ស្ទឹងអូរច្រាមានទឹកហូរខួបប្រាំងខួបវស្សាក្លាយទៅជាទីកម្សាន្ដដ៏ពេញនិយម

ថ្ងៃទី ០២ ខែ កញ្ញា ឆ្នាំ ២០១៦
ម៉ោង ០៨:៥៥
bopha bopha

ខេត្ដប៉ៃលិន ៖ ទឹកហូរមិនជ្រៅប៉ុន្មានទេនៅក្រោមស្ពានអូរច្រា ហៅស្ពានតារៀប ក្នុងភូមិអូរច្រា សង្កាត់ទួលល្វា ក្រុងប៉ៃលិន បានក្លាយទៅជាកន្លែងកម្សាន្ដពេញនិយម ។ អ្នកទេសចរជាច្រើននាំគ្នាជិះកង់ ម៉ូតូ អ្នកខ្លះទៀត បើកបររថយន្តដឹកក្រុមគ្រួសារ សាច់ញាតិ បងប្អូន ទៅងូតទឹកលេងយ៉ាងសប្បាយរីករាយ។ មិនត្រឹមតែប៉ុណ្ណោះមានអ្នកខ្លះទៀតយកកញ្ច្រែង និងដែកស្បែងទៅអង្គុយជីកដីរែងរកត្បូងទៀតផង ។ ជុំវិញមាត់ស្ទឹង អ្នកភូមិបាននាំគ្នាកាប់ឆ្ការព្រៃ សង់ជារោងដាក់លក់ម្ហូបអាហារ និងភេសជ្ជៈសម្រាប់អ្នកទេសចរ ។

អ្នកទេសចរដែលនាំគ្នាទៅងូតទឹកស្ទឹងស្ពានតារៀបកាលពីពេល ថ្មីៗកន្លងមកនិយាយថា បច្ចុប្បន្ននេះជារៀងរាល់ល្ងាច អ្នករស់នៅក្រុងប៉ៃលិន តែងតែនាំគ្នាទៅលេងកម្សាន្ដនៅក្នុងស្ទឹង ក្រោមស្ពានតារៀប ដែលមានទឹកហូរធ្លាក់ពីលើភ្នំខៀវ ឆ្លងកាត់សង្កាត់បយ៉ាខា ហូរធ្លាក់ឆ្ពោះរហូតទៅដល់ខេត្តបាត់ដំបងឯណោះ ។ បើគេសង្កេតមើលខាងក្រោមស្ពាន អ្នកខ្លះយករថយន្តទៅលាងក្នុងស្ទឹង ខ្លះចុះងូតទឹកលេង ។ ចំណែក ខ្លះទៀតជីកដីរែងត្បូងយ៉ាងសប្បាយរីករាយ បើទោះបីជាបានកម្ទេច តូចៗ ក៏ដោយ ក្នុងនោះមានជនជាតិកូរ៉េពីរបីនាក់ផងដែរ ។

ចំណែកអ្នកទេសចរក្នុងស្រុក និងពីខេត្ត ឆ្ងាយៗ ក៏ទៅសម្រាកលេងនៅតាមរោង ដែលគេសង់ក្បែរមាត់ស្ទឹង ដើម្បីទទួលទានម្ហូបអាហារ និងគ្រឿងភេសជ្ជៈ ជួបជុំមិត្តភក្តិ រហូតដល់ពេលល្ងាច ទើបនាំគ្នាត្រឡប់ទៅផ្ទះរៀងៗខ្លួនវិញ ។ ម្យ៉ាងទៀតនៅសងខាងស្ទឹង អាជ្ញាធរខេត្ត បានសាងសង់ផ្លូវ ដើម្បីងាយស្រួលធ្វើដំណើរទៅដើរលេងកម្សាន្ដ។

បើតាមអ្នកលក់ដូរនៅក្បែរមាត់ស្ទឹង ឱ្យដឹងថា ការលក់ដូរនៅក្បែរស្ពានអូរច្រានេះកាក់កបរាល់ថ្ងៃ ជាពិសេសថ្ងៃសៅរ៍ និងថ្ងៃអាទិត្យ មានអ្នកទេសចរទៅអង្គុយលេង និងទិញម្ហូបអាហារទទួលទានពេញៗ រោង ។ លើសពីនេះនៅរដូវបុណ្យចូលឆ្នាំចិន ចូលឆ្នាំខ្មែរ និងរដូវភ្ជុំបិណ្ឌវិញ មានភ្ញៀវច្រើនអង្គុយលេងកម្សាន្ដមើលទឹកហូរក្រោមស្ពានតារៀប។

បច្ចុប្បន្នស្ពានអូរច្រា ក្លាយទៅជាកន្លែងរមណីយដ្ឋានទៅហើយ ។ នៅក្នុងស្ទឹងមួយនេះទឹកហូរខួបប្រាំង ខួបវស្សា សូម្បីទឹកធ្លាក់ភ្នំខៀវរីងខះអស់នៅរដូវប្រាំង ក៏ទឹកស្ទឹងមួយនេះអត់រីងដែរ ព្រោះមានប្រភពទឹកហូរធ្លាក់ពីប្រទេសថៃ ៕