រាជធានីភ្នំពេញ ៖ វី សេរីចាន់ឌីន មកពីក្លិបខ្លារខិនមានរិទ្ធ ត្រូវជួបប្រកួតជាមួយកីឡាករឡាវឈ្មោះPet P.t.t Tongtwi ឯអ៊ុំ ចំរើន មកពីក្លិបតាឡីដំរីមានរិទ្ធ ជួបប្រកួតជាមួយកីឡាករថៃឈ្មោះ
រាជធានីភ្នំពេញ ៖ វី សេរីចាន់ឌីន មកពីក្លិបខ្លារខិនមានរិទ្ធ ត្រូវជួបប្រកួតជាមួយកីឡាករឡាវឈ្មោះPet P.t.t Tongtwi ឯអ៊ុំ ចំរើន មកពីក្លិបតាឡីដំរីមានរិទ្ធ ជួបប្រកួតជាមួយកីឡាករថៃឈ្មោះButsadee Thor Seangthein Noy នៅលើសង្វៀនទូរទស្សន៍ CNC ថ្ងៃសៅរ៍ ទី២០ សីហា ស្អែកនេះ ក្នុងវគ្គសន្សំពិន្ទុឈានទៅដណ្ដើមខ្សែក្រវាត់គោជល់។
វី សេរីចាន់ឌីន ប្រកួតបាន៣លើកឈ្នះ១លើក ចាញ់២លើក បើលើកនេះចាញ់ទៀត ប្រហែលជាគ្មានសំណាងបានឡើងទៅប្រកួតនៅវគ្គបន្តទៀតនោះទេ ។ ដូច្នេះសម្រាប់ការប៉ះជាមួយកីឡាករឡាវដែលជាជើងខ្លាំងមួយរូបមិនអាចធ្វេសប្រហែសបានឡើយ ។ ទោះបីជាយ៉ាងណា សមត្ថភាពប្រកួតរបស់កីឡាករឡាវរូបនេះ អាចស៊ីសងជាមួយវី សេរីចាន់ឌីនបាន គ្រាន់តែគេមិនទាន់ហ៊ានអះអាងពីលទ្ធផលទុកមុនប៉ុណ្ណោះ ។
ចំណែកអ៊ុំ ចំរើន មានសង្ឃឹមច្រើនក្នុងការស្វែងរកកៅអីប្រកួតនៅវគ្គបន្ត ព្រោះប្រកួត៣លើកមកនេះ ឈ្នះ២លើក ចាញ់១លើក ដូច្នេះបើសិនជាឈ្នះលើកនេះទៀតនឹងអាចឡើងទៅប្រកួតនៅវគ្គបន្តដោយស្វ័យប្រវត្តិ ។ តាមការសង្កេតការប្រកួតកន្លងមក កីឡាករថៃButsadee Thor Seangthein Noy មិនមានស្នៀតអ្វីដែលពិសេសនោះឡើយ។ ចាំមើល អ៊ុំ ចំរើន អាចផ្ដួលកីឡាករថៃបានឬអត់ ។
ដោយឡែកការប្រកួតនៅលើសង្វៀនដដែលនៅថ្ងៃអាទិត្យ ទី២១ សីហា ខានស្អែកវិញ ប្រជុំទៅដោយកីឡាករខ្លាំងៗជាច្រើនរូប ។ កីឡាករ សិទ្ធ កក្កដា មកពីក្លិបសាមគ្គីកូនខ្មែរ ប្រកួតជាមួយកីឡាករទេស សុខហេង មកពីក្លិបកងពលតូចលេខ៧០ ។ កីឡាករ ចៅ ចេក មកពីក្លិបសុភានូមានជ័យ ប្រកួតជាមួយកីឡាករ អ ហេនុមាន មកពីក្លិបអេភូថងកីឡា ។ កីឡាករ សុខ ទូ មកពីក្លិបឃ្លាំងមឿងកីឡា ប្រកួតជាមួយកីឡាករថៃឈ្មោះ អេលៀន សរវិរ៉ាវាន់ ក្នុងប្រភេទទម្ងន់៥៤គីឡូក្រាម ។ កីឡាករ ព្រំ សារ៉ាម មកពីក្លិបកងពលតូចលេខ៨ភ្នំទ្រព្យ ប្រកួតជាមួយកីឡាករថៃឈ្មោះ រ៉យ ស៊ីនីតក្រាហាន ក្នុងប្រភេទទម្ងន់៩០គីឡូក្រាម។ កីឡាករ រ៉ាន់ ចាន់រី មកពីក្លិបតាព្រហ្មមានជ័យ ប្រកួតជាមួយកីឡាករ ហ៊ែល វិចិត្រ មកពីក្លិបឃ្លាំងមឿងកីឡា និងគូចុងក្រោយកីឡាករ គុន គឹនហៃ មកពីក្លិបអរុណរះកីឡា ប្រកួតជាមួយកីឡាករ កន រិទ្ធី មកពីក្លិបនាគរាជមានជ័យក្នុងលក្ខណៈប្រដាល់សាកលអាជីព ៕
ចែករំលែកព័តមាននេះ