មកដឹងពីប្រាក់រង្វាន់កីឡាករវាយកូនឃ្លីលើតុពេលឈ្នះការប្រកួតស៊ីហ្គេម
- ភ្នំពេញ
រាជធានីភ្នំពេញ ៖ ឯកឧត្តមនាយឧត្តមសេនីយ៍ គៀត ច័ន្ទថារិទ្ធ ប្រធានសហព័ន្ធកីឡាវាយកូនឃ្លីលើតុកម្ពុជា និង
រាជធានីភ្នំពេញ ៖ ឯកឧត្តមនាយឧត្តមសេនីយ៍ គៀត ច័ន្ទថារិទ្ធ ប្រធានសហព័ន្ធកីឡាវាយកូនឃ្លីលើតុកម្ពុជា និងសមាជិកប្រតិបត្តិ បានឯកភាពផ្តល់ប្រាក់រង្វាន់លើកទឹកចិត្ត សម្រាប់ការចូលរួមប្រកួតកីឡាស៊ីហ្គេម លើកទី៣១ នាខែឧសភា ឆ្នាំ២០២២ នៅប្រទេសវៀតណាម។
ថ្លែងក្រោយបញ្ចប់កិច្ចប្រជុំប្រចាំត្រីមាសទី១ កាលពីល្ងាចថ្ងៃទី១៦ ខែមីនា ឆ្នាំ២០២២ នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) លោក ស៊ុន សុទ្ធារិទ្ធ អគ្គលេខាធិការ សហព័ន្ធកីឡាវាយកូនឃ្លីលើតុកម្ពុជាមានប្រសាសន៍ថា សម្រាប់កីឡាករ ដែលប្រកួតវិញ្ញាសាឯកត្តជន ឈ្នះ១ប្រកួត នឹងទទួលបាន ២០០ដុល្លារ ឈ្នះ២ប្រកួត ៤០០ដុល្លារ និងគុណឡើងតាមការយកឈ្នះការប្រកួតនីមួយៗ ។ រីឯសម្រាប់វិញ្ញាសាជាក្រុម បើឈ្នះ១ប្រកួត ផ្តល់ប្រាក់រង្វាន់ ១ពាន់ដុល្លារ ឈ្នះ២ប្រកួតបាន ៣ពាន់ដុល្លារ ហើយបើឈ្នះបន្តទៀតនឹងគុណទ្វេដង ហើយបើឈ្នះមេដាយមាស សហព័ន្ធនឹងផ្តល់ជូនប្រាក់រង្វាន់ចំនួន១ម៉ឺនដុល្លារ។
លោកបន្ថែមថា នេះជាការលើកទឹកចិត្តរបស់ឯកឧត្តមប្រធាន រួមទាំងសមាជិកគណៈកម្មាធិការប្រតិបត្តិសហព័ន្ធ ដល់ក្រុមជម្រើសជាតិវាយកូនឃ្លីលើតុកម្ពុជា ឲ្យខិតខំប្រឹងប្រែងអស់ពីលទ្ធភាព ក្នុងការប្រជែងលទ្ធផលល្អជូនជាតិ។ នេះជាការយកចិត្តទុកដាក់ខ្ពស់របស់ឯកឧត្តម គៀត ច័ន្ទថារិទ្ធ ក៏ដូចជាសមាជិកទាំងអស់ ដើម្បីសម្រួចគោលដៅកសាងកំណត់ត្រាថ្មីមួយ ក្នុងស៊ីហ្គេម ២០២២ មុនឆ្ពោះមកស៊ីហ្គេម ឆ្នាំ២០២៣ នៅកម្ពុជា។
«នេះជាភាពជោគជ័យថ្មីមួយ ដែលសហព័ន្ធបានស្នើ និងឯកភាពគ្នាបង្កើតមូលនិធិស្ម័គ្រចិត្ត ដោយក្នុង១ខែៗ ទទួលបានប្រាក់ឧបត្ថម្ភចំនួន៣ពាន់ដុល្លារសហរដ្ឋអាមេរិក សម្រាប់ប្រើប្រាស់ក្នុងដំណើរការអភិវឌ្ឍរបស់ខ្លួន ឆ្ពោះទៅរកកំណត់ត្រាជាប្រវត្តិសាស្ត្រថ្មីមួយ ក្នុងឋានៈជាម្ចាស់ផ្ទះ ស៊ីហ្គេម ២០២៣ ជាប្រវត្តិសាស្ត្រដំបូងរបស់កម្ពុជា»។
លោកអគ្គលេខាធិការរូបនេះបញ្ជាក់ជូនថា ក្រៅពីការសម្រេចផ្តល់ជូនប្រាក់រង្វាន់លើកទឹកចិត្តនេះ សហព័ន្ធក៏បានសម្រេចលើ២របៀបវារៈផ្សេងទៀតដែរ គឺការពិនិត្យលើរបាយការណ៍វឌ្ឍនភាពការងារ ដែលធ្វើកន្លងមក និងការងារអញ្ជើញគ្រូបង្វឹកកូរ៉េខាងត្បូងម្នាក់ មកជួយបង្វឹកដល់ក្រុមជម្រើសជាតិវាយកូនឃ្លីលើតុកម្ពុជា ដើម្បីសម្រួចគោលដៅឆ្ពោះទៅរៀបចំធ្វើជាម្ចាស់ផ្ទះ ការប្រកួតកីឡាស៊ីហ្គេម លើកទី៣២ ឆ្នាំ២០២៣។«គ្រូបង្វឹកជនជាតិកូរ៉េ ដែលគ្រោងនាំយកមកជួយបង្ហាត់ក្រុមជម្រើសជាតិនេះ គឺមានគុណវុឌ្ឍិកម្រិតខ្ពស់។
ខ្ញុំជឿជាក់ថា គ្រូបង្វឹករូបនេះ នឹងជួយបង្កើនគុណភាពក្រុមជម្រើសជាតិកម្ពុជា ឲ្យកាន់តែរឹងមាំ ក្នុងការសម្រួចបច្ចេកទេសបានលឿន សម្រាប់គោលដៅស៊ីហ្គេម២០២៣» ។ ជាមួយគ្នានោះ លោក ស៊ុន សុទ្ធារិទ្ធ ក៏បានបញ្ជាក់បន្ថែមទៀតថា ក្នុងសហព័ន្ធបានឯកភាពរួចហើយ ដោយនៅតែរង់ចាំការសម្រេចជាគោលការណ៍ ពីសម្តេចពិជ័យសេនា ទៀ បាញ់ ប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) ប៉ុណ្ណោះ។ ក្រោយការសម្រេចពីសម្តេចប្រធាន CAMSOC ភ្លាម សហព័ន្ធនឹងធ្វើការងារនេះឲ្យបានលឿនជាមួយសហព័ន្ធកីឡាវាយកូនឃ្លីលើតុកូរ៉េខាងត្បូង ដើម្បីសម្របសម្រួលលើកិច្ចការអញ្ជើញគ្រូបង្វឹកកម្រិតខ្ពស់រូបនេះ ៕
ចែករំលែកព័តមាននេះ