ស្ត្រីមានផ្ទៃពោះគប្បីយល់ពីបញ្ហាសុកពាំងមាត់ស្បូន
រាជធានីភ្នំពេញ ៖ ដកស្រង់ប្រសាសន៍កញ្ញាវេជ្ជបណ្ឌិត លី ឈីអៀង ឯកទេសសម្ពពរោគស្ត្រី និងអេកូសាស្ត្រនៃមន្ទីរពេទ្យកាល់ម៉ែត បានធ្វើការកត់សម្គាល់ថា ជាទូទៅទីតាំងរបស់សុកតាមធម្មតា
រាជធានីភ្នំពេញ ៖ ដកស្រង់ប្រសាសន៍កញ្ញាវេជ្ជបណ្ឌិត លី ឈីអៀង ឯកទេសសម្ពពរោគស្ត្រី និងអេកូសាស្ត្រនៃមន្ទីរពេទ្យកាល់ម៉ែត បានធ្វើការកត់សម្គាល់ថា ជាទូទៅទីតាំងរបស់សុកតាមធម្មតា គឺស្ថិតនៅកំពូលនៃស្បូន ឬមុខចំហៀងនៃស្បូន និងឆ្ងាយពីមាត់ស្បូន ។ សុកពាំងមាត់ស្បូន គឺជាការតាំងនៅរបស់សុកនៅនឹងមាត់ស្បូន ឬក្បែរមាត់ស្បូន ។ អត្រានៃសុកពាំងមាត់ស្បូនមានពី0,9ទៅ2,6% នៃផ្ទៃពោះ និងការបង្ហាញក្នុងទម្រង់ធ្លាក់ឈាមពេលមានផ្ទៃពោះ (Forme hémorragique) មានពី 0,28 ទៅ 0,50 % ។
ក-តើមានមូលហេតុអ្វីខ្លះដែលបណ្តាលឱ្យមានជំងឺនេះ? គេពុំរកឃើញមូលហេតុពិតប្រាកដណាមួយ ដែលបណ្តាលឱ្យមានជំងឺនេះទេ ប៉ុន្តែមានកត្តាជាច្រើនដែលបង្កឱ្យសុកនៅទីតាំងខុសប្រក្រតី ។
កត្តានោះមានដូចជា៖
-ប្រវត្តិសុកពាំងមាត់ស្បូន Antécédents de placenta praevia
– ម្តាយមានកូនច្រើន (Multiparité)
– ម្តាយមានអាយុច្រើន (Age maternel avancé)
-ប្រវត្តិវះកាត់កូនលើកមុន (Antécédents de césarienne)
-ប្រវត្តិបូមសំអាតកូន Antécédents d’aspiration endo-utérine (ការរលូត ឬការរំលូតកូន)
-ប្រវត្តិរលាកភ្នាសក្នុងនៃស្បូន (Antécendents d’endométrites)
-កូនភ្លោះពីរឬច្រើន (Grossesses multiples)
-ដុំស្បូន (Fibrome sous-muqueux) ភាពមិនប្រក្រតីនៃស្បូន (Maformation utérine)
-បារី (Tabac)
ខ-តើមានរោគសញ្ញាគ្លីនិក និងអមគ្លីនិក អ្វីខ្លះ ដែលអាចបញ្ជាក់ថា ស្ត្រីមានសុកពាំងមាត់ស្បូន? ពេលខ្លះស្ត្រីអាចពុំមានរោគសញ្ញាអ្វីទាំងអស់ និងរកឃើញដោយចៃដន្យពេលធ្វើអេកូផ្ទៃពោះ ។
ករណីខ្លះអាចស្តែងចេញជារោគសញ្ញាមួយចំនួនដូចខាងក្រោម៖
-ការធ្លាក់ឈាមភ្លាមៗ ពណ៌ក្រហមស្រស់ និងជាទូទៅកើតមានច្រើនដងពេលពពោះ (Hémorragie récidivante) ហើយពុំមានការឈឺពោះ (Indolores) ។
-អាចឱ្យស្ត្រី មានភាពស្លេកស្លាំង ជីពចរដើរញាប់ សំពាធឈាមទាប ក្នុងករណីមានការធ្លាក់ឈាមច្រើន ។
-អាចមានការកន្ត្រាក់ ឬចំកោងស្បូនចុករោយចង្កេះ
-ស្ត្រីពុំមានប្រវត្តិលើសឈាមពេលពពោះ
-អេកូផ្ទៃពោះ អាចបញ្ជាក់ច្បាស់ពីទីតាំងរបស់សុក ទម្រង់កូន សុខភាពកូន
-ការតាមដានចង្វាក់បេះដូងកូន (Monitoring foetal) ដើម្បីដឹងពីស្ថានភាពរបស់កូន ។
គ-តើមានការព្យាបាលដូចម្តេចខ្លះ?
