រាជធានីភ្នំពេញ ៖ ក្រសួងរ៉ែ និងថាមពលកម្ពុជា នៅថ្ងៃទី០១ ខែមេសា ឆ្នាំ២០២២នេះ បានចេញសេចក្ដីប្រកាសព័ត៌មានពាក់ព័ន្ធនឹងករណីចោរកម្ម របស់មន្ត្រីខ្លួនដែលបានលួចប្រាក់ចេញពីទូដែក សរុបជាង៥០ម៉ឺនដុល្លារ…
រាជធានីភ្នំពេញ ៖ ក្រសួងរ៉ែ និងថាមពលកម្ពុជា នៅថ្ងៃទី០១ ខែមេសា ឆ្នាំ២០២២នេះ បានចេញសេចក្ដីប្រកាសព័ត៌មានពាក់ព័ន្ធនឹងករណីចោរកម្ម របស់មន្ត្រីខ្លួនដែលបានលួចប្រាក់ចេញពីទូដែក សរុបជាង៥០ម៉ឺនដុល្លារ ។
សេចក្ដីប្រកាសរបស់ក្រសួងរ៉ែ និងថាមពល បានអោយដឹងថា កាលពីថ្ងៃទី៣១ ខែមីនា ឆ្នាំ២០២២ ក្រសួងរ៉ែ និងថាមពល បានរកឃើញនូវអំពើចោរកម្មប្រព្រឹត្តដោយមន្ត្រីក្រសួងរ៉ែ និងថាមពលមួយរូបមានតួនាទីជាអនុប្រធានការិយាល័យគ្រប់គ្រងចំណូល និងជារជ្ជទេយ្យករចំណូលរង ទទួលបន្ទុកលើការងារប្រាក់រង្វាន់របស់ក្រសួងឈ្មោះ ជិន លក្ខិណា ភេទស្រី ដែលមន្ត្រីរូបនេះ បានចូលបម្រើការងារនៅក្រសួងរ៉ែ និងថាមពល ចាប់តាំងពីឆ្នាំ២០១៥ ហើយកន្លងមក ពុំដែលបង្កជាបញ្ហាធ្វើឲ្យប៉ះពាល់ដល់ទំនុកចិត្តពីប្រធានអង្គភាពឡើយ ។
បន្ទាប់ពីបានដឹងនូវអំពើខាងលើ ប្រធានអង្គភាពបានរៀបចំផ្ទៀងផ្ទាត់បញ្ជីបឋម ហើយឃើញថា ថវិកាដែលបានបាត់បង់ជាប្រាក់ដុល្លារ មានចំនួន ១៦០,២៣៧.៩២ (មួយរយហុកសិបពាន់ ពីររយសាមសិបប្រាំពីរ និងកៅសិបពីរសេន) ដុល្លារអាមេរិក និងប្រាក់រៀលចំនួន ១,៤៣១,២៨៤,៥៩៧.៨០ (មួយពាន់បួនរយសាមសិបមួយលាន ពីររយប៉ែតសិបបួនពាន់ ប្រាំរយកៅសិបប្រាំពីរ និងប៉ែតសិបរៀល) ជាប្រាក់រៀល ដែលក្នុងនោះជាខ្ទង់ថវិកាប្រាក់រង្វាន់ បានមកពីចំណូលសេវាសាធារណៈ របស់ក្រសួងរ៉ែ និងថាមពល តាមប្រកាសអន្តរក្រសួងសម្រាប់បើកជូនថ្នាក់ដឹកនាំ និងមន្ត្រីរាជការទាំងអស់របស់ក្រសួងរ៉ែ និងថាមពល និងប្រាក់ពង្រឹងយន្តការ ដែលថ្នាក់ដឹកនាំទាំងអស់ របស់ក្រសួង បានចូលរួមសន្សំចាប់តាំងពីឆ្នាំ២០១៧ មកសម្រាប់ដោះស្រាយការងារទូទៅរបស់ក្រសួង លើមុខការផ្សេងៗរបស់ក្រសួង ដែលគ្មានថវិការដ្ឋសម្រាប់ចំណាយ ។
ក្រសួងរ៉ែ និងថាមពល បានបញ្ជាក់ថា ថវិកាសរុបដែលបាត់បង់ខាងលើនេះ ពុំមែនជាថវិកាសម្រាប់បង់ចូលថវិការដ្ឋទេ ។
