ខ្សែបម្រើប្រយុទ្ធរបស់បឹងកេត Mustafa Zazai ទទួលស្គាល់កំហុសក្រុម ក្រោយបរាជ័យ
- ភ្នំពេញ
រាជធានីភ្នំពេញ ៖ ក្លិបបឹងកេត បានចាប់ផ្តើមការប្រកួត ខេមបូឌានព្រីមៀរលីគ ជាមួយនឹងជ័យជម្នះ ៣-១ លើ
រាជធានីភ្នំពេញ ៖ ក្លិបបឹងកេត បានចាប់ផ្តើមការប្រកួត ខេមបូឌានព្រីមៀរលីគ ជាមួយនឹងជ័យជម្នះ ៣-១ លើ ណាហ្គាវើលដ៍ ប៉ុន្តែបានចាញ់កងយោធពលខេមរភូមិន្ទ (Tiffy Army) ១-០ និងបានចាញ់ ក្លិបព្រះខ័នរាជស្វាយរៀងរហូតដល់៤-០ ដែលលទ្ធផលបរាជ័យនេះ កំពុងធ្វើអោយម្នាក់ៗភ្ញាក់ផ្អើល ព្រោះក្រុមបឹងកេត មិនគួរនឹងមានលទ្ធផលនេះ សម្រាប់ការប្រកួត។
ជាមួយនឹងការបរាជ័យ កីឡាករសញ្ជាតិអាហ្គានីស្ថានលោក Mustafa Zazai បានទទួលស្គាល់ពីកំហុសរបស់ក្រុមជាមួយក្រុមព្រះខ័នរាជស្វាយរៀងជាលេស និងបានលើកឡើងថា «ព្រះខ័នរាជស្វាយរៀង ប្រកួតជាមួយយើង គឺក្រុមគេធ្វើបានល្អណាស់ ហើយគេសមនឹងទទួលជ័យជម្នះ។ យើងត្រូវតែរៀនពីកំហុសរបស់យើង ហើយខ្ញុំប្រាកដថា យើងនឹងធ្វើវាបាន។ ក្នុងការប្រកួតបន្ទាប់ យើងនឹងធ្វើបានល្អជាងនេះ។ យើងមានឱកាសពីរបីដង ក្នុងការរកគ្រាប់បាល់ ប៉ុន្តែយើងធ្វើមិនបានសម្រេច។ យើងមានកីឡាករល្អ និងមានគុណភាពក្នុងក្រុម ដូច្នេះខ្ញុំប្រាកដថា យើងនឹងរកគ្រាប់បាល់បានក្នុងការប្រកួតបន្ទាប់»។ ការលើកឡើងរបស់ កីឡាករសញ្ជាតិអាហ្វហ្គានីស្ថានរូបនេះ ក៏ចាត់ទុកជាការពញាក់អារម្មណ៍កីឡាករក្នុងក្រុមអោយបង្កើនសមត្ថភាពផងដែរ ដើម្បីកុំអោយមើលស្រាលគូប្រកួត។
Mustafa Zazai បានបន្ថែមទៀតថា ៖«ខ្ញុំគិតថា វាដូចជាឆាប់ពេក ដែលនិយាយថា ក្រុមណានឹងឈ្នះពាននៅឆ្នាំនេះ។ សម្រាប់ខ្ញុំ ខ្ញុំជឿថា វានឹងក្លាយជារដូវកាលដ៏តានតឹង។ ព្រះខ័នរាជស្វាយរៀង នឹងបាត់បង់ពិន្ទុនៅឆ្នាំនេះ ដូច្នេះខ្ញុំនៅតែជឿជាក់លើក្រុមរបស់ខ្ញុំ។ យើងមានក្រុមខ្លាំងមួយដើម្បីប្រជែងជើងឯក»។
កីឡាករវ័យ ២៨ឆ្នាំរូបនេះបានឈានចូលរដូវកាលទី៣ ក្នុងការប្រកបអាជីពបាល់ទាត់នៅលីគកំពូលរបស់កម្ពុជា ហើយបានលេងឲ្យក្លិប៣ផ្សេងគ្នាដូចជា ភ្នំពេញក្រោន វិសាខា និងបច្ចុប្បន្នបឹងកេត។ ថ្វីដ្បិតតែជាជនបរទេស តែលោកបានសាងស្នាដៃជាច្រើន នៅក្នុងវិស័យបាល់ទាត់កម្ពុជា រហូតធ្វើអោយមានការទទួលស្គាល់ពីកេរ្តិ៍ឈ្មោះរបស់លោកនៅក្នុងវិស័យមួយនេះ។ ជាមួយនឹងបទពិសោធន៍នៅបាល់ទាត់កម្ពុជា រូបគេអាចសម្របខ្លួនបានយ៉ាងលឿននៅបឹងកេត ខណៈដែលទទួលបានការសរសើរពី លោកគ្រូ គឹម ភក្តី ចំពោះទម្រង់លេងប្រយុទ្ធដែលសក្តិសមនឹងទម្រង់លេងរបស់ខ្លួន។
«ខ្ញុំបានសម្របខ្លួនយ៉ាងលឿនជាមួយក្រុមរបស់ខ្ញុំ ហើយខ្ញុំមានអារម្មណ៍ល្អណាស់នៅទីនេះ។ គ្រូបង្វឹករបស់យើងចូលចិត្តលេងប្រយុទ្ធ ហើយខ្ញុំចូលចិត្តរឿងនោះដែរ។ វាសក្តិសមនឹងស្ទីលបាល់ទាត់របស់ខ្ញុំ»។Mustafa Zazai ត្រូវបានផ្លាស់ប្ដូរចេញអំឡុងពេលចាញ់ព្រះខ័នរាជស្វាយរៀង ៤-០ កាលពីសប្តាហ៍មុន ហើយគេអាចនឹងជាមន្ទិលសម្រាប់ការប្រកួតរវាង បឹងកេត ជាមួយ អង្គរថាយហ្គឺរ នៅចុងសប្តាហ៍នេះ៕
ចែករំលែកព័តមាននេះ