បុរីវ៉ាទីកង់៖ សម្ដេចសង្ឃកាតូលិក ប៉ាបហ្វ្រង់ស៊ីស បានសុគតហើយកាលពីព្រឹកមិញដោយរោគាពាធ។ នេះបើយោងតាមសេចក្ដីប្រកាសនៅក្នុងវីឌីអូឃ្លីបចេញពីបុរីវ៉ាទីកង់ផ្ទាល់តែម្ដងដែលថាសម្ដេចបានសុគតកាលពីព្រឹកថ្ងៃចន្ទនៅក្នុងជន្មាយុ៨៨ព្រះវស្សា។ ព្រះអង្គបានហែលឆ្លងជំងឺរលាកសួតរ៉ាំរ៉ៃជាយូរមកហើយ។ គ្រាន់តែថាប៉ុន្មានខែមុនពេលសុគត ព្រះអង្គមានអាពាធជាទម្ងន់ដល់ដំណាក់កាលដែលក្រុមគ្រូពេទ្យជួយសង្គ្រោះលែងបានតទៅទៀត។
មន្ត្រីគណៈសង្ឃជាន់ខ្ពស់នៃបុរីវ៉ាទីកង់ប្រកាសថាសម្ដេចសុគតនៅវេលាម៉ោង៧:៣៥ព្រឹកមិញ។ ព្រះអង្គមានព្រះនាមពីកំណើតថាចច ម៉ារីអូ បឺហ្គោគ្លីយ៉ូ (Jorge Mario Bergoglio) ចាប់កំណើតកាលពីឆ្នាំ១៩៣៦ ជាជនអន្តោប្រវេសន៍អ៊ីតាលីដែលទៅរស់នៅប្រទេសអាហ្សង់ទីន។ ព្រះអង្គទទួលការតែងតាំងជាសម្ដេចសង្ឃកាតូលិកកាលពីខែមីនា ឆ្នាំ២០១៣។
ទោះបីកិច្ចការផ្ទៃក្នុងមានបញ្ហារកាំរកូសខ្លះៗក្ដី ប៉ុន្តែនៅលើឆាកអន្តរជាតិ សម្ដេចសង្ឃប៉ាបហ្វ្រង់ស៊ីសជាតារាដ៏លេចធ្លោមួយអង្គដែលត្រូវបានទទួលស្វាគមន៍យ៉ាងកក់ក្ដៅនៅពេលនិមន្តទៅប្រទេសដទៃ។ ព្រះអង្គតែងតែសាបព្រោះការសន្ទនាគ្នា និងការកសាងសន្តិភាពរវាងគូជម្លោះនយោបាយ និងប្រដាប់អាវុធ។ ព្រះអង្គក៏ជាអ្នកមានសមានចិត្តចំពោះក្រុមមនុស្សដែលគេមិនសូវយកចិត្តទុកដាក់ដូចជាជនអន្តោប្រវេសន៍ជាដើម។
ថ្វីដ្បិតមានជំងឺប្រចាំកាយយ៉ាងណាក្ដី សម្ដេចសង្ឃតែងតែបំពេញតួនាទីយ៉ាងសកម្មជានិច្ច។ ព្រះអង្គតែងតែចូលរួមពិធីសូត្រធម៌ប្រចាំសប្ដាហ៍ និងឧស្សាហ៍និមន្តទៅក្រៅប្រទេសជារឿយៗ។ កាលពីខែកញ្ញា ឆ្នាំ២០២៤ ព្រះអង្គនិមន្តទៅប្រទេសចំនួន៤នៅតំបន់មហាសាគរប៉ាស៊ីហ្វិចដែលរួមមានឥណ្ឌូណេស៊ី, ប៉ាពួញូហ្គីណេ, ទីម័រខាងកើត និងសិង្ហបុរី។
ប៉ុន្តែមិនយូរប៉ុន្មាន សុខភាពរបស់ព្រះអង្គចាប់ផ្ដើមចុះទ្រុឌទ្រោមខ្លាំង។ កាលពីដើមឆ្នាំ២០២៥ ព្រះអង្គត្រូវគង់នៅក្នុងមន្ទីរពេទ្យដើម្បីព្យាបាលព្រះរោគរយៈពេល៥អាទិត្យនៅពេលដែលជំងឺរលាកសួតចាប់ផ្ដើមធ្វើទុក្ខខ្លាំងសឹងតែផ្ដាច់សង្ខាររបស់ព្រះអង្គម្ដងៗ។ ក្រុមគ្រូពេទ្យប្រាប់ថាការធ្វើទុក្ខលើកចុងក្រោយនេះបានបំផ្លាញសួតទាំងសងខាងរបស់ព្រះអង្គរួមទាំងសរសៃសាច់ដុំនៃប្រព័ន្ធដកដង្ហើមផងដែរ។ បន្ទាប់ពីនិមន្តចាកចេញពីមន្ទីរពេទ្យកាលពីថ្ងៃទី២៣ ខែមីនា ព្រះអង្គត្រូវគង់នៅក្នុងបុរីវ៉ាទីកង់យ៉ាងហោចណាស់២ខែ។
នៅដើមខែមេសា បុរីវ៉ាទីកង់បានប្រកាសលទ្ធផលឆ្លុះកាំរស្មីអ៊ិចទៅលើសួតដែលបង្ហាញថាអាការៈជំងឺរលាកសួតហាក់ដូចជាបានគ្រាន់បើជាងមុន, ប្រព័ន្ធខួរក្បាល, ប្រព័ន្ធសំឡេង និងប្រព័ន្ធដង្ហើមក៏បានប្រសើរជាងមុនផងដែរ។ ទោះបីព្រះអង្គត្រូវដាក់បំពង់អុកស៊ីហ្សែនជាប់ជានិច្ច ប៉ុន្តែព្រះអង្គអាចដកបំពង់អុកស៊ីហ្សែនចេញដើម្បីមានសង្ឃដីកាបានម្ដងម្កាលដែរ។ ដូច្នេះការសុគតរបស់ព្រះអង្គហាក់ដូចជាហួសពីការស្មាន៕
ចែករំលែកព័តមាននេះ