រាជធានីភ្នំពេញ ៖ បុរសម្នាក់ទំនងជាប្រចណ្ឌប្រពន្ធ ដោយចោទថា មានប្រុសផ្សេងហើយ បានផ្ទុះកំហឹងខ្ទប់មុខសម្លា.ប់ប្រពន្ធនៅក្នុងបន្ទប់ជួល រហូតដល់ហើមស្អុយទៅហើយដោយគ្មានអ្នកដឹង រួចក៏បានធ្វើដំណើរទៅស្រុកកំណើតខេត្តពោធិ៍សាត់ ទើបចូលសារភាពអោយសមត្ថកិច្ចនគរបាលប៉ុស្តិ៍ឃាត់ខ្លួន ដោយបន្សល់ទុកកូនស្រីតូចៗ៣នាក់អោយនៅកំព្រាឯកា ។ ហេតុការណ៍នេះ បានបង្កអោយមានការភ្ញាក់ផ្អើលកាលពីវេលាម៉ោងប្រមាណ៨ព្រឹកថ្ងៃទី១៥ ខែមីនា ឆ្នាំ២០២២ នៅចំណុចបន្ទប់ជួលលេខ០៦ ផ្លូវភ្នំពេញហាណូយខាងជើងផ្សារដីហុយ ស្ថិតក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ។
បុរសជាជនដៃដល់សម្លា.ប់ប្រពន្ធរូបនោះ ត្រូវបាននគរបាលអោយដឹងថា មានឈ្មោះ រ័ត្ន វិជ្ជាអាយុ៣៥ឆ្នាំ ជាបុគ្គលិកក្រុមហ៊ុនធើណេត្រមួយ ស្នាក់នៅកន្លែងកើតហេតុខាងលើ និងមានស្រុកកំណើតភូមិកណ្តាល ឃុំអន្លង់ត្នោត ស្រុកក្រគរ ខេត្តពោធិ៍សាត់ ហើយត្រូវបានសមត្ថកិច្ចឃាត់ខ្លួន នៅពេលជនដៃដល់រូបនេះចូលសារភាព។ ចំណែកនារីរងគ្រោះឈ្មោះ ហៀង សុជាតិ អាយុ២៨ឆ្នាំ មុខរបរមេដោះ (មើលកូនអោយគេ) ស្នាក់នៅមើលកូនអោយគេ នៅបុរី ពិភពថ្មី ស្ថិតក្នុងភូមិក្រុងថ្មី សង្កាត់គោកឃ្លាង ខណ្ឌសែនសុខ និងមានស្រុកកំណើតនៅភូមិ ស្វាយត្បូង ឃុំស្វាយ ខ្សាច់ភ្នំ ស្រុកស្រីសន្ធរ ខេត្តកំពង់ចាម ដែលត្រូវបុរសជាប្តីខ្ទប់មុខជាមួយនឹងខ្នើយសម្លា.ប់នៅក្នុងបន្ទប់ជួល ហើយសន្សល់ទុកនូវលិខិតបណ្តាំមួយសន្លឹក។
តាមស្ត្រីម្នាក់ឈ្មោះ ថៃ គី អាយុ៤៨ឆ្នាំ ត្រូវជាម្តាយស្ត្រីរងគ្រោះបានអោយដឹងថា កូនស្រីរបស់គាត់ត្រូវបានប្តីរបស់ខ្លួន (កូនប្រសា) សម្លា.ប់នៅក្នុងបន្ទប់ជួល ហើយឃា.តករ ដែលជាកូនប្រសាបានទៅសារភាពនៅស្រុកកំណើត។
តាមស្ត្រីជាម្តាយ បានអោយដឹងបន្តថា កាលពីថ្ងៃទី១១ ខែមីនា ឆ្នាំ២០២២ កូនប្រសាបានធ្វើដំណើរទៅផ្ទះដែលគាត់ស្នាក់នៅធ្វើការ នៅខណ្ឌទួលគោក ហើយក៏បានសុំគាត់នាំប្រពន្ធដើរលេង បន្ទាប់ក៏បាត់ដំណឹងរហូត ស្រាប់តែនៅវេលាម៉ោងប្រមាណ៦ព្រឹក ថ្ងៃទី១៥ ខែមីនា ឆ្នាំ២០២២នេះ នគរបាលស្រុកក្រគរ បានទូរស័ព្ទប្រាប់ថា កូនស្រីរបស់គាត់ត្រូវបានប្តីសម្លា.ប់ហើយ ប្តីដែលជាឃា.តកររូបនេះក៏បានចូលសារភាពនៅប៉ុស្តិ៍ក្រគរផងដែរ ។
