បន្ទាយមានជ័យ៖ ករណីជាតិជនចិន ១ក្រុម មានជិត ២០នាក់ បាន​ម្រុកចូល ក្នុងហាង វ៉ៃបុរសចិន ដែលមាន​ប្រពន្ធខ្មែរ។ ក្នុងហេតុការណ៍ កាលពីដើមខែមីនានោះ គឺ​ចាប់បានសន្តិសុខម្នាក់ ជាជនជាតិខ្មែរ ដែលបក្ខពួក​ក្រុមជនជាតិចិននោះ។ ប៉ុន្តែរហូតដល់ពេលនេះ ជន​រងគ្រោះ ដែលបុរសចិន ជាប្តី និងប្រពន្ធខ្មែរ បានទាមទារ​សំណង ៥០ម៉ឺនដុល្លារ ​តែមិនទាន់ដោះស្រាយចេញទេ ដោយសារតែក្រុមជនជាតិចិន ដែលបង្ករឿង កំពុងរត់គេចខ្លួន​។

គួររំលឹកថា កាលពីថ្ងៃទី០២ ខែមីនា ឆ្នាំ២០២២ នៅចំណុចភូមិក្បាលស្ពានមួយ សង្កាត់.ក្រុងប៉ោយប៉ែត មានជនជាតិចិន ១ក្រុម និងសន្តិខ្មែរប្រមាណជិត ២០នាក់ បានចម្រុកចូលក្នុងហាងសំអាងការ និងកាត់សក់ ហើយបានចូលវ៉ៃទៅម្ចាស់ហាង ដែលជាបុរសជនជាតិចិន និងប្រពន្ធជាជនជាតិខ្មែរ មានផ្ទៃពោះ បណ្តាលឱ្យ​រង​របួស។

​ជនរងគ្រោះ ២នាក់ប្តីប្រពន្ធ បានបញ្ជាក់ថា ជនជាតិចិន ១ក្រុម រួមជាមួយសន្តិសុខប្រមាណជិត ២០នាក់នោះ បានសម្រុកចូល​ក្នុងហាង ហើយវ៉ៃលើប្តី ជាបុរសចិន និងមានបំណងអូសបុរសនោះ ចូលឡាន យកទៅវ៉ៃ នៅកន្លែងពួកគេ។ ក្រុមជនជាតិចិននោះ ក៏បានវ៉ៃលើស្ត្រីជនជាតិខ្មែរ ជាប្រពន្ធរបស់ចិន ដែល​មានផ្ទៃពោះ។

ក្រោយហេតុការណ៍ រងរបួសនោះ ប្តីប្រពន្ធ ដែលមានប្តីជាជនជាតិចិន និងប្រពន្ធ​ ជាជនជាតិខ្មែរ បានទៅប្តឹង​កម្លាំង​សមត្ថ​កិច្ច ​មានស្ថាប័នប៉ូលិសក្រុង និងប៉េអឹម ដើម្បីជួយរកយុត្តិធម៌ និងចាប់ខ្លួនជនបង្ក មកផ្ទន្ទាទោសតាមច្បាប់។

កម្លាំងនគរបាលក្រុងប៉ោយប៉ែត បានដឹងថា ក្រោយទទួលពាក្យបណ្តឹង​ពីជនរងគ្រោះ ២នាក់ ប្តីប្រពន្ធ ដែលត្រូវ​ជន​ជាតិចិនប្រមាណជិត ២០នាក់ ប្រើហឹង្សា ដោយចេតនា បណ្តាលឱ្យ​របួសស្នាមរួចមក កម្លាំង​ជំនាញ បាន​ស្រាវ​ជ្រាវ ៣ថ្ងៃ ក៏​​ឃាត់ខ្លួន​សន្តិសុខខ្មែរម្នាក់ ដែល​ចូលរួម​ប្រើ​ហឹង្សាជាមួយក្រុមជនជាតិ​ចិនទាំងនោះ ហើយបានកសាងសំណុំរឿង បញ្ជូនទៅសាលាដំបូង​ខេត្តបន្ទាយមានជ័យ ដើម្បី​ចាត់​ការតាមច្បាប់។ ​ចំណែបក្ខពួកផ្សេងទៀត បានរត់គេចខ្លួន ហើយប៉ូលិស​កំពុងស្រាវជ្រាវចាប់។

ប្រភពព័ត៌មានឱ្យដឹងថា ​ករណីជនជាតិចិន ១ក្រុម រួមជាមួយសន្តិសុខ ដែលសម្រុកចូលក្នុងហាង វ៉ៃទៅលើ​គ្រួសារ ដែលមាន​ប្តី ជាជនជាតិចិន និង​ប្រពន្ធខ្មែរនេះ គឺ​ជនរងគ្រោះ ក៏បានប្តឹងចូល​បញ្ជាការដ្ឋានកងរាជ​អាវុធហត្ថ ក្រុងប៉ោយប៉ែត ដើម្បីទាមទារសំណងពីជនបង្កហឹង្សាចំនួន ៥០ម៉ឺនដុល្លារ ដើម្បី​សង​ថ្លៃរបួសស្នាម និងខូចខាតសម្ភារៈ ក្នុងហាង និងបុគ្គលិករងរបួស​។​ តែ​​​​មក​​ដល់​ពេលនេះ មិនទាន់​ដោះស្រាយ​នៅឡើយ​ទេ៕ ប៊ុន ធឿន​