ខេត្តកណ្តាល ៖ បុរសជនសង្ស័យចំនួន០២នាក់បានធ្វើសកម្មភាពលួចទូកស្មាច់ អ្នកនេសាទត្រី បានសម្រេច រួចបើករត់គេច តែចំថ្ងៃស៊យ ម៉ាស៊ីនទូកអស់សាំង ត្រូវម្ចាស់គេបើកទូកដេញពីក្រោយទាន់ ក្របួចជាប់ទាំង០២នាក់…
ខេត្តកណ្តាល ៖ បុរសជនសង្ស័យចំនួន០២នាក់បានធ្វើសកម្មភាពលួចទូកស្មាច់ អ្នកនេសាទត្រី បានសម្រេច រួចបើករត់គេច តែចំថ្ងៃស៊យ ម៉ាស៊ីនទូកអស់សាំង ត្រូវម្ចាស់គេបើកទូកដេញពីក្រោយទាន់ ក្របួចជាប់ទាំង០២នាក់ ។
ហេតុការណ៍បង្កការភ្ញាក់ផ្អើលនេះដែរបានកើតទ្បើងកាលពីវេលាម៉ោង០៨ និង ០០ នាទីយប់ ថ្ងៃទី២០ ខែមេសា ឆ្នាំ២០២៥ ស្ថិតនៅចំណុចមាត់ស្ទឹង ពាមផ្ទោលកើត ក្នុងភូមិពាមផ្ទោលកើត ឃុំលើកដែក ស្រុកកោះធំ ខេត្តកណ្ដាល ។
សមត្ថកិច្ចបានឱ្យដឹងថា ជនរងគ្រោះមានឈ្មោះ គ្រី ម៉ាប់ ភេទប្រុស អាយុ៣១ឆ្នាំ មុខរបរ(នេសាទត្រី) ស្នាក់នៅទីតាំងកើតហេតុខាងលើ ។ ចំណែកជនសង្ស័យទី០១ឈ្មោះ គ្រឿន ឈុនលី ភេទប្រុស អាយុ២២ឆ្នាំ មុខរបរ (មិនពិតប្រាកដ) មានទីលំនៅភូមិ ពាមផ្ទោលកើត ឃុំលើកដែក ស្រុកកោះធំ ខេត្តកណ្ដាល ។ ជនសង្ស័យទី០២ មានឈ្មោះ ពេញ ម៉េងឃាង ភេទប្រុស អាយុ២៥ មុខរបរ(មិនពិតប្រាកដ) រស់នៅភូមិពាមផ្ទោលកើត ឃុំលើកដែក ស្រុកកោះធំ ខេត្តកណ្តាល ។
ក្នុងនោះសមត្ថកិច្ចដកហូតបានវត្ថុតាង ទូកស្មាច់ ពណ៌ខៀវចំនួន០១គ្រឿង និងម៉ាស៊ីនទូកចំនួន០១គ្រឿង ។
បើយោងតាមប្រភពព័ត៌មានពីជនរងគ្រោះបានឱ្យដឹងថា មុនពេលកើតកាលពីវេលាម៉ោង០៨និង០០យប់ ថ្ងៃទី២០ ខែមេសា ឆ្នាំ២០២៥ ជងរងគ្រោះកំពុងសម្រាកក្នុងរោង (មាត់ស្ទឹង) ស្រាប់តែជនសង្ស័យទាំង០២នាក់ខាងលើនេះបាននាំដើរមកធ្វើសកម្មភាពចូលលួចយកទូកស្មាច់ របស់ជនរងចំនួន០១ គ្រឿង ដែលបានចតទុកនៅមាត់ស្ទឹងពាមផ្ទោលកើត ហើយជនសង្ស័យបានបើកទូកនោះយកចេញទៅទិសដៅឃុំប្រាសាទ ស្រុកស្អាង ខេត្តកណ្តាល ។
នៅពេលដែលកំពុងបើកទូកចេញទៅ ស្រាប់តែមានបុរសម្នាក់គាត់បានឃើញក៏បានរត់ទៅប្រាប់ជនរងគ្រោះថា«មានគេលួចបើកទូកចេញទៅបាត់ហើយ» ភ្លាមៗនោះ ជនរងគ្រោះក៏បានដើរចុះទៅមើលទូក តែមិនឃើញទូកនោះទេ ទើបបាននាំគ្នាជិះទូកមួយគ្រឿងទៀតជិះដេញទៅតាមពីក្រោយលុះធ្វើដំណើរទៅដល់ចំណុចប្រឡាយ(៤០)ស្ថិតនៅក្នុងព្រែកខ្នាច ឃុំលើកដែក ស្រុកកោះធំ ខេត្តកណ្តាល ។ ស្រាប់តែប្រទះឃើញជនសង្ស័យទាំង០២នាក់កំពុងតែអុំទូករបស់ជនរងគ្រោះ ដោយសារម៉ាស៊ីនទូកនោះអស់សាំង ។ ទើបឃាត់ខ្លួនជនសង្ស័យទាំង០២នាក់ ប្រគល់ឱ្យសមត្ថកិច្ចប៉ុស្តិ៍នគរបាលលើកដែក ដើម្បីនាំខ្លួនយកមកសាកសួរ ។
នៅចំពោះមុខសមត្ថកិច្ច ជនសង្ស័យទាំង០២នាក់ខាងលើនេះ បានឆ្លើយសារភាពថាខ្លួន ពិតជាបានធ្វើសកម្មភាពលួចទូកស្មាច់របស់ជនរងគ្រោះពិតប្រាកដមែន ពីព្រោះអត់លុយចាយ ។
បច្ចុប្បន្នជនសង្ស័យខាងលើ ត្រូវបានសមត្ថកិច្ចស្រុកស្អាងកំពុងកសាងសំណុំរឿង បញ្ជូនទៅកាន់តុលាការចាត់ការតាមនីតិវិធីច្បាប់ ៕
ចែករំលែកព័តមាននេះ