ខេត្តបន្ទាយមានជ័យ ៖ ហ្វូងគោដេកដើរយ៉ាងអនាធិបតេយ្យតាមដងផ្លូវនៅក្រុងប៉ោយប៉ែត ហើយក៏នៅតែជាបញ្ហារិះគន់ពីសំណាក់មហាជន ពិសេសអ្នកដំណើរតែម្តង តើករណីនេះមកពីចំណាត់ការរបស់សមត្ថកិច្ចមិនច្បាស់លាស់ ឬម្ចាស់គោទាំងនេះមានខ្សែធំឬយ៉ាងណា ?
ពេលស្ទះចរាចរលើដងផ្លូវដោយសារហ្វូងគោដើរគ្មានអ្នកគង្វាល ធ្វើឱ្យអ្នកបើកបរយានយន្តរអ៊ូររទាំថា «ពិបាកធ្វើដំណើរណាស់បងអើយ» ។ ដែលកាលើកឡើងបែបនេះ ទំនងសំដៅនិយាយឲ្យអ្នកយកព័ត៌មានឮ ឯអ្នកខ្លះថាជួយផ្សាយផងទៅ ។
គួរបញ្ជាក់ថា ហ្វូងគោដេកដើរអនាធិបតេយ្យនេះ មិនមែនទើបតែកើតឡើងនោះទេ គឺកើតមានជាយូរមកហើយ។ករណីនេះ មិនត្រឹមតែអ្នកដំណើរទេ សូម្បីអ្នកស្រុក ក៏ធុញទ្រាន់និងហ្វូងគោទាំងនេះដែរ ព្រោះតែបានស៊ីដំណាំជួនផឹកទឹកពាងពួកគាត់ ថែមទាំងជុះអាចម៍តាមមុខផ្ទះទៀតផង ។
បើទោះជាបែបនេះក្តី រឿងហ្វូងគោដេកដើរអនាធិបតេយ្យខាងលើ កន្លងមកគេឃើញសមត្ថកិច្ចបានចាត់វិធានការចាប់យកទៅរក្សាទុក ដើម្បីឲ្យម្ចាស់ចេញមុខទៅទទួលកាអប់រំ ឬផាកពិន័យខ្លះៗដែរ។ អ្នកស្រុកក៏ដូចជាអ្នកដំណើរបានទទូចសុំអាជ្ញាធរ និងសមត្ថកិច្ចមេត្តាចាត់វិធានការចំពោះម្ចាស់គោឲ្យបានតឹងរឹងផង ចៀសវាងបង្ក គ្រោះថ្នាក់ និងបំផ្លាញផលដំណាំតទៅទៀត ៕
ចែករំលែកព័តមាននេះ