រាជធានីភ្នំពេញ ៖ កម្មវិធីប្រកួតប្រដាល់ដណ្ដើមខ្សែក្រវាត់គោជល់នៅលើសង្វៀនទូរទស្សន៍PNN បានកែប្រែរូបមន្តប្រកួតចាប់ពីថ្ងៃអាទិត្យទី២៨ សីហា សប្ដាហ៍នេះតទៅ ដោយមានតែកីឡាករកម្ពុជា
រាជធានីភ្នំពេញ ៖ កម្មវិធីប្រកួតប្រដាល់ដណ្ដើមខ្សែក្រវាត់គោជល់នៅលើសង្វៀនទូរទស្សន៍PNN បានកែប្រែរូបមន្តប្រកួតចាប់ពីថ្ងៃអាទិត្យទី២៨ សីហា សប្ដាហ៍នេះតទៅ ដោយមានតែកីឡាករកម្ពុជាប៉ុណ្ណោះដែលត្រូវជួបគ្នានៅវគ្គផ្ដាច់ព្រ័ត្រដោយមិនមានវត្តមានកីឡាករថៃដូចការប្រកាសនៅថ្ងៃបើកឆាកប្រកួតនោះទេ ។
កាលពីថ្ងៃបើកឆាកដំបូង គណៈកម្មការរៀបចំការប្រកួតបានប្រកាសឱ្យដឹងពីរូបមន្តប្រកួតគឺចម្រាញ់យកកីឡាករកម្ពុជា១រូប និងថៃ១រូបដែលមានពិន្ទុច្រើនជាងគេឱ្យឡើងប្រកួតដណ្ដើមខ្សែក្រវាត់នៅវគ្គផ្ដាច់ព្រ័ត្រ ។ ប៉ុន្តែដោយសារកីឡាករថៃស្ទើរតែទាំងអស់មានរបួសបោះបង់ចោលការប្រកួត ទើបគណៈកម្មការរៀបចំការប្រកួតសម្រេចផ្លាស់ប្ដូររូបមន្តប្រកួតភ្លាមៗ ដោយមានតែកីឡាកម្ពុជា និងកម្ពុជាប៉ុណ្ណោះដែលត្រូវជួបគ្នានៅវគ្គផ្ដាច់ព្រ័ត្រ ។
នៅថ្ងៃអាទិត្យសប្ដាហ៍នេះកីឡាករ ឡេះ តើក មកពីក្លិបពុទ្ធសេរីវង្សព្រែកតាទែន នឹងជួបប្រកួតជាមួយកីឡាករ ឡុង សុវណ្ណឌឿន មកពីក្លិបសាលវ័ន្តកីឡា ។ កីឡាករទាំងពីររូបនេះ កាលពីប្រកួតនៅក្នុងវគ្គជម្រុះវិលជុំជាមួយកីឡាករថៃចំនួន៣លើក គឺសុទ្ធតែឈ្នះដូចគ្នា ។ ដូច្នេះសម្រាប់ការប្រកួតលើកនេះ គឺត្រូវចម្រាញ់យកអ្នកឈ្នះដើម្បីឡើងទៅឈរចាំអ្នកឈ្នះការប្រកួតនៅសប្ដាហ៍ក្រោយជាបន្តទៀត ។ បើតាមការឱ្យដឹងនៅសប្ដាហ៍បន្ទាប់គឺមានកីឡាករសរ រាជសីហ៍ មកពីក្លិបមោងឬស្សីមរតកគុនខ្មែរខេត្តបាត់ដំបង ត្រូវប្រកួតជាមួយកីឡាករ ពេជ្រ សីហា មកពីសមាគមកីឡាប្រដាល់ក្រសួងការពារជាតិ។
ឡេះ តើក ជួបឡុង សុវណ្ណឌឿន លើកនេះសង្ឃឹមឈ្នះតិចណាស់ ព្រោះល្បិចប្រយុទ្ធនៅលើសង្វៀនរបស់គេនៅអន់ ជាពិសេសស្នៀតកែងនិងជង្គង់ពេលវាយចេញម្ដងៗហាក់ដូចជាគាំងៗមិនរដាស់សោះ ល្អបានតែស្នៀតកណ្ដាប់ដៃ និងស្នៀតជើងប៉ុណ្ណោះ ។ រីឯ ឡុង សុវណ្ណឌឿន ស្នៀតកែងនិងជង្គង់របស់គេប្រើការបានយ៉ាងល្អ ឯស្នៀតជើងនិងស្នៀតកណ្ដាប់ដៃពេលវាយនិងទាត់ចេញម្ដងៗបង្កគ្រោះថ្នាក់ខ្លាំងណាស់ ។ ទោះបីជាយ៉ាងណា ឡុង សុវណ្ណឌឿន ក៏មិនអាចធ្វេសប្រហែសបានដែរ ព្រោះអី ឡេះ តើក មានកណ្ដាប់ដៃធ្ងន់បើហ៊ានតែប្រហែសច្បាស់ជាស៊យធំមិនខាន ។
ក្រៅពីគូដណ្ដើមខ្សែក្រវាត់មួយគូនេះទៅ នៅមានគូប្រកួតមិត្តភាពអន្តរជាតិរវាងកីឡាករកម្ពុជា-ថៃចំនួន២គូទៀត ។ កីឡាករ ព្រឿង សុជាតិ មកពីក្លិបកងពលធំអន្តរាគមន៍លេខ២ ត្រូវជួបប្រកួតជាមួយកីឡាករថៃឈ្មោះ Holyfield Sitsampiyakក្នុងប្រភេទទម្ងន់៥៧គីឡូក្រាម និងកីឡាករ ម៉ន វិរៈ មកពីក្លិបការិយាល័យទី៥កងទ័ពជើងគោក ប្រកួតជាមួយកីឡាករថៃឈ្មោះ Looyod Sitsapiyak ក្នុងប្រភេទទម្ងន់៥៤គីឡូក្រាម ។
ចំណែកការប្រកួតម៉ារ៉ាតុននៅក្នុងសប្ដាហ៍នេះ កីឡាករ ចាន់ សច្ចា មកពីក្លិបតាព្រហ្មមានជ័យ ប្រកួតជាមួយកីឡាករ ឈាន រស្មី មកពីក្លិបខេត្តរតនៈគីរី និងកីឡាករ កុយ ចាន់តូ មកពីក្លិបគីសែមានរិទ្ធ ប្រកួតជាមួយកីឡាករ ណាម ម៉ូរ៉ាក់ មកពីក្លិបពន្លឺសាមគ្គីខេត្តបាត់ដំបង ៕
ចែករំលែកព័តមាននេះ