ខេត្តកំពង់ឆ្នាំង ៖ កសិករមួយគ្រួសារ រស់នៅភូមិខ្លែងពណ៌ ឃុំព្រៃមូល ស្រុករលាប្អៀរ បានអះអាងថា ក្រៅពីមុខរបរស្រែចម្ការ គឺគាត់បានឆ្លៀតឡើងភ្នំរកដើមថ្នាំកាប់លក់ឱ្យគេ ដើម្បីដោះស្រាយជីវភាពបានប្រសើរជាជាងនៅផ្ទះ…
ខេត្តកំពង់ឆ្នាំង ៖ កសិករមួយគ្រួសារ រស់នៅភូមិខ្លែងពណ៌ ឃុំព្រៃមូល ស្រុករលាប្អៀរ បានអះអាងថា ក្រៅពីមុខរបរស្រែចម្ការ គឺគាត់បានឆ្លៀតឡើងភ្នំរកដើមថ្នាំកាប់លក់ឱ្យគេ ដើម្បីដោះស្រាយជីវភាពបានប្រសើរជាជាងនៅផ្ទះ គ្មានមុខរបរធ្វើដែរ ។
ជួបជាមួយអ្នកសារព័ត៌មានយើង កាលពីរសៀលថ្ងៃទី០៨ មីនា លោក ម៉ាន់ ថា អាយុ៣៨ឆ្នាំ និងប្រពន្ធបានរៀបរាប់ថា គាត់មានផ្ទៃដីស្រែប្រមាណ១ហិកតាដែរ ប៉ុន្តែក្រៅពីធ្វើស្រែគាត់គ្មានមុខរបរអ្វីទេ ហើយក៏ឆ្លៀតឡើងភ្នំកាប់ដើមថ្នាំលក់ឲ្យគេ ដើម្បីដោះស្រាយជីវភាពបានមួយកម្រិតដែរ ។
លោកបានបញ្ជាក់ថា ការឡើងកាប់ដើមឈើធ្វើថ្នាំរយៈពេលមួយយប់ទៅពីរយប់ ដោយដេកនៅភ្នំដោះក្រមុំក្នុងស្រុកទឹកផុស ។ ពេលកាប់បានដឹកតាមគោយន្តត្រឡប់មកផ្ទះវិញ ហើយនាំគ្នាកាប់ចិញ្ច្រាំដាក់ហាលទុកថ្លឹងគីឡូលក់ឲ្យគេ។ យ៉ាងនេះក្តី លោកបានបញ្ជាក់ថា លោកមិនចេះផ្សំថ្នាំនោះទេ គ្រាន់តែឡើងភ្នំកាប់ឈើធ្វើថ្នាំ តាមគេកម្មង់តែប៉ុណ្ណោះ ដោយក្នុងនោះ ប្រភេទថ្នាំ ថ្លៃចាប់ពី 700 រៀលដល់ 4000 រៀលក្នុងមួយគីឡូក្រាម ។
ចំពោះប្រភេទដើមឈើដែលគេកម្មង់ឱ្យកាប់យកមកធ្វើថ្នាំ មានដូចជាដើមកំរើកគុម្ព, ដើមក្តាំងងា, ដើមគោមួយ,ល្វាព្រៃ, រលាកខ្មង, ឆ្កែស្រែង, កណ្ដាប់ឈ្នៀង, ដំរី5ដក, មើមជុយ, វល្លិ៍ត្រចៀកជ្រូក និងដើមប៉េការជាដើម ។ ចំពោះដើមដែលមានតម្លៃថ្លៃជាងគេក្នុង1គីឡូក្រាម4000រៀល ដូចជាដើមដំរី 5 ដក និងវល្លិ៍ស្លឹកត្រចៀកជ្រូក។ពេលគាត់កាប់ចិញ្ច្រាំហាលរយៈពេលប្រមាណជាង10ថ្ងៃគាត់យកទៅលក់បានកម្រៃពី 30 ទៅ 40ម៉ឺនរៀលដែរ ។
គ្រួសារខាងលើបានបញ្ជាក់ដែរថា ក្នុងភូមិក្លែងពណ៌ នេះមានប្រជាពលរដ្ឋប្រមាណ20គ្រួសារដែរ ដែលបានឡើងកាប់ដើមថ្នាំយកមកចិញ្ច្រាំហាលស្ងួត ហើយបានដឹកយកទៅលក់ឲ្យឈ្មួញកណ្ដាល នៅឃុំពង្រ ស្រុករលាប្អៀរ ដែលជាទីតាំងប្រមូលទិញថ្នាំបុរាណខ្មែរ និងមានឈ្មួញពីភ្នំពេញមកទិញនៅទីនោះយកទៅលក់ភ្នំពេញបន្ត ។
ចែករំលែកព័តមាននេះ