តាមព័ត៌មានពីកន្លែងកើតហេតុបានអោយដឹងដែរថា ២នាក់ប្តីប្រពន្ធនេះបានស្នាក់នៅផ្សេងពីគ្នារយៈពេលប្រមាណ៣ខែមកហើយ ដោយបុរសជាប្តីក៏បានទៅជួលផ្ទះខាងលើស្នាក់នៅតែឯង។ លុះនៅល្ងាចថ្ងៃស្រុក ទី១១ ខែមីនា បុរសជាប្តីក៏បាននាំប្រពន្ធទៅលេងផ្ទះជួល ដោយពុំមាននណាម្នាក់ចាប់អារម្មណ៍អ្វីនោះឡើយ ។ លុះនៅថ្ងៃច័ន្ទ ទី១៤ ខែមីនា បុរសជាប្តីក៏បានធ្វើដំណើរទៅស្រុកតែឯង ហើយក៏ទៅសារភាព ទើបបង្កអោយមានការភ្ញាក់ផ្អើលតែម្តង ។
តាមព័ត៌មានអោយដឹងបន្តថា ២នាក់ប្តីប្រពន្ធខាងលើនេះ បានរៀបការជាមួយគ្នាតាំងពីឆ្នាំ២០១៤ ដោយមានកូនស្រី៣នាក់ ដែលកូនបងអាយុ៧ឆ្នាំ កូនទី២អាយុ៤ឆ្នាំ និងកូនពៅទី៣អាយុជាង១ឆ្នាំ។ ហើយដោយសារតែជីវភាព ស្ត្រីជាប្រពន្ធក៏បានចាកចេញពីស្រុកនៅខេត្តពោធិ៍ មករស់នៅភ្នំពេញបានប្រមាណជិត១ឆ្នាំ ដើម្បីមកធ្វើការជាមេដោះ។ លុះក្រោយមកប្តីក៏បានមកភ្នំពេញធ្វើការដែរ។
តាមព័ត៌មានដដែលអោយដឹងបន្តថា ការសម្លា.ប់ប្រពន្ធជាទីស្រលាញ់នេះ គឺសង្ស័យផ្តើមចេញពីទំនាស់គ្នារឿងប្រចណ្ឌ។ ហើយបន្ទាប់ពីភ្ញាក់ផ្អើល សមត្ថកិច្ចជំនាញក៏បានចុះទៅពិនិត្យស.ពស្ត្រីរងគ្រោះផងដែរ ហើយក៏បានរកឃើញសំបុត្របណ្តាំមួយសន្លឹករបស់ប្តីដែលបន្សល់ទុកផ្ញើរជួនម្តាយ បន្ទាប់ពីខ្ទប់មុខសម្លា.ប់ប្រពន្ធរួច ។
តាមលិខិតបណ្តាំដែលមានខ្លឹមសារថា «ថ្ងៃសៅរិ៍ទី១២ព្រឹក» «ជួយមើលថែកូនៗទាំងបីនាក់ផង, រឿងគ្រប់យ៉ាងមកពីអាប៉ុន យ៉ុង វាចូលជ្រៀតជ្រែកជីវិតប្តីប្រពន្ធខ្ញុំ, ខ្ញុំសុំទោស ប៉ាសុំទោសកូនៗ»។ តាមរយៈនៃសំបុត្រនេះ ទំនងស្ត្រីជាប្រពន្ធមានទំនាក់ទំនងជាមួយប្រុសផ្សេង ហើយបុរសជាប្តីប្រចណ្ឌក៏ឈានដល់ទៅមានទំនាស់ជាមួយនឹងគ្នា ហើយក៏ខ្ទប់មុខប្រពន្ធសម្លា.ប់តែម្តង ។
តាមព័ត៌មានអោយដឹងថា បន្ទាប់ពីសម្លា.ប់ប្រពន្ធរួច បុរសជាប្តីទំនងជាប៉ុនប៉ុងសម្លា.ប់ខ្លួនឯងផងដែរ។ ប៉ុន្តែទោះបីជាយ៉ាងណា កោះសន្តិភាពពុំទទួលបានការសារភាពណាមួយពីបុរសដែលជាឃា.តករសម្លា.ប់ប្រពន្ធនៅឡើយទេ។ ហើយនៅព្រឹកថ្ងៃទី១៥ ខែមីនា ឆ្នាំ២០២២នេះ ដែរ នគរបាលខណ្ឌសែនសុខ ក៏បានធ្វើដំណើរទៅទទួលយកជនដៃដល់ដែលជាឃា.តករ មកកសាងសំណុំរឿងចាត់ការតាមច្បាប់ហើយ។
គួររំលឹកថា ៖ ស្លុតចិត្ត! ផ្តាច់ជីវិតប្រពន្ធក្នុងបន្ទប់គ្មានអ្នកដឹង លុះ៣ថ្ងៃក្រោយផ្អើលពេលប្តីចូលសារភាព ។ គួររំលឹកទៀតថា ៖ រកឃើញពាក្យបណ្តាំមួយសន្លឹក ក្រោយផ្អើលឆោឡោសម្លា.ប់ប្រពន្ធក្នុងបន្ទប់ជួល ៕
ចែករំលែកព័តមាននេះ