កម្ពុជារំពឹងខ្ពស់លើ ស្រៀង វីរៈ សម្រាប់មេដាយស៊ីហ្គេម ឆ្នាំ២០២២ និង២០២៣
- ភ្នំពេញ
រាជធានីភ្នំពេញ ៖ កីឡាករការ៉ាតេ ស្រៀង វីរៈ គឺជាកីឡាករកម្ពុជាតែម្នាក់គត់ ដែលបានឈ្នះមេដាយមាស ក្នុងការ
រាជធានីភ្នំពេញ ៖ កីឡាករការ៉ាតេ ស្រៀង វីរៈ គឺជាកីឡាករកម្ពុជាតែម្នាក់គត់ ដែលបានឈ្នះមេដាយមាស ក្នុងការប្រកួតកីឡាការ៉ាតេជ្រើសរើសជើងឯកអាស៊ីអាគ្នេយ៍ លើកទី៩ (The 9th South East Asian Karate Championship) ឆ្នាំ២០២២ លើវិញ្ញសាប្រយុទ្ធបុរស ទម្ងន់ក្រោម៨៤គីឡូក្រាម ក្រោយយកឈ្នះកីឡាករម៉ាឡេស៊ី S Gnanasekaran Kathish។ លោកក៏ត្រូវបានគេជឿជាក់ផងដែរថា នឹងអាចបន្តដណ្ដើមបានមេដាយមាស នៅក្នុងព្រឹត្តិការណ៍ស៊ីហ្គេម២០២២នៅវៀតណាម និង ស៊ីហ្គេម២០២៣ នៅកម្ពុជា ខណៈដែលសាមីខ្លួនក៏ប្រកាសជំហរប្រឹងប្រែង។
ថ្លែងក្រោយទទួលបានមេដាយមាស ស្រៀង វីរៈ បានលើកឡើងដូច្នេះថា៖ «ខ្ញុំពិតជាមានមោទកភាពមែនទែន ដែលបានឈ្នះមេដាយមាស នៅក្នុងការប្រកួតជ្រើសរើសជើងឯកអាស៊ីអាគ្នេយ៍ លើកទី៩ ហើយខ្ញុំនឹងខិតខំហ្វឹកហាត់បន្តទៀតដើម្បីត្រៀមស៊ីហ្គេម២០២២ នៅប្រទេសវៀតណាម និងស៊ីហ្គេម២០២៣ នៅប្រទេសកម្ពុជា»។
ស្រៀង វីរៈ បានយកឈ្នះកីឡាករម៉ាឡេស៊ី S Gnanasekaran Kathish នៅវគ្គផ្ដាច់ព្រ័ត្រ ខណៈសាមីខ្លួនបានឲ្យដឹងថា ដៃគូរបស់ខ្លួនពិតជាដៃគូដ៏ស្វិតស្វាញ ដែលត្រូវការប្រើបច្ចេកទេសផ្ទាល់ខ្លួនដើម្បីយកឈ្នះ។វីរៈ បានបង្ហើបយ៉ាងដូច្នេះថា៖ «ការប្រកួតមានអារម្មណ៍ថា ស្វិតស្វាញមែនទែន ហើយតានតឹងនៅពេល final ដោយសារកីឡាករដៃគូរបស់ខ្ញុំគាត់ខ្លាំង អ៊ីចឹងខ្ញុំត្រូវការផ្ដោតអារម្មណ៍ ផ្ដោតលើបច្ចេកទេសខ្លាំងមែនទែន ដើម្បីយកឈ្នះដៃគូរបស់ខ្ញុំ។ ខ្ញុំបានស្វែងយល់ច្រើន ខ្ញុំយល់ពីដៃគូរបស់ខ្ញុំថា តើខ្ញុំត្រូវប្រើបច្ចេកទេសមួយណាដែលឈ្នះដៃគូ បើសិនជាដៃគូលឿនដៃ លឿនជើង តើខ្ញុំត្រូវប្រើតិកនិកអ្វីដើម្បីឈ្នះគាត់»។
បន្ទាប់ពីព្រឹត្តិការណ៍កីឡាអាស៊ីអាគ្នេយ៍ លើកទី៣១ នៅវៀតណាម កីឡាការ៉ាតេ ក៏ត្រូវបានដាក់បញ្ចូលទៅក្នុងការប្រកួតស៊ីហ្គេម ឆ្នាំ២០២៣ នៅកម្ពុជា នាពេលខាងមុខផងដែរ ខណៈ ស្រៀង វីរៈ បានប្តេជ្ញាប្រឹងប្រែងបន្ថែមទៀត ដើម្បីត្រៀមស៊ីហ្គេមទាំង ២លើកនេះ។ «ខ្ញុំត្រៀមខ្លួនរួចជាស្រេច។ ខ្ញុំត្រូវតែហ្វឹកហាត់បន្តរាល់ថ្ងៃ ដើម្បីយកមេដាយស៊ីហ្គេមជូនជាតិ (កម្ពុជា) ឲ្យបាន ។ នៅស៊ីហ្គេម ដៃគូកាន់តែមានកម្រិតកាន់តែខ្លាំង អ៊ីចឹងខ្ញុំខិតខំហ្វឹកហាត់បន្តទៀត មិនអាចបន្ធូរដៃបានឡើយ ហ្វឹកហាត់រហូត រហូតដល់ថ្ងៃប្រកួត»។ សម្ដីរបស់ ស្រៀង វីរៈ។
គួរបញ្ជាក់ថា មុននឹងឈានទៅទទួលបានមេដាយមាស ស្រៀង វីរៈ បានឆ្លងការប្រកួតស្វិតស្វាញ ដោយប្រកួតដំបូងអង្គុយរង់ចាំ ប្រកួតទី២ បានយកឈ្នះកីឡាករឥណ្ឌូនេស៊ី និងប្រកួតចុងក្រោយយកឈ្នះកីឡាករម៉ាឡេស៊ី ៕
ចែករំលែកព័តមាននេះ