ឯកឧត្តម ថង សាវុន អភិបាលខេត្ត និងជាប្រធានគណៈកម្មាធិការរៀបចំដែនដី និងនគរូបនីយកម្មខេត្ត បានចេញលិខិតណែនាំដល់អភិបាលក្រុង-ស្រុក មេឃុំ-ចៅសង្កាត់ទូទាំងខេត្ត ស្តីពីការចុះទប់ស្កាត់និងបញ្ឈប់រាល់សកម្មភាពពុះដីឡូត៍លក់អនាធិបតេយ្យ និងការសាងសង់
ខេត្តមណ្ឌលគិរី ៖ ឯកឧត្តម ថង សាវុន អភិបាលខេត្ត និងជាប្រធានគណៈកម្មាធិការរៀបចំដែនដី និងនគរូបនីយកម្មខេត្ត បានចេញលិខិតណែនាំដល់អភិបាលក្រុង-ស្រុក មេឃុំ-ចៅសង្កាត់ទូទាំងខេត្ត ស្តីពីការចុះទប់ស្កាត់និងបញ្ឈប់រាល់សកម្មភាពពុះដីឡូត៍លក់អនាធិបតេយ្យ និងការសាងសង់មិនមានច្បាប់អនុញ្ញាតត្រឹមត្រូវ ។
យោងតាមលិខិតចុះថ្ងៃទី៣ ខែមីនា ឆ្នាំ២០២២ បានលើកឡើងថា បច្ចុប្បន្នខេត្តមណ្ឌលគិរីកំពុងមានការអភិវឌ្ឍនិងរីកចម្រើនខ្លាំងលើផ្នែកសេដ្ឋកិច្ច ជាពិសេសលើវិស័យដីធ្លីនិងសំណង់ ។ ជាមួយគ្នានឹងដំណើរការនៃការអភិវឌ្ឍយ៉ាងល្អនេះ ក៏មានបញ្ហាប្រឈមយ៉ាងធ្ងន់ធ្ងរ ជុំវិញការធ្វើអាជីវកម្មលើដីធ្លីពុះឡូត៍លក់ ឬសាងសង់សំណង់ដែលមិនមានច្បាប់អនុញ្ញាតត្រឹមត្រូវដូចជា ពុះដីឡូត៍ដោយមិនបានផ្ទេរសិទ្ធិ និងមិនបានធ្វើប្លង់បំបែកក្បាលដីជូនអ្នកទិញឲ្យបានស្របច្បាប់ ។
ពុះដីឡូត៍លក់ ដោយមិនមានប្លង់កម្មសិទ្ធិខ្លួនឯងត្រឹមត្រូវ និងលក់ដីឡូត៍ដែលមិនស្របច្បាប់ទៅឲ្យអ្នកទិញ ។ ពុះដីឡូត៍លក់ ឬសាងសង់ដោយគ្មានច្បាប់អនុញ្ញាតពីអាជ្ញាធរ និងអង្គភាពពាក់ព័ន្ធត្រឹមត្រូវ ។ ពុះដីឡូត៍លក់ ឬសាងសង់ដោយអនាធិបតេយ្យ ដែលមិនគោរពច្បាប់ប្លង់គោលផែនការប្រើប្រាស់ដីនិងបទប្បញ្ញត្តិនគរូបនីយកម្មឲ្យបានត្រឹមត្រូវ ។
ខ្លឹមសារលិខិតបន្តថា ដើម្បីពង្រឹងគុណភាពនៃការប្រើប្រាស់ដី ការគ្រប់គ្រងដីធ្លី និងសំណង់ ប្រកបដោយប្រសិទ្ធភាព និងសុវត្ថិភាពខ្ពស់ សូមអាជ្ញាធរពាក់ព័ន្ធខាងលើ ត្រូវចាត់វិធានការទប់ស្កាត់ និងរាយការណ៍ឲ្យបានទាន់ពេលវេលាចាប់ពីពេលនេះតទៅ ព្រមទាំងត្រូវធ្វើការផ្សព្វផ្សាយ ជូនដំណឹង និងណែនាំឱ្យបានច្បាស់លាស់រាល់អ្នក
ដែលមានបំណងពុះដីឡូត៍លក់ ឬសាងសង់ ដើម្បីលក់ ជួល ឬសម្រាប់រស់នៅដោយខ្លួនឯងនៅក្នុងមូលដ្ឋានរបស់ខ្លួន ត្រូវសុំច្បាប់អនុញ្ញាត។
មុននឹងសាងសង់ធ្វើការពុះដីឡូត៍របស់ខ្លួនដើម្បីលក់ ឬដោះដូរ ចំពោះនីតិវិធី ឬបែបបទ នៃការស្នើសុំច្បាប់អនុញ្ញាត ម្ចាស់សំណើត្រូវទំនាក់ទំនងជាមួយការិយាល័យច្រកចេញចូលតែមួយរដ្ឋបាលខេត្ត មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ឬអង្គភាពចំណុះស្ថិតក្នុងដែនសមត្ថកិច្ចក្រសួង ខេត្ត ក្រុង ស្រុក ដោយយោងទៅតាមសណ្ឋាននៃករណីដីធ្លីទាំងនោះជាក់ស្ដែង ដើម្បីរៀបចំស្នើសុំច្បាប់អនុញ្ញាត។
ឯកឧត្តមប្រធានគណៈកម្មាធិការរៀបចំដែនដីខេត្ត បញ្ជាក់ថា ត្រូវដាក់តាំងបង្ហាញឱ្យបានច្បាស់អំពីឯកសារស្របច្បាប់ ដែលបានអនុញ្ញាតឱ្យពុះដីលក់ ឬសាងសង់លើទីតាំងដីផ្ទះជាក់ស្ដែង និងការដ្ឋានសំណង់នោះតែម្ដង ។ ត្រូវប្រគល់ជូននូវឯកសារបញ្ជាក់ចម្លងពីច្បាប់ដើម នូវលិខិតសុំច្បាប់នៃការអនុញ្ញាតឲ្យពុះឡូត៍លក់ឬសាងសង់លើដីរួមមាន អាជ្ញាប័ណ្ណ ឬលិខិតសុំច្បាប់ដែលបានការអនុញ្ញាតពីអាជ្ញាធរ ពាក់ព័ន្ធលើការសាងសង់ ត្រូវការពុះដីឡូត៍លក់ ព្រមជាមួយនឹងវិញ្ញាបនបត្រសម្គាល់ម្ចាស់អចលនវត្ថុបានកម្មសិទ្ធិ និងឯកសារពាក់ព័ន្ធសំខាន់ៗផ្សេងទៀត។
ក្នុងករណីអ្នកអភិវឌ្ឍដីនិងសំណង់ប្រព្រឹត្តបទល្មើស ឬការឲ្យដៃរបស់អាជ្ញាធរឬមន្ទីរអង្គភាពពាក់ព័ន្ធណាមួយ ក្នុងការឃុបឃិត ត្រូវមានវិធានការផាកពិន័យឬទទួលទោសតាមច្បាប់ជាធរមាន ៕
ចែករំលែកព័តមាននេះ