រាជធានីភ្នំពេញ ៖ អ្នកនាំពាក្យអយ្យការអមសាលាដំបូងរាជធានីភ្នំពេញ កាលពីថ្ងៃទី១៩ ខែមេសា ឆ្នាំ២០២៥ បានប្រកាសព័ត៌មានស្តីពីការចោទប្រកាន់ទៅលើស្ត្រីអ្នកបើកបររថយន្តម្នាក់ដែលបង្កគ្រោះថ្នាក់ចរាចរណ៍បណ្តាលឲ្យមនុស្សម្នាក់ស្លាប់ និងរបួស៥នាក់ផ្សេងទៀត នៅខណ្ឌឫស្សីកែវ ។…
រាជធានីភ្នំពេញ ៖ អ្នកនាំពាក្យអយ្យការអមសាលាដំបូងរាជធានីភ្នំពេញ កាលពីថ្ងៃទី១៩ ខែមេសា ឆ្នាំ២០២៥ បានប្រកាសព័ត៌មានស្តីពីការចោទប្រកាន់ទៅលើស្ត្រីអ្នកបើកបររថយន្តម្នាក់ដែលបង្កគ្រោះថ្នាក់ចរាចរណ៍បណ្តាលឲ្យមនុស្សម្នាក់ស្លាប់ និងរបួស៥នាក់ផ្សេងទៀត នៅខណ្ឌឫស្សីកែវ ។ តំណាងអយ្យការបានចោទប្រកាន់ជាផ្លូវការ និងបានចាត់បញ្ជូនទៅចៅក្រមស៊ើបសួរដើម្បីសម្រេចឃុំខ្លួនជនបង្កដាក់ពន្ធនាគារជាបណ្តោះអាសន្ន រង់ចាំបើកសវនាការផ្តន្ទាទោសតាមច្បាប់ជាធរមាន ។
អ្នកនាំពាក្យអយ្យការអមសាលាដំបូងរាជធានីភ្នំពេញ ជម្រាបជូនសាធារណជនមេត្តាជ្រាបថា កាលពីថ្ងៃទី១៦ ខែមេសា ឆ្នាំ២០២៥ វេលាម៉ោង១៧ និង០០នាទី មានករណីគ្រោះថ្នាក់ចរាចរណ៍មួយកើតឡើងនៅចំណុចមុខក្រុមហ៊ុនខេហ្វ័រ លើផ្លូវជាតិលេខ៥ ភូមិផ្សារតូច សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ បង្កឡើងដោយឈ្មោះ ថូ មករា ភេទស្រី អាយុ២៧ឆ្នាំ បានបើកបររថយន្តមួយគ្រឿងម៉ាក LEXUS ND 200t ពណ៌ខ្មៅ ពាក់ផ្លាកលេខភ្នំពេញ 2BS.3393 ក្នុងល្បឿនលឿនខ្វះការប្រុងប្រយ័ត្ន និងស្ថិតក្នុងស្ថានភាពភាពស្រវឹងមានកម្រិតជាតិអាល់កុល ០.៧៣Mg/L ខ្យល់ បានបុកពីក្រោយម៉ូតូសណ្តោងរ៉ឺម៉កម៉ាក YAMAHA SIRIUS ពណ៌ខ្មៅ គ្មានផ្លាកលេខ ដែលបើកបរស្របទិសគ្នា បណ្តាលឲ្យអ្នកបើកបរម៉ូតូសណ្តោងរ៉ឺម៉កឈ្មោះ ឡេង ប៊ុនហេង ភេទប្រុស អាយុ៤៥ឆ្នាំ បានស្លាប់ក្រោយពេលបញ្ជូនទៅសង្គ្រោះនៅមន្ទីរពេទ្យ ។
ចំណែកអ្នករួមដំណើរលើម៉ូតូសណ្តោងរ៉ឺម៉កចំនួន៥នាក់ទៀតរងរបួស ។ ករណីនេះសមត្តកិច្ចបានឃាត់ខ្លួនជនបង្ក និងកសាងសំណុំរឿងបញ្ជូនមកអយ្យការអមសាលាដំបូងរាជធានីភ្នំពេញ ដើម្បីចាត់ការតាមនីតិវិធី ។ ក្រោយពីសាកសួរ និងពិនិត្យលើភស្តុតាងនានា តំណាងអយ្យការបានសម្រចធ្វើការចោទប្រកាន់អ្នកបើកបររថយន្តឈ្មោះ ថូ មករា ភេទស្រី អាយុ២៧ឆ្នាំ (ឃាត់ខ្លួន) ពីបទបើកបរបង្កគ្រោះថ្នាក់ចរាចរណ៍បណ្តាលឲ្យអ្នកដទែស្លាប់ របួស និងបទបើកបរស្ថិតក្នុងស្ថានភាពស្រវឹង (មានអត្រាជាតិអាល់កុល ០.៧៣Mg/L ខ្យល់) ។
យោងតាមមាត្រា៨៣ មាត្រា៨៥ នៃច្បាប់ស្តីពីចរាចរណ៍ផ្លូវគោក និងមាត្រា៧៧ថ្មីនៃច្បាប់ស្តីពីវិសោធនកម្មច្បាប់ស្តីពីចរាចរណ៍ផ្លូវគោក និងបញ្ជូនសំណុំរឿងនេះទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធីច្បាប់ ៕
ចែករំលែកព័តមាននេះ