បរទេស ៖ នៅថ្ងៃទី២១ ខែមេសា ឆ្នាំ២០២៥ តម្លៃមាសអន្តរជាតិបានហក់ឡើងបង្កើតកំណត់ត្រាមិនធ្លាប់ពីមុន ខណៈការព្រួយបារម្ភកាន់តែខ្លាំងឡើងពីសង្គ្រាមពាណិជ្ជកម្មពិភពលោកបានជំរុញដល់តម្រូវការមាសកាន់តែខ្លាំង។ យោងតាមប្រភពពីទីភ្នាក់ងារសារព័ត៌មាន Reuters គិតត្រឹមម៉ោង៣:២០នាទីរសៀលថ្ងៃទី២១…
បរទេស ៖ នៅថ្ងៃទី២១ ខែមេសា ឆ្នាំ២០២៥ តម្លៃមាសអន្តរជាតិបានហក់ឡើងបង្កើតកំណត់ត្រាមិនធ្លាប់ពីមុន ខណៈការព្រួយបារម្ភកាន់តែខ្លាំងឡើងពីសង្គ្រាមពាណិជ្ជកម្មពិភពលោកបានជំរុញដល់តម្រូវការមាសកាន់តែខ្លាំង។
យោងតាមប្រភពពីទីភ្នាក់ងារសារព័ត៌មាន Reuters គិតត្រឹមម៉ោង៣:២០នាទីរសៀលថ្ងៃទី២១ ខែមេសា ឆ្នាំ២០២៥ តម្លៃមាសអន្តរជាតិបានបំបែកកំណត់ត្រាខ្ពស់បំផុតមិនធ្លាប់ពីមុន ៣,៣៩៥ដុល្លារក្នុង១អោន ឬ ៤,០៩០ដុល្លារក្នុង១តម្លឹង។ សន្ទស្សន៍ប្រាក់ដុល្លារអាមេរិកបានឈានដល់កម្រិតទាបរយៈពេល៣ឆ្នាំ ដែលធ្វើឱ្យមាសកាន់តែមានភាពទាក់ទាញសម្រាប់អ្នកកាន់រូបិយប័ណ្ណផ្សេងទៀត។
លោក Yeap Junrong អ្នកយុទ្ធសាស្ត្រទីផ្សារនៅក្រុមហ៊ុនវេទិកាពាណិជ្ជកម្ម IG បានថ្លែងថា «ឈរជាមូលដ្ឋាន ទីផ្សារមាសកំពុងកំណត់តម្លៃស្ថិតក្នុងហានិភ័យភូមិសាស្ត្រនយោបាយកំពុងកើនឡើង ដែលត្រូវបានជំរុញដោយភាពតានតឹងផ្នែកពន្ធគយរបស់សហរដ្ឋអាមេរិក និងការព្រួយបារម្ភអំពីការជាប់គាំងពាណិជ្ជកម្មពិភពលោក»។
ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសយកពន្ធទៅវិញទៅមកលើប្រទេសជាច្រើន កាលពីថ្ងៃទី២ ខែមេសា។ លុះក្រោយមករដ្ឋបាលរបស់លោកបានផ្អាកការយកពន្ធសម្រាប់ប្រទេសមួយចំនួន ប៉ុន្តែបានកំណត់សមរភូមិពាណិជ្ជកម្មជាមួយប្រទេសចិន។ ជាការឆ្លើយតប នៅថ្ងៃទី២១ ខែមេសា ឆ្នាំ២០២៥ ប្រទេសចិនបានព្រមាននឹងចាត់វិធានការតបតក្នុងលក្ខណៈច្បាស់លាស់ និងមានទៅវិញទៅមក បើប្រទេសណាមួយស្វែងរកកិច្ចព្រមព្រៀងជាមួយរដ្ឋបាលលោក ត្រាំ ដែលកំពុងរៀបចំដាក់សម្ពាធប្រទេសផ្សេងទៀតឱ្យដាក់កម្រិតពាណិជ្ជកម្មជាមួយប្រទេសចិនជាថ្នូរនឹងការលើកលែងពន្ធពីសហរដ្ឋអាមេរិក។
ទន្ទឹមនឹងនេះដែរ លោក ត្រាំ បានចាប់ផ្តើមបើកការរិះគន់ជាបន្តបន្ទាប់ប្រឆាំងនឹងលោក Jerome Powell ប្រធានធនាគារកណ្តាលអាមេរិក ដោយក្រុមរបស់លោកថែមទាំងបានធ្វើការវាយតម្លៃអំពីលទ្ធភាពបណ្តេញលោក Powell ចេញពីតំណែងផងដែរ ដោយពួកគេអះអាងថា សកម្មភាពការងារលោក Powell ឆ្លើយតបមិនគ្រប់គ្រាន់ទាន់ពេល នៅពេលលោក ត្រាំ អំពាវនាវឱ្យធនាគារកណ្តាលអាមេរិកកាត់បន្ថយអត្រាការប្រាក់។
នៅមួយជ្រុងទៀតពាក់ព័ន្ធភាពតានតឹងភូមិសាស្ត្រនយោបាយ រុស្ស៊ី និងអ៊ុយក្រែន បានចោទប្រកាន់គ្នាទៅវិញទៅមកអំពីការវាយប្រហារជាបន្តបន្ទាប់ឥតស្រាក់ស្រាន្តរាប់ពាន់ករណីដែលបំពានបទឈប់បាញ់ បើទោះបីជាប្រធានាធិបតីរុស្ស៊ី លោក វ្ល៉ាដឺមៀ ពូទីន ប្រកាសផ្អាកវាយប្រហារលើអ៊ុយក្រែននៅថ្ងៃបុណ្យ Easter Day ក៏ដោយ ខណៈដែលវិមានក្រឹមឡាំងបានថ្លែងថា គ្មានបទបញ្ជាឱ្យផ្អាកការវាយប្រហារលើសមរភូមិកំពុងប្រយុទ្ធគ្នាយ៉ាងក្ដៅគគុកនោះទេ៕
ចែករំលែកព័តមាននេះ