ការគេង គឺជាផ្នែកមួយដ៏សំខាន់នៃជីវិតក្នុងមួយថ្ងៃៗរបស់មនុស្សគ្រប់រូប ។ បើអ្នកមានពេលគេងយ៉ាងលក់ស្រួលពេលណានោះ អ្នកនឹងមានអារម្មណ៍ស្រស់ថ្លានៅពេលព្រឹកបន្ទាប់មិនខាន ។ លើសពីនេះទៀត វាអាចធ្វើឲ្យអ្នកមានកម្លាំងក្នុងការឆ្លងកាត់នូវឧបសគ្គទាំងឡាយក្នុងថ្ងៃថ្មីរបស់អ្នកយ៉ាងមានប្រសិទ្ធភាព តើលោកអ្នកគិតថាត្រូវទេ ? ហើយវាមានទំនាក់ទំនងពិតមែនរវាងការគេងមិនគ្រប់គ្រាន់ និងការកើនឡើងនៃសម្ពាធ(Stress) ដែលធ្វើឲ្យប៉ះពាល់ដល់សុខភាព ។
យ៉ាងណាក៏ដោយ មនុស្សគ្រប់រូបគួរតែមានទម្លាប់នៃការគេងឲ្យល្អ។ មនុស្សដែលមាន ទម្លាប់អាក្រក់ពេលគេង គឺកំពុងតែបំផ្លាញអនាគតរបស់ពួកគេហើយ ។ ខាងក្រោមនេះ គឺជាទម្លាប់ពេលគេងដ៏អាក្រក់ដែលអ្នកគួរតែចៀសវាង ៖
១-ភ្លេចរៀបចំគម្រោងសម្រាប់ថ្ងៃស្អែក ៖
ការរៀបចំគម្រោងសម្រាប់ថ្ងៃស្អែក គឺជាវិធីមួយសម្រាប់ធានាថា អ្នកនឹងមានពេលព្រឹកព្រលឹមដ៏រលូន ។ មនុស្សបរាជ័យខ្ជះខ្ជាយពេលយប់របស់ពួកគេ និងមិនរៀបចំគម្រោងច្បាស់លាស់សម្រាប់ថ្ងៃបន្ទាប់ឡើយ។ ជាលទ្ធផល ភាពគ្មានសណ្តាប់ធ្នាប់មួយនេះអាចនឹងបន្តសម្រាប់ថ្ងៃបន្ទាប់ ។
ប៉ុន្តែប្រសិនបើអ្នកពិតជាចង់ប្រើប្រាស់ពេលវេលារបស់អ្នកយ៉ាងមានប្រសិទ្ធភាពមែននោះ សាកល្បងផ្លាស់ប្ដូរទម្លាប់ខាងលើនេះទៅ ។
២-មិនគិតឡើងវិញមុនពេលចូលគេង ៖
មនុស្សដែលបរាជ័យប្រហែលជាមិនអាចមើលឃើញពីសារសំខាន់នៃការសញ្ចឹងគិតឡើងវិញទេ ឬប្រហែលជាពួកគេមានអារម្មណ៍ថាជីវិតរបស់ពួកគេ គឺរវល់ពេកដល់ថ្នាក់គ្មានពេលប្រមាណនាទីក្នុងភាពស្ងប់ស្ងាត់ ។
ប្រាកដណាស់ អ្នកប្រហែលជាគ្មានពេលច្រើននាពេលថ្ងៃក្នុងការសញ្ចឹងគិតពីជីវិតរបស់អ្នកឡើយ ។ នេះជាមូលហេតុដែលការទុកពេលសម្រាប់គិតមុនពេលចូលគេង គឺជាគំនិតមួយដ៏ល្អ។ ការអនុវត្តមួយនេះ នឹងជួយអ្នកឲ្យក្លាយជាមនុស្សដែលមានគំនិតស្ងប់ និងមានអារម្មណ៍រីករាយនឹងអ្វីដែលខ្លួនមាន ។
៣-យកឧបករណ៍តិចណូឡូជីចូលក្នុងបន្ទប់៖
មនុស្សបរាជ័យបំផ្លាញដំណេករបស់ពួកគេដោយមិនដាច់ចិត្តដាក់ទូរស័ព្ទរបស់ពួកគេចុះ មុនពេលចូលគេង ។
