០០ដុល្លារអាមេរិក គឺផ្តល់ជូនសម្រាប់ព័ត៌មានណាមួយ ដែលនាំទៅដល់ការចាប់ខ្លួនជនសង្ស័យបាន ។
ទោះបីជាយ៉ាងណាក៏ដោយ ស្នងការប៉ូលិសក្រុងញូវយ៉ក បានបញ្ជាក់ថា ការវាយប្រហារនេះមិនជាប់ពាក់ព័ន្ធនឹងអំពើភេរវកម្មនោះទេ ។ ភ្នាក់ងារ FBI និងកម្លាំងប្រឆាំងភេរវកម្ម កំពុងរួមគ្នាស៊ើបអង្កេតនៅតំបន់នោះ សម្ភាសន៍សាក្សី និងស្វែងរកវីដេអូពីកាមេរ៉ាសុវត្ថិភាពតាមដងផ្លូវ ។
ឧទ្ធម្ភាគចក្រប៉ូលិសបានហោះពីលើកន្លែងកើតហេតុ អស់ជាច្រើនម៉ោង ខណៈអាជ្ញាធរ នៅមិនទាន់ដឹងពីមូលហេតុនៃការបាញ់ប្រហារនៅឡើយ ។ ក្រុមស៊ើបអង្កេតបានរកឃើញអាវុធមួយដើមនៅកន្លែងកើតហេតុ រួមជាមួយនឹងឧបករណ៍ និងរបស់របរផ្សេងទៀត ដែលមន្ត្រីជំនាញកំពុងធ្វើការវិភាគ ៕
ចែករំលែកព័តមាននេះ