រាជធានីភ្នំពេញ ៖ ក្នុងរយៈពេលប៉ុន្មានថ្ងៃកន្លងមកនេះ អាជ្ញាធររាជធានីភ្នំពេញបាននិងកំពុងមានភាពមមាញឹកក្នុងការ ត្រៀមរៀបចំពិធីបុណ្យខួប៥៧៥ឆ្នាំនៃថ្ងៃកំណើតរាជធានី ដែលគ្រោងនឹងធ្វើនៅចុងខែធ្នូ ឬដំណាច់ឆ្នាំ២០០៩ ឈានចូល២០១០ ដើម្បីជាការរំលឹកថ្ងៃកំណើតរាជធានីផង និងអបអរសាទរបុណ្យចូលឆ្នាំសាកលឆ្នាំ២០១០ផង។
ជាក់ស្ដែងនៅតំបន់រមណីយដ្ឋានវត្ដភ្នំ ដែលជាកន្លែងប្រារឰពិធីបុណ្យខាងលើនេះត្រូវបានសាលារាជធានីភ្នំពេញបែងចែកមន្ដ្រីទៅតាមមុខព្រួញរៀងៗខ្លួនខ្លះរៀបចំ និងជួសជុលការ៉ូឡា ដើមឈើ សួនច្បារ ខ្លះតុបតែងភ្លើងអគ្គិសនី និងតុបតែងកន្លែងប្រារឰពិធី និងខ្លះទៀតធ្វើការបោសសំអាតជាដើម។ ការងារនេះបានអនុវត្ដកាលពីមួយសបា្ដហ៍មុន ដោយផ្នែកខ្លះត្រូវបានបញ្ចប់ផ្នែកខ្លះកំពុងអនុវត្ដន៍ និងផ្នែកខ្លះទៀតកំពុងត្រៀមចាំដល់ជិតថ្ងៃប្រារឰពិធីទៅតាមជំនាញរៀងៗខ្លួន ។ មន្ដ្រីសាលារាជធានីភ្នំពេញបានឱ្យដឹងថា ពេលនេះសាលារាជធានីភ្នំពេញកំពុងមានភាពមមាញឹកក្នុងការត្រៀមរៀបចំពិធីបុណ្យ ខួបកំណើតរាជធានី ដែលភ្ជាប់ជាមួយនឹង បុណ្យឆ្លងឆ្នាំសាកល ។ សាលារាជធានីបាន ចាត់ចែងកំលាំងជាផ្នែក គឺផ្នែកជួសជុលការ៉ូឡាថ្មបាយក្រៀមដែលមានសភាពបាក់ស្រុត ប្រេះស្រាំ ខ្លះស្រុតផុងទៅក្នុងដី រៀបស៊ុម តាមគល់ឈើ រៀបប័រឌាតាមចិញ្ចើមសួន ស្មៅ លាងសំអាតប្រព័ន្ធលូ មានការកាយដី និងសំរាមក្នុងប្រព័ន្ធលូជុំវិញរមណីយដ្ឋានវត្ដភ្នំ ដែលការងារនេះត្រូវបានបញ្ចប់ហើយ ។ ចំណែកឯក្រុមការងារសួនច្បារបានធ្វើការជួសជុលកែលំអសួនស្មៅ ដាំដើមឈើ និងកាប់លះមែកឈើដែលទ្រុបទ្រុលខ្លាំង ចំពោះដើមឈើងាប់ ឬគល់ពុកផុយត្រូវកាប់ចេញ ធ្វើឱ្យមានសោភ័ណភាព ដែលការងារនេះត្រូវបញ្ចប់នៅថ្ងៃទី២៥ ធ្នូ នេះ។