ការប្រើប្រាស់ទូរស័ព្ទដៃមុនពេលចូលគេងអាចធ្វើឲ្យអ្នកគេងមិនលក់ស្រួល ឬគេងមិនលក់តែម្តង ព្រោះតែពន្លឺពណ៌ខៀវដ៏ភ្លឺអាចប៉ះពាល់ដល់ខួរក្បាលរបស់អ្នក ។ ប្រសិនបើអ្នកចង់កម្សាន្តអារម្មណ៍មុនពេលចូលគេង គឺអ្នកអាចប្តូរទៅអានសៀវភៅវិញ ល្អជាង ។
៤-មិនដាច់អាល័យនឹងរឿងអតីតកាល ៖
វាពិតជាងាយស្រួលណាស់ក្នុងការនឹកឃើញព្រឹត្តិការណ៍មិនសប្បាយចិត្ត ឬព្រឹត្តិការណ៍ដែលធ្វើឲ្យអ្នកស្តាយក្រោយមកដល់សព្វថ្ងៃ ។ វាហាក់បីដូចជាអន្ទាក់មួយអីចឹង ព្រោះប្រសិនបើអ្នកគិតពីវាហើយ អ្នកអាចនឹងប្រើប្រាស់ពេលមួយយប់របស់អ្នកគិតពីរឿងដដែលៗដោយមិនបានគេងទៀតផង ។ មនុស្សបរាជ័យ គឺជាមនុស្សដែលរស់នៅក្នុងភាពអវិជ្ជមាន ដែលនាំឲ្យកើតមានការស្ត្រេស និងប៉ះពាល់ដល់អារម្មណ៍ ។
៥-គេងបារម្ភពីថ្ងៃស្អែក ៖
លើសពីការរស់នៅក្នុងអតីតកាលហើយនោះ មនុស្សបរាជ័យ គឺភ័យខ្លាចនឹងអនាគត ។ វាមិនមែនជាបញ្ហាឡើយ នៅពេលយូរៗម្តងអ្នកបារម្ភពីព្រឹត្តិការណ៍ធំៗនាថ្ងៃអនាគត ។ ប៉ុន្តែប្រសិនបើអ្នកឈ្វេងយល់ថា ខ្លួនឯងព្រួយបារម្ភនឹងអនាគតក្នុងពេលគេងលើគ្រែពេលយប់នោះ វាគឺជាមុខសញ្ញាដ៏អាក្រក់មួយ ។ ភាពអវិជ្ជមានរបស់អ្នកអាចនឹងរាតត្បាតដល់ស្មារតីអ្នកទាំងមូល ហើយថែមទាំងអាចប៉ះពាល់ដល់ដំណេករបស់អ្នកថែមទៀតផង ។
៦-ខ្ជិលសម្អាតខ្លួន ៖
នេះប្រហែលជាមិនមែនជាបញ្ហាសម្រាប់មនុស្សមួយចំនួនទេ ប៉ុន្តែសម្រាប់អ្នកដែលខ្ជិលសម្អាតខ្លួន ។ សូមចាប់ផ្តើមមានទម្លាប់ល្អវិញនៅមុនពេលចូលគេង ដោយដុសធ្មេញ រុសធ្មេញរបស់អ្នក និងងូតទឹកជាប្រចាំ ។ កុំទុកខ្លួនប្រាណខ្លួនឯងចោលដោយមិនមើលថែ ។
មនុស្សបរាជ័យ គឺជាមនុស្សដែលលំបាកក្នុងការរក្សាទម្លាប់ល្អមុនពេលចូលគេង រហូតសូម្បីតែការដុសធ្មេញរបស់ពួកគេជាប្រចាំ ។ ប្រាកដណាស់ អ្នកពិតជាមិនបានត្រៀមខ្លួនសម្រាប់ភាពជោគជ័យឡើយ ប្រសិនបើអ្នកមិនមើលថែខ្លួនឯង ។
៧-ទទួលទានគ្រឿងស្រវឹងមុនពេលចូលគេង ៖
អ្នកប្រហែលជាគិតថា ការទទួលទានគ្រឿងស្រវឹង អាចនឹងជួយអ្នកឲ្យមានអារម្មណ៍ធូរស្រាលហាក់ដូចជាថ្នាំសណ្តំដែលអាចធ្វើឲ្យអ្នកគេងលក់យ៉ាងស្រួលបាន តែអ្នកគិតខុសហើយ ។ វាពិតជាដូចថ្នាំសណ្តំពិតមែនក្នុងពេលដំបូងៗ ប៉ុន្តែមិនយូរប៉ុន្មានបន្ទាប់ពីយើងគេងលក់ វាក៏ផ្លាស់ប្តូរមួយរំពេច ។
