ការគេងគ្រប់គ្រាន់ គឺពិតជាសំខាន់ណាស់ សម្រាប់សុខភាពមនុស្សទូទៅ។ តែមានមនុស្សភាគច្រើនកំពុងមានបញ្ហាពិបាកគេងលក់។ មុននឹងប្រើប្រាស់ថ្នាំព្យាបាល អ្នកអាចសាកល្បងតិចនិកទាំង៣ខាងក្រោម ដែលយើងនឹងលើកឡើងយកមកបកស្រាយ។

១. រៀបចំបន្ទប់គេងឱ្យល្អ

វាត្រូវបានគេជឿថាខួរក្បាលចងចាំនូវរឿងគ្រប់យ៉ាងដែលនៅជុំវិញយើង ហើយប្រសិនបើអ្វីចុងក្រោយដែលអ្នកបានឃើញនៅមុនពេលចូលគេង គឺភាពច្របូកច្របល់ នោះការគេងរបស់អ្នកនឹងក្លាយជាបែបនេះដូចគ្នា។ ដូច្នេះចូរព្យាយាមកំណត់ចំនួនរបស់របរដែលអ្នកមានក្នុងបន្ទប់គេង ហើយព្យាយាមសម្អាតឱ្យបានញឹកញាប់ ដើម្បីធ្វើឱ្យអ្នកគេងដកដង្ហើមបានកាន់តែស្រួល។

២. ទុកគ្រឿងអេឡិចត្រូនិចនៅឱ្យឆ្ងាយ

អ្នកនឹងជួបប្រទះបញ្ហាពិបាកគេងលក់បានស្កប់ជាមិនខាន ប្រសិនបើមើលទូរទស្សន៍ឫ​ឧបករណ៍ផ្សេងៗរួមមានទូរសព្ទ ឬកុំព្យូទ័រជាដើមនៅមុនពេលចូលគេង។ នេះក៏ព្រោះតែពន្លឺពណ៌ខៀវដែលជះចេញពីអេក្រង់នៃគ្រឿងអេឡិចត្រូនិចរាំងស្ទះដល់ការផលិតអរម៉ូនមេឡាតូនីន ដែលជួយធ្វើឱ្យងងុយគេង។ ដើម្បីជាការប្រសើរ អ្នកគួរកុំប្រើប្រាស់ទូរស័ព្ទ ឬគ្រឿងអេឡិចត្រូនិកផ្សេងទៀតមុនពេលចូលគេងយ៉ាងហោចណាស់ ២ម៉ោង។

៣. កុំផឹកភេសជ្ជៈមានជាតិកាហ្វេអ៊ីន

កាហ្វេត្រឹមមួយពែងអាចស្ថិតក្នុងរាងកាយយ៉ាងហោចណាស់ ៦ ម៉ោងឯណោះ។ ឧទាហរណ៍ប្រសិនបើអ្នកទទួលទានកាហ្វេនៅម៉ោង ៤ ល្ងាច នោះមានន័យថាជាតិកាហ្វេអ៊ីនអាចធ្វើអោយអ្នកមានអារម្មណ៍ស្វាងដល់ម៉ោង ១០ យប់។ ដូច្នេះដើម្បីជាការប្រសើរកុំទទួលទានកាហ្វេនៅមុនពេលចូលគេង៕