អតីតម្ចាស់មេដាយប្រាក់អាស៊ានប៉ារ៉ាហ្គេម ជឹម ផាន នៅតែរំពឹងឈ្នះមេដាយម្ដងទៀត
- ភ្នំពេញ
រាជធានីភ្នំពេញ ៖ អតីតម្ចាស់មេដាយប្រាក់ អាស៊ានប៉ារ៉ាហ្គេម ជឹម ផាន បានប្តេជ្ញាចិត្តខ្ពស់ ថា នឹងដណ្តើម
រាជធានីភ្នំពេញ ៖ អតីតម្ចាស់មេដាយប្រាក់ អាស៊ានប៉ារ៉ាហ្គេម ជឹម ផាន បានប្តេជ្ញាចិត្តខ្ពស់ ថា នឹងដណ្តើមមេដាយឲ្យបានមួយគ្រឿង ពីព្រឹត្តិការណ៍អាស៊ានប៉ារ៉ាហ្គេម លើកទី១១ នៅប្រទេសឥណ្ឌូនេស៊ី ឆ្នាំ២០២២ ក្រោយម្ចាស់ផ្ទះវៀតណាម សម្រេចចិត្តមិនរៀបចំព្រឹត្តិការណ៍បន្ទាប់ពីបញ្ចប់ ស៊ីហ្គេម លើកទី៣១ ពីថ្ងៃទី១២ ដល់ទី២៣ ខែឧសភា ឆ្នាំ២០២២ ខាងមុខនេះ ។ ការថ្លែងបញ្ជាក់ប្រាប់ Cambodia 2023.com បែបនេះធ្វើឡើង ក្នុងពិធីប្រកួតកីឡាជនពិការជ្រើសរើសឯកថ្នាក់ជាតិ ឆ្នាំ២០២២ នាពហុកីឡដ្ឋានជាតិ មរតកតេជោ។
ជឹម ផាន ប្រាប់ថា ទន្ទឹមជាមួយនឹងការដាក់គោលដៅដណ្តើមមេដាយឲ្យបានពីទីក្រុងសូឡូ ប្រទេសឥណ្ឌូនេស៊ីនេះ ក៏មានបញ្ហាប្រឈមច្រើនដែរ ដូចជា ទីលាន គឺហ្វឹកហាត់លើផ្លូវប៉េតុង រីឯសម្ភារក៏ចាស់ៗអស់ហើយ (ដូចជាជើងសម្រាប់រត់ ស្រោមជើងជាដើម )។ កីឡាករពិការរូបនេះ បន្តថា ទោះបីជួបបញ្ហាខ្លះៗ វ័យក៏ជ្រេបន្តិចក្តី ប៉ុន្តែឆន្ទៈដណ្តើមមេដាយជូនជាតិ នៅតែមាន រហូតដល់ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
អតីតម្ចាស់មេដាយប្រាក់រូបនេះ ក៏បានថ្លែងអំណរគុណដល់សម្តេចតេជោ ហ៊ុន សែន ជាប្រធានគណៈកម្មាធិការប៉ារ៉ាឡាំពិកកម្ពុជា ដែលជានិច្ចកាលសម្តេចតែងតែឧបត្ថម្ភគាំទ្រ ទាំងស្មារតី ថវិកា និងលើកទឹកចិត្តដល់អត្តពលិកពិការ រហូតដណ្តើមបានមេដាយជាច្រើនឆាកអន្តរជាតិ មកជូនកម្ពុជា និងសូមថ្លែងអំណរគុណដល់ឯកឧត្តម យី វាសនា អគ្គលេខាធិការបារ៉ាឡាំពិកកម្ពុជា ក្រសួងអប់រំយុវជន និងកីឡា ព្រមទាំង គណៈកម្មាធិការជាតិអូឡាំពិកកម្ពុជា ។
ការជំរុញទឹកចិត្តខ្លាំងរបស់ថ្នាក់ដឹកនាំ បានធ្វើឲ្យកីឡាករពិការជើងស្តាំ រូបនេះ តាំងចិត្តប្រឹងប្រែងហ្វឹកហាត់យ៉ាងខ្លាំង ដោយសម្រួចលើវិញ្ញាសារត់ចម្ងាយ១០០ម៉ែត្រ នៅទីលានហ្វឹកហាត់ពហុកីឡដ្ឋានមរតកតេជោ បន្ទាប់ពីការស្នើសុំគណៈកម្មាធិការជាតិរៀបចំព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ នៅកម្ពុជា (Camsoc) តាមរយៈឯកឧត្តម យី វាសនា ។
គួររម្លឹកថា ជឹម ផាន ជាអតីតកីឡាករបាល់ទះឈរជនពិការ ក្នុងឆ្នាំ១៩៩៧ ធ្លាប់ចូលរួមប្រកួតកម្រិតអន្តរជាតិជាច្រើន និងធ្លាប់ជួយកម្ពុជាឈ្នះមេដាយមាស នៅតំបន់អាស៊ី ក្នុងចំណោម៤០ប្រទេស ឆ្នាំ២០០២ ពីប្រទេសកូរ៉េ និងទទួលបានចំណាត់ថ្នាក់លេខ៣ និងលេខ៤ នៅទ្វីបអឺរ៉ុបផងដែរ ។ ប៉ុន្តែលោកបានប្តូរមកហ្វឹកហាត់កីឡាអត្តពលកម្មក៏ទទួលបានជោគជ័យច្រើនគួរសមក្នុងនោះ ធ្លាប់ឈ្នះមេដាយប្រាក់ និងសំរិទ្ធជាច្រើនគ្រឿង ជូនកម្ពុជា ពីព្រឹត្តិការណ៍អាស៊ានប៉ារ៉ាហ្គេម នៅប្រទេសមីយ៉ាន់ម៉ា សិង្ហបូរី និងចុងក្រោយនៅប្រទេសម៉ាឡេស៊ី ជឹម ផាន ដណ្តើមមេដាយប្រាក់១ និងសំរិទ្ធ១គ្រឿង ៕
ចែករំលែកព័តមាននេះ