រាជធានីភ្នំពេញ៖ រថយន្តដឹកឥដ្ឋមួយគ្រឿង បានបើកបោះពួយ ក្នុងល្បឿនលឿន ជ្រុលទៅបុករថយន្តម៉ាកព្រូសមួយគ្រឿង ពីក្រោយពេញទំហឹង រួចរុញទៅបុកផ្ទប់ ជាមួយរថយន្តដឹកដីមួយគ្រឿងទៀត។ រថយន្ត ទាំង ៣គ្រឿង បានរងការខូចខាត ហើយខូចខ្លាំងគេ រថយន្តព្រូស។ ទោះបីជាយ៉ាងណា ហេតុការណ៍នេះ ពុំបណ្តាលអោយមានអ្នករងរបួសឡើយ។
គ្រោះថ្នាក់នេះ បានកើតឡើង កាលពីវេលាម៉ោងប្រមាណ ៤ និង ២០នាទី រសៀលថ្ងៃទី៨ ខែមីនា ឆ្នាំ២០២២ នេះ នៅមុខមណ្ឌលកម្សាន្តភ្នំពេញសាហ្វារី តាមមហាវិថីឈ្នះឈ្នះ ក្នុងតំបន់អភិវឌ្ឍន៍របស់លោកឧកញ៉ា លី យ៉ុងផាត់ ក្នុងសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។
រថយន្តដឹកឥដ្ឋ ដែលបង្កគ្រោះថ្នាក់ ត្រូវបាននគរបាល អោយដឹងថា ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 3A-9473។ ចំណែករថយន្ត ដែលរងគ្រោះម៉ាកព្រូស ពណ៌ស ពាក់ស្លាកលេខ ភ្នំពេញ2BJ-8649 ជិះគ្នា ៣នាក់ (ប្តីប្រពន្ធ និងកូន) និងរថយន្តដឹកដីមួយគ្រឿងទៀត ម៉ាកហ៊ីយ៉ាន់ដាយ ពណ៌ស ពាក់ស្លាកលេខ កំពង់ចាម 3B-0162។
សាក្សីបានអោយដឹងថា នៅមុនពេលកើតហេតុ គេឃើញរថយន្តដឹកឥដ្ឋ បានធ្វើដំណើរពីក្រោយ ស្របជាមួយរថយន្តព្រូស ក្នុងទិសដៅពីកើត ទៅលិច គឺពីផ្លូវជាតិលេខ៦A ឆ្ពោះទៅស្ពានព្រែកព្នៅ តាមបណ្តោយមហាវីថីឈ្នះឈ្នះ។ នៅពេលធ្វើដំណើរមកដល់កន្លែងកើត រថយន្តព្រូសក៏បានបង្អង់ល្បឿនឈប់ ដើម្បីអោយរថយន្តដឹកដីមួយគ្រឿង ឆ្លងកាត់។ ខណៈនោះ ស្រាប់តែរថយន្តដឹកឥដ្ឋ ដែលបើកពីក្រោយ បុករថយន្តព្រូសពេញទំហឹង ហើយរុញរថយន្តព្រូសនោះ ទៅបុកផ្ទុបជាមួយរថយន្តដឹកដី ដែលកំពុងតែបត់ឆ្វេង ឆ្លងផ្លូវ។
នៅក្នុងគ្រោះថ្នាក់នោះ បណ្តាលអោយរថយន្តព្រូស រងការខូចខាតទាំងមុខ និងទាំងក្រោយយ៉ាងធ្ងន់ធ្ងរ ហើយរថយន្តដឹកដឹកឥដ្ឋ ខ្ទេចមុខ។ ចំណែករថយន្តដឹកដី បានរងការខូចខាតតិចតួចនោះទេ។
បន្ទាប់ពីគ្រោះថ្នាក់នោះ រថយន្តដឹកឥដ្ឋ ក៏បានសម្របសម្រួល ជួយចេញថ្លៃជួសជុលរថយន្តព្រូស ដើម្បីបញ្ចប់រឿង។ ដោយឡែក រថយន្តដឹកដី ខូចខាតតិចតូច ក៏បានសុំរួចខ្លួន។
ជាការកត់សម្គាល់ នៅចំណុចកើតហេតុនេះ ជាការដ្ឋានរបស់ក្រុមហ៊ុនឯកជន រៀបចំដាក់លូតាមបណ្តោយផ្លូវវិមានឈ្នះឈ្នះ ពីផ្លូវជាតិលេខ៦A ទៅកាន់ពហុកីឡដ្ឋានមរតកតេជោ។ ការដ្ឋាននោះ បានរួចរាល់ កាលពីចុងឆ្នាំ២០២១។ តែស្រាប់តែនៅក្នុងខែមករា ឬខែកុម្ភៈ ឆ្នាំ២០២២ នេះ ស្រាប់តែក្រុមហ៊ុនដដែលនោះ បានបើកការដ្ឋាន កាយគាស់ ដាក់លូ បំពង់ឡើងវិញ ក៏ត្រូវបិទចរាចរណ៍ផ្លូវម្ខាង និងបើកផ្លូវម្ខាង។
នៅចំណុចកើតហេតុនោះ គឺផ្លូវទិសដៅពីផ្លូវជាតិលេខ៦A ទៅកាន់ស្ពានព្រែកព្នៅ ចាប់ពីអតីតបញ្ឈរបង់លុយ ដល់មុខមណ្ឌលកម្សាន្ត សួនសត្វ ភ្នំពេញសាហ្វារី។ ដូច្នេះចរាចរណ៍ ត្រូវចែកផ្លូវម្ខាងទៀត ជាពីរគន្លង គឺ១គន្លងទៅ ១គន្លងមក។
នៅមុខមណ្ឌលកម្សាន្ត សួនសត្វ ភ្នំពេញសាហ្វារី នោះ គឺជាចំណុចផុតការដ្ឋានដាក់លូ ដែលអ្នកធ្វើដំណើរពីផ្លូវជាតិលេខ៦A ត្រូវបើកចូលគន្លងខាងស្តាំដៃរបស់ខ្លួនវិញ។ ប៉ុន្តែនៅចំណុចនោះ ក៏ជាផ្លូវរបស់ឡានធំៗ ដែលដឹកដីពីស្ពានព្រែកព្នៅ ត្រូវបត់ឆ្វេង ហើយបើកបញ្ច្រាសផ្លូវ ដើម្បីចូលការដ្ឋានចាក់ដី នៅដីអភិវឌ្ឍន៍។ រាល់ពេល ឡានដឹកដីទាំងនោះ ត្រូវបើកបញ្ច្រាសទិសដៅ ដោយសារតែមានទ្រូងផ្លូវ ហើយឡានដឹកដី មិនបើកវាងឡើយ គឺបើកផ្លូវកាត់។ ដោយសារតែមិនមានអ្នកសម្រួលចរាចរណ៍ផង ហើយឡានបើកលឿនៗផង ក៏បង្កជាគ្រោះថ្នាក់បុកតគ្នាដូច្នេះតែម្តង៕ ម៉េង ធា
ចែករំលែកព័តមាននេះ