រាជធានីភ្នំពេញ ៖ អាជីវករផ្សារប៉េសេដែលមានទីតាំងនៅក្នុងសង្កាត់បឹងទំពុន ខណ្ឌមានជ័យ ប្រមាណជា១០០នាក់ បាននាំគ្នាកាន់បដាពាក្យស្លោកមុខវត្តបទុមវតី កាលពីព្រឹកថ្ងៃទី២៨ មករា ២០១១ ប្រយោជន៍សុំកិច្ចអន្តរាគមន៍ពីសម្តេចតេជោហ៊ុន សែន ជួយបញ្ចុះតំលៃជួលតូប និងការគំរាមកំហែងពីម្ចាស់ផ្សារ ។ អាជីវករមួយរូបដែលភ័យខ្លាចអំណាចម្ចាស់ផ្សារប៉េសេ សុំមិនបញ្ចេញឈ្មោះបាននិយាយថា គាត់បានចូលទៅជួលតូបលក់ដូរក្នុងផ្សារប៉េសេ តាំងពីទើបដំណើរការមុនដំបូងនៅឆ្នាំ២០០៨ មិនទាន់មានមនុស្សចេញ-ចូលអ៊ូអរ ហើយការលក់ដូរពេលខ្លះលក់ដាច់ ពេលខ្លះលក់មិនបានមួយរៀលផង ប៉ុន្តែចេះតែទ្រាំលក់ទៅធ្វើម៉េចបើជ្រុលប្រកបរបរលក់ដូរទៅហើយ ។
ទោះជាបែបណាក៏ដោយ ម្ចាស់ផ្សារប៉េសេ ដែលមានងារជាឧកញ៉ាពុំមានមនោសញ្ចេតនាជាមួយអាជីវករនោះទេ គឺពីមួយខែទៅមួយខែ ពីមួយឆ្នាំទៅមួយឆ្នាំ ចេះតែដំឡើងថ្លៃតូប ខណៈពេលអាជីវករលក់មិនដាច់ ។ លុះដល់ឆ្នាំ២០១១ ម្ចាស់ផ្សារគេលេងកាន់តែខ្លាំងឡើងៗ ហើយបង្ខំឱ្យអាជីវករជួលតូបក្នុងតំលៃខ្ពស់ រួចធ្វើកិច្ចសន្យាតាមគោលការណ៍របស់ក្រុមហ៊ុន ដោយមិនអនុញ្ញាតឱ្យមានការតវ៉ានោះទេ ។
ដោយសារមិនឯកភាពក្នុងតំលៃជួលតូបនេះ បងប្អូនអាជីវករទាំងអស់នាំគ្នាដាក់ពាក្យសុំដោះស្រាយនៅភូមិ-សង្កាត់រហូតដល់សាលាខណ្ឌ ប៉ុន្តែការដោះស្រាយពុំទទួលបានលទ្ធផលជាដុំកំភួននោះទេ រីឯលោកអភិបាលខណ្ឌមានជ័យហាក់ដូចជាខ្លាចអំណាចម្ចាស់ផ្សារប៉េសេ បានត្រឹមតែគ្រវីក្បាលដូចស្រាំងទិចប៉ុណ្ណោះ ធ្វើឱ្យក្រុមអាជីវករអាណិតគាត់ណាស់ ។ ព័ត៌មានលំអិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព.
ចែករំលែកព័តមាននេះ