ផ្ទុះអាវុធមួយប្រាវក្នុងទីក្រុងរណបខាំកូស៊ីធី ផ្អើលទាំងយប់
រាជធានីភ្នំពេញ ៖ កាលពីវេលាម៉ោង៦ និង២០នាទីព្រលប់ថ្ងៃទី២១ ខែកញ្ញា ឆ្នាំ២០១៦ មានការភ្ញាក់ផ្អើលមួយដោយសារស្នូរផ្ទុះអាវុធជាច្រើនគ្រាប់ដើម្បីគំរាម និងចាប់ខ្លួន …
រាជធានីភ្នំពេញ ៖ កាលពីវេលាម៉ោង៦ និង២០នាទីព្រលប់ថ្ងៃទី២១ ខែកញ្ញា ឆ្នាំ២០១៦ មានការភ្ញាក់ផ្អើលមួយដោយសារស្នូរផ្ទុះអាវុធជាច្រើនគ្រាប់ដើម្បីគំរាម និងចាប់ខ្លួនជនសង្ស័យ៣នាក់នៅតាមបណ្តាយវិថីបុរីអង្គរភ្នំពេញ ក្នុងទីក្រុងរណបខាំកូស៊ីធី ក្នុងភូមិទួលគោក សង្កាត់ទូលសង្កែ ខណ្ឌឫស្សីកែវ ។
ជនសង្ស័យដែលត្រូវឃាត់ខ្លួនមាន ១-ឈ្មោះ កែវ រដ្ឋា អាយុ២០ឆ្នាំ ,២-ឈ្មោះ ទឹម ស៊ីដេត អាយុ៣៨ឆ្នាំ និង៣-ឈ្មោះ សុខ លាភ អាយុ៣៩ឆ្នាំ ។
លោកវរសេនីយ៍ យិន បញ្ញារិទ្ធ ប្រធានការិយាល័យផ្សព្វផ្សាយ(ក៩)នៃមន្ទីរប្រឆាំងគ្រឿងញៀន ក្រសួងមហាផ្ទៃបានឲ្យដឹងថា ដោយមានបទបញ្ជាពីលោកឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ និងលោកឧត្តមសេនីយ៍ ខៀវ សាម៉ន នាយកមន្ទីរប្រឆាំងគ្រឿងញៀន កម្លាំងនគរបាលរបស់លោកបានធ្វើការស្រាវជ្រាវពីមុខសញ្ញាជួញដូរគ្រឿងញៀន រហូតឈានទៅបង្ក្រាប និងចាប់ខ្លួនបានជនសង្ស័យទាំង៣នាក់ ខណៈយកគ្រឿងញៀនមកលក់នៅតាមដងផ្លូវ ។ នៅក្នុងការឃាត់ខ្លួនសមត្ថកិច្ចដកហូតបានគ្រឿងញៀនប្រមាណ១គីឡូក្រាម ។
តាមព័ត៌មានឲ្យដឹងទៀតថា នៅក្នុងការបង្ក្រាបគ្រឿងញៀននេះ សមត្ថកិច្ចក៏បានប្រើវិធានការញុះញង់ ហើយ មានការផ្ទុះអាវុធប្រមាណ៥គ្រាប់ ដើម្បីគំរាមជនសង្ស័យចៀសវាងមានការតដៃផងដែរ ។
ក្រោយពេលចាប់ខ្លួន ជនសង្ស័យរួមទាំងវត្ថុតាងត្រូវបានសមត្ថកិច្ចបញ្ជូនទៅកាន់មន្ទីរប្រឆាំងគ្រឿងញៀនដើម្បីសាកសួរ និងស្រាវជ្រាវតាមរកបក្សពួកបន្តទៀត ៕
ចែករំលែកព័តមាននេះ