វិទ្យាស្ថានសុខភាពជាតិរបស់សហរដ្ឋអាមេរិកក៏យល់ស្របតាមទ្រឹស្តីនេះដែរ និងបាននិយាយថា ជាតិអាល់កុលឆក់យកគុណភាពនៃការគេងរបស់យើង ។ ការគេងរបស់អ្នកស្រវឹង គឺហាក់បីដូចជាការគេងក្នុងដំណាក់កាលមិនស្កប់ស្កល់ ។
៨-លួចញ៉ាំអាហារពេលយប់អធ្រាត្រ ៖
ការញ៉ាំអាហារក្នុងអំឡុងពេល៣ម៉ោងមុនពេលចូលគេង ក៏អាចប៉ះពាល់ដល់ដំណេករបស់អ្នកដែរ ហើយថែមទាំងធ្វើឲ្យអ្នកឡើងទម្ងន់ទៀតផង ។ ប្រសិនបើយើងចូលគេងបន្ទាប់ពីញ៉ាំឆ្អែត ការគេងនោះមិនអាចបំពេញនូវកម្លាំងទេ ព្រោះប្រព័ន្ធរំលាយអាហាររបស់យើងនៅតែដំណើរការនៅឡើយ ។
អាហារពេលយប់ដែលអាក្រក់ជាងគេ គឺស្ករ។ ប៉ុន្តែប្រសិនបើអ្នកពិតជាទ្រាំមិនបាននឹងការស្រេកឃ្លាននោះ គួរសាកល្បងតែក្តៅ ។
៩-បន្ទប់ដែលមានភ្លើងភ្លឺ ៖
ពេលដែលអ្នកចូលគេង អ្នកមិនគួរឲ្យមានភ្លើងប្រភេទណាមួយក្នុងបន្ទប់ទេ ។ មិនថាវាជាភ្លើងតាមចិញ្ចើមផ្លូវដែលចាំងចូលក្នុងបន្ទប់របស់អ្នកតាមបង្អួច ឬជាភ្លើងភ្លឺតិចៗពីទូរទស្សន៍ ទូរស័ព្ទ ឬឧបករណ៍ដទៃឡើយ ។ ពន្លឺ គឺទប់ស្កាត់អ្នកមិនឲ្យគេងលក់ស្រួល ។
សាកល្បងរកអ្វីមកបិទបាំងពន្លឺទាំងនោះមុនពេលចូលគេង ។ យើងជឿជាក់ថា អ្នកនឹងគេងលង់លក់ស្រួលមិនខាន ។
១០-គេងមិនទៀងពេល ៖
មនុស្សដែលបរាជ័យ គឺគ្មានពេលច្បាស់លាស់សម្រាប់ដំណេកទេ ។ ការគេងមិនទៀងពេលនេះ អាចប៉ះពាល់យ៉ាងខ្លាំងដល់វដ្តនៃការគេងរបស់អ្នក និងប៉ះពាល់ដល់ការងារ ព្រមទាំងជីវិតផ្ទាល់ខ្លួនរបស់អ្នកថែមទៀតផង ។ អ្នកប្រហែលជាមិនចង់ក្លាយជាបុគ្គលិកម្នាក់ដែលតែងតែមកយឺតដោយសារគេងជ្រុលនោះទេ ។
១១-គេងមិនគ្រប់គ្រាន់ ៖
មនុស្សបរាជ័យប្រហែលជាដោះសាថា ពួកគេគ្មានពេលគ្រប់គ្រាន់សម្រាប់គេង ។ ប៉ុន្តែប្រហែលជាពួកគេធ្វើការកំណត់អាទិភាពកិច្ចការរបស់គេខុស ។
ការគេងមិនគ្រប់គ្រាន់ គឺប៉ះពាល់យ៉ាងខ្លាំងដល់សុខភាព ។ ការសិក្សាជាច្រើនបានទាញទំនាក់ទំនងរវាងទម្លាប់គេងមិនល្អជាមួយបញ្ហាសុខភាពជាច្រើនប្រភេទ ។ ឧទាហរណ៍ បុរសម្នាក់ដែលគេងមិនគ្រប់គ្រាន់ គឺមានហានិភ័យខ្ពស់ជាងអ្នកគេងគ្រប់គ្រាន់ ក្នុងការកើតជំងឺទឹកនោមផ្អែម ៕
ចែករំលែកព័តមាននេះ