ខេត្តបាត់ដំបង ៖ ជនដៃដល់ចំនួន០២នាក់ ក្នុងនោះ មានម្នាក់ជាទណ្ឌិតទើបចេញពីពន្ធនាគារបានជាង១០ថ្ងៃ ពេលនេះ ត្រូវមន្រ្តីការិយាល័យនគរបាលព្រហ្មទណ្ឌកំរិតស្រាល កសាងសំណុំរឿងបញ្ជូនទៅលាសាដំបូងខេត្ត ជាថ្មីនៅរសៀលថ្ងៃទី១៤ មីនា ដែលជាប់ពាក់ព័ន្ធនឹងករណី«លួចម៉ូតូ» ដែលជាបទល្មើសដដែលៗ ដែលជននេះធ្លាប់បានប្រព្រឹត្តកាលពីឆ្នាំទៅមិញ។
បើតាមរបាយការណ៍ជនដៃដល់ទាំង០២នាក់ ម្នាក់ឈ្មោះ នាក់ ចន្ធូ ហៅ រ័ត្ន ធូ អាយុ៥៦ឆ្នាំ (ទើបចេញពីគុកបាន១៣ថ្ងៃ) រស់នៅភូមិបោះខ្ទុម ឃុំដំបូលខ្ពស់ ស្រុកអង្គរជ័យ ខេត្តកំពត និងម្នាក់ទៀតឈ្មោះ រេះ រីម អាយុ៤៤ឆ្នាំ រស់នៅភូមិសំរោង ឃុំរមិញ ស្រុកកោះអណ្ដែត ខេត្តតាកែវ ។ នាយការិយាល័យនគរបាលព្រហ្មទណ្ឌកំរិតស្រាល លោក ឈឿង គឹមសុង បានឲ្យដឹងថា ជនទាំង០២នាក់នេះ ត្រូវបានកម្លាំងអធិការស្រុករតនមណ្ឌលឃាត់ខ្លួនបានជាមួយនឹងវត្ថុតាងក្នុងដៃ នៅវេលាម៉ោង៨ព្រឹកថ្ងៃទី១៣ មីនា នៅចំណុចភូមិរស្មីសង្ហា ឃុំរស្មីសង្ហា ស្រុករតនមណ្ឌល ក្រោយពីជនទាំង០២នាក់បានធ្វើសកម្មភាព «កាច់សោរលួចយកម៉ូតូ» បានរយៈពេល០៥ថ្ងៃ ។
លោក គឹម សុង បានបញ្ជាក់ពីប្រវត្តិជនទាំង០២នាក់នេះថា ជនម្នាក់ឈ្មោះ នាក់ ចន្ធូ គឺជាទណ្ឌិតដែលទើបត្រូវតំណាងអយ្យការអមសាលាដំបូងខេត្ត ចេញដីកាបង្គាប់ឲ្យដោះលែងបានជាង១០ថ្ងៃប៉ុណ្ណោះ តែជននេះមិនរាងចាលទេ ហើយបានបបូលបក្សពួកដែលធ្លាប់ជាប់គុកដូចគ្នានៅខេត្តដទៃ «លួចយកម៉ូតូ» គេទៀត ដែលជាបទល្មើសដដែលៗ។ ប៉ុន្តែពេលនេះ ត្រូវបានចាប់បញ្ជូនចូលគុកជាថ្មីទៀតហើយ។
បើតាមរបាយការណ៍ពីអធិការស្រុករតនមណ្ឌល ជនដៃដល់ឈ្មោះ នាក់ ចន្ធូ ហៅ រ័ត្ន ធូ និង ឈ្មោះ រេះ រីម បានធ្វើសកម្មភាព «កាច់សោលួចយកម៉ូតូ» នៅព្រឹកថ្ងៃទី ០៨ មិនា នៅចំណុចផ្សារត្រែង ស្ថិតក្នុងភូមិភ្ជាវ ឃុំត្រែង ស្រុករតនមណ្ឌល របស់ជនរងគ្រោះឈ្មោះ អាត សីហា ប្រុសអាយុ២៧ឆ្នាំ។ ក្រោយពីទទូលបណ្ដឹងជនរងគ្រោះ សមត្ថកិច្ចបានធ្វើការស្រាវជ្រាវរហូតឈានដល់ការឃាត់ខ្លួនជនដៃដល់ទាំង០២នាក់។ ជាមួយនឹងការឃាត់ខ្លួន សមត្ថកិច្ចដកហូតបានម៉ូតូមួយគ្រឿងម៉ាកហុងដាឌ្រីមស៊េរីឆ្នាំ២០២០ ពាក់ស្លាកលេខ បាត់ដំបង 1AL- 8502 ជារបស់ជនរងគ្រោះ និង ឧបករណ៍សម្រាប់កាច់សោរម៉ូតូ។
សូមបញ្ជាក់ថា អតីតទណ្ឌិតឈ្មោះ នាក់ ចន្ធូ ហៅ រ័ត្ន ធូ នេះ ត្រូវបានសមត្ថកិច្ចខេត្តបាត់ដំបង ចាប់ខ្លួនលើកដំបូង កាលពីថ្ងៃទី ៩ កុម្ភៈ ឆ្នាំ២០២១ ពីបទ«អំពើលួច» ហើយត្រូវតុលាការផ្ដន្ទាទោសជាប់គុករយៈពេលមួយឆ្នាំ។ ក្រោយបំពេញកត្តាព្វកិច្ចជាប់គុកមួយឆ្នាំ តាមអំណាចសាលក្រម តំណាងអយ្យការអមសាលាដំបូងខេត្តបាត់ដំបង បានសម្រេចចេញដីកាបង្គាប់ឲ្យដោះលែងជាបន្ទាន់ នូវឈ្មោះ នាក់ ចន្ធូ ហៅ រ័ត្ន ធូ នេះវិញនៅថ្ងៃទី០១ មីនា ឆ្នាំ២០២២ ។ ប៉ុន្តែក្រោយពីអនុរក្សពន្ធនាគារដោះលែងជននេះឲ្យមានសេរីភាព បានត្រឹមតែរយៈពេល១៣ថ្ងៃប៉ុណ្ណោះ ស្រាប់តែជនឈ្មោះ នាក់ ចន្ធូ នេះ ទៅបបូលបក្សពួកទៅប្រព្រឹត្តបទល្មើសដដែលៗ ដោយមិនរាងចាល ទើបត្រូវកម្លាំងសមត្ថកិច្ចឃាត់ខ្លួនបានជាថ្មីទៀត។
បើតាមលោក ឈឿង គឹមសុង ប្រធានការិយាល័យព្រហ្មទណ្ឌកំរិតស្រាល បានប្រាប់ថា ពេលនេះលោកស្នងការខេត្ត បានបញ្ជាឲ្យមន្រ្តីជំនាញ កសាងសំណុំរឿងបញ្ជូនជនទាំង០២នាក់ ទៅកាន់សាលាដំបូងខេត្តហើយ៕
ចែករំលែកព័តមាននេះ