សូមជម្រាបថា សមត្ថកិច្ចប៉ុស្តិ៍នគរបាលរដ្ឋបាលវត្តភ្នំ នៃអធិការដ្ឋាននគរបាលខណ្ឌដូនពេញ កាលពីថ្ងៃទី៣១ ខែមីនា ឆ្នាំ២០២២ បានឃាត់ខ្លួនស្ត្រីសង្ស័យម្នាក់ ដែលមានតំណែង ជាអនុប្រធាននាយកដ្ឋានគ្រប់គ្រងចំណូល នៃក្រសួងរ៉ែ និងថាមពល ពាក់ព័ន្ធនឹងករណីលួចលុយចេញពីទូដែកជាង៥០ម៉ឺនដុល្លារ របស់ក្រសួងរ៉ែ និងថាមពល ស្ថិតក្នុងខណ្ឌដូនពេញ រាជធានីភ្នំពេញ ។
សមត្ថកិច្ចនគរបាល បានឲ្យដឹងថា ស្ត្រីសង្ស័យឈ្មោះ ជិន លក្ខិណា រូបនេះមានអាយុ៣៥ឆ្នាំ មានទីលំនៅនៅផ្ទះលេខ២៥Eo ផ្លូវលេខ១៩ ភូមិ៣ សង្កាត់ជ័យជំនះ ខណ្ឌដូនពេញ រាជធានីភ្នំពេញ ។
តាមរបាយការណ៍បញ្ជាក់ដោយសមត្ថកិច្ច បានបង្ហាញថា សម្ភារបាត់បង់ក្នុងករណីលួចនេះរួមមាន ៖
១- នៅក្នុងទូដែករួមមានប្រាក់រៀលចំនួន១,៤៣១,២៨៤, ៥៩៧.៨០រៀល (មួយពាន់បួនរយសាបមួយលានម៉ាម្ភៃប្រាំបីម៉ឺនបួនពាន់ប្រាំរយកៅសិបប្រាំពីររៀលប៉ែតសិបសេន)។
២- ប្រាក់ដុល្លារចំនួន១៦០,២៣៧ដុល្លារនិង៩២សេន (ដប់ប្រាំមួយម៉ឺនពីររយសាបសិបប្រាំពីរដុល្លារនិងកៅសិបពីរសេន)។
របាយការណ៍ដដែល អោយដឹងថា កាលពីថ្ងៃទី២៣ ខែមីនា ឆ្នាំ២០២២ មន្ត្រីម្នាក់ទៀតឈ្មោះ ហ៊ាន ថាវី ភេទស្រី អាយុ៣៧ឆ្នាំ ជនជាតិខ្មែរ សញ្ជាតិខ្មែរ មុខរបរប្រធាននាយកដ្ឋានគ្រប់គ្រងចំណូលរ៉ែ និងថាមពល បានសុំអនុញ្ញាតច្បាប់ចំនួន ៨ថ្ងៃ ដោយសារក្រុមគ្រួសារ និងរូបគាត់ផ្ទាល់ បានផ្ទុកនូវជំងឺកូវីដ-១៩ ។ លុះដល់ថ្ងៃទី២៨ ខែមីនា ឆ្នាំ២០២២ ជនសង្ស័យបានផ្ញើសារទៅមន្ត្រីឈ្មោះ ហ៊ាន ថាវី តាមទូរស័ព្ទថា សុំសោបន្ទប់ ឲ្យជាងធ្វើសោទូដែក ។ មន្ត្រីឈ្មោះ ហ៊ាន ថាវី ក៏ឲ្យជនសង្ស័យទៅយកពីប្រធានរដ្ឋបាល ។ ពេលបានសោហើយជនសង្ស័យក៏ចូលទៅឆ្កឹះទូដែក និងសែងទូដែកចេញប្តូរទូដែកថ្មីមកជំនួសវិញ ។
លុះមកដល់ថ្ងៃទី៣១ ខែមីនា ឆ្នាំ២០២២ វេលាម៉ោង៩ព្រឹក មន្ត្រីឈ្មោះ ហ៊ាន ថាវី ក៏មកធ្វើការវិញ ពេលចូលដល់ក្នុងបន្ទប់ចាក់សោយកប្រាក់ឲ្យថ្នាក់ដឹកនាំ ស្រាប់តែចាក់សោពុំត្រូវ និងខុសលេខកូដ ទើបគាត់ហៅជនសង្ស័យមកសួរ ហើយឆែកមើលតាមកាមេរ៉ាសុវត្ថិភាព ស្រាប់តែឃើញជនសង្ស័យសែងទូដែកចេញក្រៅ ទើបជនសង្ស័យសារភាពថា ខ្លួនជាអ្នកឆ្កឹះទូដែក និងប្តូរទូដែកពិតមែន ។
បច្ចុប្បន្ននេះ ស្ត្រីសង្ស័យត្រូវបានឃាត់ខ្លួនជាបណ្ដោះអាសន្ន នៅឯអធិការនគរបាលខណ្ឌដូនពេញ ដើម្បីសាកសួរ រៀបចំបែបបទ និងកសាងសំណុំរឿងបញ្ជូនទៅកាន់តុលាការ ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