ខេត្តកណ្ដាល ៖ ដឹងការពិតហើយ អគ្គិភ័យដែលឆាបឆេះលេបត្របាក់ភោជនីយដ្ឋាន «សុវណ្ណមច្ឆា» ស្ថិតនៅភូមិត្រពាំងវែង ឃុំឆក់ឈើនាង ស្រុកអង្គស្នួល ខេត្តកណ្ដាល កាលពីវេលាម៉ោង៣និង៣០នាទីរសៀលថ្ងៃទី០៣…
ខេត្តកណ្ដាល ៖ ដឹងការពិតហើយ អគ្គិភ័យដែលឆាបឆេះលេបត្របាក់ភោជនីយដ្ឋាន «សុវណ្ណមច្ឆា» ស្ថិតនៅភូមិត្រពាំងវែង ឃុំឆក់ឈើនាង ស្រុកអង្គស្នួល ខេត្តកណ្ដាល កាលពីវេលាម៉ោង៣និង៣០នាទីរសៀលថ្ងៃទី០៣ ខែឧសភា ឆ្នាំ២០២៤នោះ ។ មូលហេតុផ្ដើមចេញពីភ្លើងឆេះស្មៅនិងព្រៃ ដែលសង្ស័យមានប្រជាពលរដ្ឋទៅបន្ទោបង់តាមព្រៃរួចបោះកន្ទុយបារីចោល បង្កឲ្យមានការឆាបឆេះព្រៃនិងស្មៅ ហើយក៏រាលដល់ភោជនីយដ្ឋានខាងលើនោះតែម្ដង ។
គ្រោះអគ្គិភ័យខាងលើនេះ បានបង្កឲ្យមានការខូចខាត និងខាតបង់ធ្ងន់ធ្ងរដល់ភោជនីយដ្ឋានខាងលើ ព្រមទាំងស្មៅនិងព្រៃរបោះលើផ្ទៃដីច្រើនហិចតាទៀត ហើយភ្លាមៗនោះកម្លាំងអាជ្ញាធរនិងសមត្ថកិច្ចបានប្រើប្រាស់រថយន្តពន្លត់អគ្គិភ័យច្រើនគ្រឿង និងកម្លាំងមនុស្សជាង១០០នាក់ក្នុងការពន្លត់ភ្លើង។ រយៈពេលជាង២ម៉ោងក្រោយមក ទើបភ្លើងរលត់ទៅវិញទាំងស្រុង ដោយពុំមានគ្រោះថ្នាក់ដល់មនុស្សឡើយ នេះបើយោងតាមព័ត៌មានដែលអង្គភាពសារព័ត៌មានកោះសន្តិភាពទទួលបានពីកម្លាំងកងរាជអាវុធហត្ថស្រុកអង្គស្នួល ។
ប្រភពដដែលបានប្រាប់ឲ្យដឹងបន្តទៀតថា ម្ចាស់ភោជនីយដ្ឋានសុវណ្ណមច្ឆានោះឈ្មោះស្រេង ស៊ាងហាក់ ភេទប្រុស អាយុ៣៧ឆ្នាំ ជនជាតិខ្មែរ មានទីលំនៅភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ ចំណែកសម្ភារក្នុងហាងដែលត្រូវបានភ្លើងឆេះបង្កការខូចខាតទាំងស្រុងរួមមាន ខ្យូស(កញ្ចុះ)សាងសង់ពីឈេីប្រក់ស័ង្កសីទំហំ៤ម៉ែត្រx៤ម៉ែត្រចំនួន០៥ខ្នង,រោងសាងសង់ពីឈេីប្រក់ស័ង្កសីទំហំ៤ម៉ែត្រx៣៥ម៉ែត្រ០១ខ្នង ។ ,ផ្ទះបាយសាងសង់ពីឈេីប្រក់ស័ង្កសី ទំហំ៤ម៉ែត្រ x ៧ម៉ែត្រ០១ខ្នង,តុឈេីចំនួន១៥ ,កៅអីជ័រចំនួន៦០កៅអី,ទូក្លាស្សេសាច់និងបន្លែ ចំនួន០៣គ្រឿង,ម៉ាសុីនកម្តៅសាច់ចំនួន០១គ្រឿង,ចង្ក្រាន ហ្គាសចំនួន០២គ្រឿង។ ក្រៅពីការឆេះភោជនីយដ្ឋាននោះភ្លើងបានឆេះបំផ្លាញស្មៅ និងព្រៃរបោះលើផ្ទៃដីប្រមាណ៥ហិចតាទៀតផងដែរ ។
ប្រភពខាងលើបានប្រាប់ឲ្យដឹងបន្តទៀតថា ការឆាបឆេះនេះមុនដំបូងផ្ដើមចេញពីភ្លើងឆេះស្មៅនិងព្រៃ ដែលសង្ស័យមានប្រជាពលរដ្ឋទៅបន្ទោបង់តាមព្រៃរួចបោះចោលកន្ទុយបារីផ្ដេសផ្ដាស ។ នៅក្នុងរដូវក្ដៅហួតហែងខ្លាំងបែបនេះសម្បូរទៅដោយស្មៅនិងព្រៃងាប់ច្រើន ទើបងាយនិងមានការឆាបឆេះបំផុត។ ភ្លើងឆេះមានទំហំធំនិងសន្ទុះខ្លាំង បានរាលចូលដល់ភោជនីយដ្ឋានយ៉ាងឆាប់រហ័ស ដែលភ្លាមៗនោះមិនអាចគ្របគ្រងពន្លត់ឈ្នះឡើយ ។
ប្រភពមួយនេះបានបញ្ជាក់បន្ថែមផងដែរថា បន្ទាប់ពីមានហេតុការណ៍នេះកើតឡើង កម្លាំងកងរាជអាវុធហត្ថស្រុកអង្គស្នួល ដឹកនាំដោយលោក អនុសេនីយ៍ឯក កែវ មាសឧត្តម មេបញ្ជាការរងកងរាជអាវុធហត្ថស្រុក ។ សហការជាមួយកម្លាំងគណៈបញ្ជាការឯកភាពស្រុក កម្លាំងកងពលតូចទ័ពពិសេសឆ័ត្រយោង៩១១ កម្លាំងប្រជាការពារ និងប្រជាពលរដ្ឋ សរុបចំនួន១៣០នាក់ ធ្វើការពន្លត់ភ្លើង ហើយក៏មានរថយន្តពន្លត់អគ្គីភ័យចំនួន០៦គ្រឿងទៅកាន់ទីនោះដោយបានប្រើប្រាស់ទឹកអស់១៧ស៊ីទែន ។
ក្នុងនោះ រថយន្តពន្លត់អគ្គីភ័យប្រចាំការនៅអធិការដ្ឋាននគរបាលស្រុកអង្គស្នួលចំនួន០២គ្រឿង ប្រើប្រាស់ទឹកអស់ចំនួន០៩សុទែន,និងរថយន្តពន្លត់អគ្គីភ័យរបស់កងពលតូចទ័ពពិសេសឆ័ត្រយោង៩១១ ចំនួន០៤គ្រឿង ប្រើប្រាស់ទឹកអស់ចំនួន០៨ស៊ីទែន ទើបរលត់ទាំងស្រុងនៅវេលាល្ងាចថ្ងៃខែឆ្នាំដដែលនោះ៕
ចែករំលែកព័តមាននេះ