១-ក្នុងករណីពុំមានការធ្លាក់ឈាមក្នុងពេលអំឡុងពពោះ
-ស្ត្រីត្រូវមកពិនិត្យតាមដានផ្ទៃពោះឱ្យបានទៀងទាត់ និងពិនិត្យអេកូផ្ទៃពោះ តាមការណាត់ជួបរបស់វេជ្ជបណ្ឌិត
-ស្ត្រីត្រូវសម្រាកឱ្យបានច្រើន ជៀសវាងការធ្វើដំណើរផ្លូវឆ្ងាយ
-ស្ត្រីត្រូវត្រៀមខ្លួនក្នុងការវះកាត់យកកូនពេលផ្ទៃពោះគ្រប់ខែ ប្រសិនបើសុកពាំងចំមាត់ស្បូនឬចំផ្នែកខ្លះនៃមាត់ស្បូន។
-ស្ត្រីត្រូវមកមន្ទីរពេទ្យជាបន្ទាន់ប្រសិនបើមានការធ្លាក់ឈាមឬមានការកន្ត្រាក់នៃស្បួន។
២-ក្នុងករណីមានការធ្លាក់ឈាម
-ស្ត្រីត្រូវសម្រាកនៅមន្ទីរពេទ្យ (Hospitalisation)
-ជៀសវាងការធ្វើចលនា (Repos strict au lit)
-តាមដានសម្ពាធឈាម ជីពចរ និងការធ្លាក់ឈាមរបស់ម្តាយ
-តាមដានចង្វាក់បេះដូងកូននិងការកន្ត្រាក់របស់ស្បូន (monitoring fœtal)
-ប្រើថ្នាំបញ្ឈប់ការកន្ត្រាក់របស់ស្បូន និងប្រើថ្នាំបន្ទុំសួតកូន ក្នុងករណីផ្ទៃពោះអាយុតិចជាង៣៤សប្តាហ៍
-ត្រៀមវះកាត់យកកូន (Césarienne programmée) ពេលផ្ទៃពោះគ្រប់ខែ
-ប្រសិនបើស្ត្រីធ្លាក់ឈាមខ្លាំង ឬកូនខ្សោយ ត្រូវធ្វើការវះកាត់យកកូនជាបន្ទាន់ (Césarienne en urgence) ។
ឃ-អនុសាសន៍សម្រាប់ស្ត្រីមានផ្ទៃពោះសុកពាំងមាត់ស្បូន គឺជាជំងឺមួយដែលអាចបណ្តាលឱ្យមានគ្រោះថ្នាក់ដល់ម្តាយនិងកូន ដោយស្ត្រីអាចប្រឈមនឹងការធ្លាក់ឈាមធ្ងន់ធ្ងរភ្លាមៗដែលអាចប៉ះពាល់ដល់អាយុជីវិត ឬបង្កឱ្យមានភាពស្លេកស្លាំងខ្លាំង និងមានការបង្ករោគ ព្រមទាំងសម្រាលបុត្រមិនគ្រប់ខែ ។
ក្នុងករណីស្ត្រីមានរោគសញ្ញាណាមួយដូចរៀបរាប់ខាងលើ ស្ត្រីត្រូវតែរួសរាន់មកមន្ទីរពេទ្យ ដើម្បីទទួលការពិនិត្យនិងព្យាបាលឱ្យទាន់ពេលវេលាតាមបច្ចេកទេស ជាពិសេសនៅមន្ទីរពេទ្យកាល់ម៉ែត ដែលមានទាំងគ្រូពេទ្យជំនាញ និងឧបករណ៍បច្ចេកវិទ្យាវេជ្ជសាស្ត្រគ្រប់គ្រាន់ដើម្បីសង្គ្រោះម្តាយ និងទារក ៕
ចែករំលែកព័តមាននេះ