រាជធានីពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រី បានស្នើឲ្យអ្នកសារព័ត៌ មានកុំដើរតួជាតុលាការកាត់ ក្នុងការវែកញែកកាត់សេចក្តីឲ្យសោះ គឺត្រូវតែគោរពវិជ្ជាជីវៈ ជាអ្នកសារព័ត៌មាន ។
ថ្លែងក្នុងពិធីសំណេះសំណាល និងពិសាអាហារសាមគ្គី ជាមួយអ្នកសារព័ត៌មាន លើកទី៦ ឆ្នាំ២០២៤ នារសៀលថ្ងៃទី៣ ខែឧសភា ឆ្នាំ២០២៤ នៅសាលាសន្និបាតកោះពេជ្រ សម្តេចធិបតី នាយករដ្ឋមន្ត្រី បានបញ្ជាក់ថា ៖ «ក្នុងតួនាទីជាអ្នកសារព័ត៌មាន ទោះបីជាយើងមានអាជ្ញាប័ណ្ណ ជាឆន្ទៈរបស់យើង គឺផ្តល់ព័ត៌មានពិតប្រាកដឲ្យអ្នកមើល ឲ្យគ្រប់ជ្រុងជ្រោយ ប៉ុន្តែលទ្ធភាព ពេលវេលាខ្លះ យើងអត់មាន យើងបានតែមួយជ្រុង ប៉ុន្តែខ្ញុំសូមបើដើរតួជាអ្នកសារព័ត៌មាន កុំដើរតួជាអ្នកធ្វើតុលាការ។ បានន័យថា បើដឹងព័ត៌មានមួយជ្រុងហើយ ព្យាយាមទៅរកព័ត៌មានមួយជ្រុងទៀត ដើម្បីផ្តុំគ្នា ឲ្យបានគ្រប់ជ្រុងជ្រោយ ដោយកុំធ្វើការវិនិច្ឆ័យមុន។ ខិតខំព្យាយាមរកម្ខាងទៀត ដោយមិនកាន់ជើងអ្នកណានោះទេ»។
សម្តេចធិបតី ក៏បានលើកទឹកចិត្ត ឲ្យមានការផ្សាយព័ត៌មាន កុំកាន់ជើងអ្នកណានោះទេ គឺផ្សាយជាអ្នកអព្យាក្រិត្យ អ្នកប្រមូលព័ត៌មានគ្រប់ជ្រុងជ្រោយ ពោលគឺគោរពក្រមសីលធម៌ វិជ្ជាជីវៈ ឲ្យបានច្បាស់ ។
សម្តេចនាយករដ្ឋមន្ត្រី បានគូសបញ្ជាក់បន្ថែមថា ៖ «សូមកុំជាអ្នកព័ត៌មានផង ជាអ្នកកាត់ទោសផង ជាអ្នកជំរុញផង។ បើផ្សាយព័ត៌មានហើយបញ្ហានោះ ត្រូវបានដោះស្រាយ ឬបំភ្លឺយ៉ាងណា សូមជួយផ្សាយផង ព្រោះថា ផ្សាយតែរឿងមានបញ្ហាមក តែពេលដោះស្រាយរួច មិនផ្សាយ…» ៕
ចែករំលែកព័តមាននេះ