រាជធានីភ្នំពេញ ៖ កីឡាករកម្ពុជា២រូបគឺរិន សារ័ត្ន មកពីក្លិបខេត្តព្រៃវែង និងសែន រ៉ាដេត មកពីក្លិបអប្សរាគុនខ្មែរ ត្រូវបានគេផ្គូផ្គងឱ្យជួបប្រកួតជាមួយកីឡាករថៃនៅលើសង្វៀនទូរទស្សន៍CTN នាថ្ងៃសៅរ៍ ទី៣ កញ្ញា ខាងមុខនេះ ។
រិន សារ័ត្ន ប្រកួតបាន១៦ដង ឈ្នះ១២ដង ចាញ់៤ដង និងធ្លាប់ផ្ដួលគូប្រកួតឱ្យសន្លប់៦ដង នឹងជួបប្រកួតក្នុងប្រភេទទម្ងន់៦៥គីឡូក្រាមជាមួយកីឡាករថៃឈ្មោះ Phun
Mongkhun ដែលមានប្រវតិ្តប្រកួត៧០ដង ឈ្នះ៥០ដង ចាញ់១៨ដង ស្មើ២ដង និងធ្លាប់ផ្ដួលគូប្រកួតឱ្យសន្លប់៥ដង ។ ទោះបី រិន សារ័ត្ន មានប្រវត្តិប្រកួតតិចជាងកីឡាករថៃពិតមែន តែអ្នកគាំទ្រនៅតែទុកចិត្តលើកីឡាកររូបនេះដដែល ដោយសារតាមការសង្កេតការប្រកួត កន្លងមក អ្នកប្រដាល់មកពីខេត្តព្រៃវែងរូបនេះ មានសមត្ថភាពមិនអន់នោះទេទើបកម្រមានអ្នកណាផ្ដួលគេបាន ។ ទោះបីយ៉ាងណា ដោយសារតែកីឡាករទាំង២មិនធ្លាប់ប៉ះគ្នាពីមុនមកទើប គេពិបាកប៉ាន់ស្មានថា អ្នកណាខ្លាំងជាងអ្នកណា។
ចំណែក សែន រ៉ាដេត ប្រកួតបាន៤៨ដង ឈ្នះ៤០ដង ចាញ់៨ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន១៣ដង នឹងជួបប្រកួតក្នុងប្រភេទទម្ងន់៥១គីឡូក្រាមជាមួយកីឡាករថៃឈ្មោះPhet Sakunដែលមានប្រវត្តិប្រកួត៨៧ដង ឈ្នះ៦៧ដង ចាញ់១៧ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន៧ដង ។ ទោះបីសែន រ៉ាដេត មានប្រវត្តិប្រកួតតិចជាងកីឡាករថៃដាច់ឆ្ងាយបន្តិចមែន តែអ្នកនិយមទស្សនាកីឡាប្រដាល់នៅតែមានជំនឿចិត្តលើកីឡាករកម្ពុជារូបនេះដដែល ព្រោះក្នុងចំណោមអ្នកប្រដាល់ទម្ងន់ស្រាលដូចគ្នា អត់ទាន់មានអ្នកណាទៅរួចជាមួយគេនៅឡើយ។ សែន រ៉ាដេត មានល្បិចប្រយុទ្ធខ្លាំងពេញខ្លួន ចិត្តក៏សឿង រីឯចលនាវាយចេញកាន់តែរហ័សនិងមិនចេះក្អេងក្អាងដាក់គូប្រកួតទៀតផង។ ជាពិសេសសម្រាប់ការប្រកួតលើកនេះតែម្ដង ដោយសារតែមិនធ្លាប់ស្គាល់ប្រវត្តិគូប្រកួតច្បាស់ទើបគេកាន់តែប្រុងប្រយ័ត្នជាងមុនថែមទៀត ។ ចាំមើល សែន រ៉ាដេត អាចបង្ក្រាបអ្នកប្រដាល់ឆ្លងដែនមកពីថៃរូបនោះបានឬអត់?
ក្រៅពីគូអន្តរជាតិ នៅលើសង្វៀនដដែលក៏មានការប្រកួតមិត្តភាពរវាងកីឡាករក្នុងស្រុក ជាច្រើនគូទៀតដូចជា កីឡាករ ងឿន វិចិត្រមកពីក្លិបសុភានូមានជ័យ ប្រកួតជាមួយកីឡាករ យ៉ន ពិសី មកពីក្លិបសាលវ័ន្តកីឡា ។ កីឡាករ ខុន បូឡា មកពីក្លិបកងពលតូចអន្តរាគន៍លេខ៨ភ្នំទ្រព្យ ប្រកួតជាមួយកីឡាករ សល់ ប៊ុនអុីមមកពីក្លិបកុសលកីឡា និងគូចុងក្រោយកីឡាករ ជឹម ចិត្រា មកពីក្លិបខ្លារខិនមានរិទ្ធ ប្រកួតជាមួយកីឡាករ សុខ ចិន្ដា មកពីក្លិបឃ្លាំងមឿងកីឡា ៕
ចែករំលែកព័តមាននេះ