ភ្នំពេញ៖ បុរសម្នាក់ បានបើករថយន្ត លុចស៊ីស RX 330 ក្នុងស្ថានភាពស្រវឹង រេចង្កូត ជ្រុលទៅបុករទេះ​លក់ភេសជ្ជៈ បណ្ដាលឲ្យរងការខូចខាតយ៉ាងដំណំ។ រថយន្តបង្ក ព្យាយាមបើករត់ថែមទៀត។ ហេតុការណ៍នោះ បានកើតឡើង នៅវេលាម៉ោង ២ និង ៣០នាទី រំលងអាធ្រាត្រ ឈានចូលថ្ងៃទី៨ ខែមេសា ឆ្នាំ២០២២ នៅ​ទល់មុខមន្ទីរពេទ្យមិត្តភាពខ្មែរ-សូវៀត ហៅ ពេទ្យរុស្ស៊ី លើផ្លូវ២៧១ ស្ថិតក្នុងសង្កាត់ទំនប់ទឹក ខណ្ឌបឹងកេងកង។

ប្រភពព័ត៌មាន បានឱ្យដឹងថា មុនពេលកើតហេតុ គេបានឃើញបុរសម្នាក់ វ័យជាង ៥០ឆ្នាំ បានបើករថយន្តម៉ាក​លុចស៊ីស RX330 ពណ៌ប្រផេះ ពាក់ស្លាកលេខ ខេមរភូមិន្ទ 01 .2 .5146 ធ្វើដំណើរតាមបណ្ដោយផ្លូវ២៧១ ក្នុងទិស​ដៅពីត្បូង ទៅជើង ក្នុងល្បឿនលឿន លុះមកដល់ចំនុចកើតហេតុ ក៏ស្រាប់តែរេចង្កូត ជ្រុលទៅបុករទេះលក់​ភេសជ្ជៈគ្រប់មុខ។ រទេះនោះ ត្រូវម្ចាស់ ឈប់នៅចិញ្ចើមផ្លូវ បណ្តាលឲ្យក្រឡាប់រទេះ រងការខូចខាត បែក​ភេសជ្ជៈ ព្រមទាំងធ្វើឱ្យនារីម្នាក់ ជាអ្នកលក់ រងរបួសស្រាលផងដែរ។

ក្នុងហេតុការណ៍នេះដែរ បន្ទាប់ពីបង្កគ្រោះថ្នាក់រួច អ្នកបើកបរ មិនព្រមឈប់រថយន្តទេ គឺបានព្យាយាម បើករថយន្ត រត់គេច ទាំងរថយន្ត រងការខូចខាត ផែ្នកខាងមុខ ចំហៀងខាងស្តាំ ហើយបែកកង់ខាងស្តាំ ដោយ​ឆ្លងស្ពានអាកាសស្ទឹងមានជ័យ ចូលដល់ទឹកដីខណ្ឌទួលគោក ក៏ត្រូវអ្នកឃើញហេតុការណ៍ ជួយដេញ​ឃាត់រថយន្ដ និងអ្នកបើកបរ។

បន្ទាប់ពីឃាត់រថយន្ដបានហើយ ភាគីទាំងសងខាង ក៏​បានសម្របសម្រួលគ្នា ដោយខាងរទេះលក់ភេសជ្ជៈ ទាមទារសំណង ចំនួន ១៤០០ដុល្លារ តែខាងរថយន្ត អោយតែ ៨០០ដុល្លារ​។

ក្រោយពេលកើតហេតុ ដោយសារតែការដោះស្រាយ មិនត្រូវគ្នា ប៉ូលិស ក៏បានអូសយករទេះលក់ភេសជ្ជៈ និងឡាន យកទៅរក្សាទុក នៅការិយាល័យនគរបាលចរាចរណ៍ជើងគោក​នៃស្នងការដ្ឋាន​រាជធានីភ្នំពេញ ដើម្បីរង់ចាំដំណោះស្រាយ នៅពេលអ្នកបើកបរស្វាង​ស្រា៕