រាជធានីភ្នំពេញ៖ អូស្ត្រាលី នឹងផ្តល់ជំនួយជាទូត្រជាក់ ចំនួន ៣៣គ្រឿង សម្រាប់រក្សាវ៉ាក់សាំង Pfizer។ ក្នុងនោះ អូស្ត្រាលី ក៏នឹងផ្ដល់ជំនួយកិច្ចសហប្រតិបត្តិការជាដៃគូលើវិស័យកសិកម្ម កសិឧស្សាហកម្ម ដើម្បីផលិតកសិផល ក្នុងការនាំចេញទៅប្រទេសក្រៅ តាមរយៈកិច្ចព្រមព្រៀងពាណិជ្ជកម្មសេរី។ នេះបើតាមឯកអគ្គរដ្ឋទូតអូស្ត្រាលី ប្រចាំកម្ពុជា លោក Pablo Kang ឯកអគ្គរដ្ឋទូតអូស្ត្រាលី ប្រចាំកម្ពុជា។
លោក Pablo Kang ឯកអគ្គរដ្ឋទូតនៃប្រទេសអូស្ត្រាលី បានលើកឡើងដូច្នេះ ក្នុងពេលចូលជួបសំដែងការគួរសម និងពិភាក្សាការងារជាមួយសម្តេចតេជោ នាយករដ្ឋមន្ត្រី ហ៊ុន សែន នៅរសៀលថ្ងៃទី១ ខែមេសា ឆ្នាំ២០២២។
ជាមួយគ្នានោះ លោកឯកអគ្គរដ្ឋទូតអូស្ត្រាលី ក៏បានគោរពជម្រាបជូនសម្តេចតេជោថា អូស្ត្រាលី នឹងបើកប្រទេសឡើងវិញ នៅ ២សប្តាហ៍ខាងមុខ នោះប្រទេសអូស្ត្រាលី នឹងអនុញ្ញាតឲ្យប្រជាជនធ្វើដំណើរចូលប្រទេសអូស្ត្រាលី ដោយមិនបាច់ត្រូវការធ្វើតេស្តកូវីដទៀតទេ។
នៅក្នុងជំនួប នាឱកាសនោះ លោក Pablo Kang ឯកអគ្គរដ្ឋទូតអូស្ត្រាលី ប្រចាំនៅកម្ពុជា បានគោរពជូនសម្ដេចតេជោនូវលិខិតរបស់លោក Scott Morrison នាយករដ្ឋមន្រ្តីអូស្រ្តាលី ជូនសម្ដេចតេជោ ក្នុងឱកាសខួប ៧០ឆ្នាំ នៃទំនាក់ទំនងការទូតរវាងប្រទេសអូស្ត្រាលី និងកម្ពុជា។
ការឆ្លើយតប សម្ដេចតេជោ ហ៊ុន សែន បានថ្លែងអំណរគុណចំពោះឯកឧត្តម Pablo Kang ចំពោះការនាំនូវលិខិតរបស់ឯកឧត្តមនាយករដ្ឋមន្ត្រីអូស្ត្រាលី មកជូនសម្ដេចនៅពេលនេះ។
សម្តេចតេជោ ក៏បានមានប្រសាសន៍ថា កម្ពុជាតែងតែវាយតំលៃខ្ពស់ ចំពោះប្រទេស ដែលទទួលស្គាល់កម្ពុជា មុនកម្ពុជា ទទួលបានឯករាជ្យ។ ដោយឡែកអូស្ត្រាលី បានទទួលស្គាល់កម្ពុជា មុនកម្ពុជាទទួលបានឯករាជ្យ ហើយជំរុញឲ្យកម្ពុជា ទទួលបានឯករាជ្យ ពីបារាំង។
សម្ដេចតេជោនាយករដ្ឋមន្ត្រី ក៏បានសំដែងនូវការអបអរសាទរដល់រដ្ឋាភិបាលអូស្ត្រាលី ក្នុងការគ្រប់គ្រង ការរីករាលដាលជំងឺកូវីដ-១៩ និងការបើកប្រទេសឡើងវិញ នៅ ២សប្តាហ៍ខាងមុខនេះ ។
សម្ដេចតេជោ ក៏បានថ្លែងអំណរគុណដល់រដ្ឋាភិបាលអូស្ត្រាលី ដែលបានផ្ដល់វ៉ាក់សាំង និងទូត្រជាក់រក្សាវ៉ាក់សាំង និងកិច្ចសហប្រតិបត្តិការជាដៃគូជា ពិសេសលើវិស័យកសិកម្ម កសិឧស្សាហកម្ម ដើម្បីជំរុញ ចង្វាក់ផលិតកម្ម សម្រាប់ការនាំចេញផលិតផលកសិកម្មកម្ពុជា តាមរយៈកិច្ចព្រមព្រៀងពាណិជ្ជកម្មសេរី។
មុននឹងបញ្ចប់ សម្តេចតេជោ នាយករដ្ឋមន្ត្រី បានស្នើឲ្យលោក Pablo Kang ធ្វើការពិនិត្យលើវិស័យផ្សេងៗទៀត ដើម្បីពង្រីក និងពង្រឹងកិច្ចសហប្រតិបត្តិការបន្ថែមទៀត លើទំនាក់ទំនងរវាងប្រទេសយើងទាំងពីរ។
សូមរម្លឹកថា អូស្ត្រាលី បានផ្តល់វ៉ាក់សាំងបង្ការជំងឺកូវីដ ១៩ ប្រភេទ Pfizerជាង ២,៣ លានដូស ដល់កម្ពុជា។ ក្នុងនោះ ពិធីប្រគល់ និងទទួលថ្នាំវ៉ាក់សាំង Pfizer ដំណាក់កាលទី១ ចំនួន ៧៨៣ ០០០ ដូស ដល់ប្រទេសកម្ពុជា បានធ្វើឡើងកាលពីយប់ថ្ងៃទី២៦ ខែធ្នូ ឆ្នាំ២០២១ នៅព្រលានយន្តហោះអន្តរជាតិភ្នំពេញ។ ប៉ុន្មានថ្ងៃក្រោយមក វ៉ាក់សាំងនៅសល់ ត្រូវបានបញ្ជូនមកដល់កម្ពុជា ដើម្បីបង្គ្រប់ចំនួនជាង ២,៣លានដូស។ កម្ពុជាបានប្រើប្រាស់ថ្នាំវ៉ាក់សាំង ជាជំនួយរបស់អាមេរិកនោះ ជាដូសជំរុញទី៤។ តែដំណើរការចាក់វ៉ាក់សាំងដូសទី៤នេះ ធ្វើឡើងតែនៅភ្នំពេញប៉ុណ្ណោះ ដោយសារតែតាមបណ្តាខេត្ត មិនទាន់មានទូត្រជាក់ ដើម្បីស្តុករក្សាទុកថ្នាំវ៉ាក់សាំង Pfizer នេះ៕ ច័ន្ទថា
ចែករំលែកព័តមាននេះ