ខេត្តសៀមរាប ៖ ប្រជាពលរដ្ឋឃុំលាងដៃ ស្រុកអង្គរធំ ខេត្តសៀមរាប បានប្រារព្ធពិធីសុំទឹកភ្លៀងនៅប្រាសាទនាគព័ន្ធ ក្នុងគោលបំណងបន់ស្រន់ឱ្យមានភ្លៀងធ្លាក់ឆាប់ៗ ស្របពេលរដូវកាលធ្វើស្រែចម្ការចូលដល់ តែនៅពុំទាន់មានភ្លៀងធ្លាក់នៅឡើយ ។…
ខេត្តសៀមរាប ៖ ប្រជាពលរដ្ឋឃុំលាងដៃ ស្រុកអង្គរធំ ខេត្តសៀមរាប បានប្រារព្ធពិធីសុំទឹកភ្លៀងនៅប្រាសាទនាគព័ន្ធ ក្នុងគោលបំណងបន់ស្រន់ឱ្យមានភ្លៀងធ្លាក់ឆាប់ៗ ស្របពេលរដូវកាលធ្វើស្រែចម្ការចូលដល់ តែនៅពុំទាន់មានភ្លៀងធ្លាក់នៅឡើយ ។
កិច្ចពិធីនេះ ធ្វើរយៈពេលមួយយប់ពីរថ្ងៃ គិតចាប់ពីរសៀលថ្ងៃទី១ ដល់រសៀលថ្ងៃទី៣ ខែឧសភា ឆ្នាំ២០២៤ ដោយមានពិធីប្រុងពាលី ពិធីបួងសួង ពិធីបញ្ជាន់រូប និងសូត្រមន្តផងដែរ។ លុះដល់ព្រឹកឡើងនៅថ្ងៃទី២ មានពិធីប្រគេនចង្ហាន់ព្រះសង្ឃ , រាប់បាត្រ និងធ្វើពិធីប្រទក្សិណ៣ជុំ ប្រាសាទនាគព័ន្ធ ដើម្បីចាក់ទឹកចូលក្នុងទ និងបង្ហូរចេញពីអាងធំចូលទៅអាងតូចតាមទិសទាំង៤។
ក្នុងកំឡុងពេលដើរប្រទក្សិណនោះក៏មានការចាក់ និងជះទឹកដាក់គ្នាយ៉ាងអធិកអធម ដែលជាការនិមិត្តថា មានភ្លៀងធ្លាក់មកមែន ។ ចំណែកនៅថ្ងៃទី៣ ក៏មានគ្រឿងរណ្ដាប់នៅក្នុងពិធីនេះដែរ រួមមាន បាយសី ស្លា ធម៌ ក្បាលជ្រូក ទៀន ធូប បាយ សម្ល បង្អែម ផ្លែឈើ និងភេសជ្ជៈ គ្រប់មុខ ។ អ្នកភូមិខ្លះ បានវេចខ្ចប់ម្ហូបអាហារ មកជាលក្ខណៈគ្រួសារ ដើម្បីចូលរួមក្នុងពិធី ប្រពៃណីមួយនេះ ផងដែរ ។ ក្នុងពិធីនោះ ពួកគេបង្ហាញទឹកមុខរីករាយឥតឧបមា និងរំពឹងថា ភ្លៀងនឹងឆាប់បង្អុលមកឆាប់ៗ ក្រោយពិធីសុំទឹកភ្លៀងនេះចប់សព្វគ្រប់។
សូមបញ្ជាក់ផងដែរថា ពិធីនៅឆ្នាំនេះ មានប្រជាពលរដ្ឋចូលរួមច្រើន ក្នុងនោះមានអ្នកភូមិលាងដៃ ភូមិសំរោង ភូមិភ្លុង ក្នុងឃុំលាងដៃ ស្រុកអង្គរធំ និង មានអ្នកក្រៅពីតំបន់ក្បែរនោះចូលរួមផងដែរ ។ ពិធីនេះក៏សបញ្ជាក់ថា កសិកម្មនៅតែជាវិស័យយ៉ាងសំខាន់របស់អ្នកស្រុក ទោះជាវិស័យទេសចរណ៍កំពុងរីកចម្រើនក៏ដោយ ។ អ្នកស្រុកធ្វើស្រែចម្ការនៅតែរំពឹងទៅលើទឹកភ្លៀងនៅទ្បើយ ។
ជាពិសេស នាឆ្នាំនេះ ការរាំងស្ងួតមានការអូសបន្លាយ និងកម្ដៅចេះតែបន្តច្រើនអាទិត្យទៀត អ្នក ស្រុករឹតតែចូលរួមប្រារព្ធពិធីសុំទឹកភ្លៀងនេះ យ៉ាងច្រើនកុះករ។ជាទូទៅប្រជា ពលរដ្ឋរស់នៅតំបន់អង្គរ ការប្រារព្ធពិធី បួងសួងសុំទឹកភ្លៀងនេះ រៀងរាល់ឆ្នាំពីដូនតាតរៀងមក ធ្វើទៅតាមរបៀបមានទម្រង់ផ្សេងៗទៅតាមតំបន់ ដែលពួកគេរស់នៅ ។
ក្រៅពីប្រជាពលរដ្ឋនៅឃុំលាងដៃ ក៏មានបងប្អូនប្រជាពលរដ្ឋ នៅតាមបណ្តាភូមិ ឃុំ ស្រុក ផ្សេងៗទៀត ក្នុងខេត្តសៀមរាប ក៏បានប្រារព្ធធ្វើពិធីបួង សួងសុំទឹកភ្លៀងនេះផងដែរ ៕
ចែករំលែកព័តមាននេះ