មន្ដ្រីរូបនេះបានបញ្ជាក់ថា ពិធីបុណ្យខាងលើនេះមានរយៈពេល៤ថ្ងៃ ដែលពិធីធំធ្វើរយៈពេលពីរថ្ងៃ គឺថ្ងៃទី៣០ និង៣១ ធ្នូ ល្ងាចថ្ងៃទី៣០ ធ្នូ ធ្វើពិធីក្រុងពាលីនៅបូជនីយដ្ឋានរូបសំណាកលោកយាយពេញ និងឡើងដុតធូបនៅលើវត្ដភ្នំ លុះដល់ថ្ងៃទី៣១ ធ្នូ ពិធីធំធ្វើនៅខាងមុខនាឡិកាវត្ដភ្នំដោយមានការប្រគំតន្ដ្រីផ្សាយបន្ដផ្ទាល់ដោយស្ថានីយវិទ្យុ និងទូរទស្សន៍រាជធានីភ្នំពេញ ។ នៅវេលាម៉ោង១២យប់ លោកកែប ជុតិមា អភិបាលរាជធានីភ្នំពេញ និងលោកជំទាវ ព្រមទាំងមន្ដ្រីក្រោមឱវាទនឹងឡើងទៅវាយជួង និងវាយស្គរនៅលើវត្ដភ្នំ ដើម្បីអបអរសាទរឆ្លងឆ្នាំចូលឆ្នាំសាកល ដោយមានការបាញ់កាំជ្រួចឱ្យមហាជនទស្សនាផងដែរ។
ចំពោះការត្រៀមលក្ខណៈសំរាប់អបអរសាទរពីធីបុណ្យខាងលើនេះ អាជ្ញាធររាជធានីភ្នំពេញបានត្រៀមលក្ខណៈ និងប្រជុំ ពិភាក្សាគ្នាជាច្រើនលើកច្រើនសាមកហើយ ដោយបានចាត់កំលាំងបែងចែកជាក្រុមទទួលខុសត្រូវយ៉ាងច្បាស់លាស់ណាស់ ជាពិសេសបញ្ហារក្សាសន្ដិសុខ និងសណ្ដាប់ធ្នាប់។
ទាក់ទិននឹងតំបន់វត្ដភ្នំនេះដែរ បើតាមការអះអាងពីលោកឧត្ដមសេនីយ៍ត្រីទូច ណារ៉ុថ ស្នងការនគរបាលរាជធានីភ្នំពេញ បានធ្វើការប្ដេជ្ញានៅក្នុងកិច្ចប្រជុំឆ្លងផែនការពង្រាយកំលាំងល្បាតពួកស្ទាត់ការពារ សុវត្ថិភាព សន្ដិសុខ សណ្ដាប់ធ្នាប់ក្នុងរាជធានីភ្នំពេញ កាលពីថ្ងៃទី២៣ ធ្នូ នេះថា លោកនឹងប្រែក្លាយតំបន់វត្ដភ្នំនេះឱ្យក្លាយទៅជាតំបន់គ្មានគ្រឿងញៀន ។ លោកបានបញ្ជាក់ថា តំបន់ស្មុគស្មាញមួយចំនួនមានដូចជាតំបន់វត្ដភ្នំ បឹងកក់ និងតំបន់ផ្សេងទៀត តែលោកត្រូវយកតំបន់វត្ដភ្នំធ្វើជាតំបន់គំរូក្នុងការលុបបំបាត់ការប្រើប្រាស់ផលិត និងចែកចាយគ្រឿងញៀន ។ លោកមានគម្រោងពង្រាយ កំលាំងពួនស្ទាត់ ឬល្បាតដោយមានកិច្ចសហការពីអាជ្ញាធរមូលដ្ឋាន ហើយការងារនេះក៏ត្រូវប្រើប្រាស់កំលាំងនគរបាលទេសចរផងដែរ។
ជាការពិតណាស់តំបន់ដែលល្បីខ្លាំងជាងគេក្នុងការប្រើប្រាស់គ្រឿងញៀងគ្រប់ប្រភេទនោះ គឺតំបន់ប្លុកប៊ូលឌិញ បឹងកក់ វត្ដភ្នំ និងតំបន់ទួលសង្កែជាដើម ដែលបញ្ហានេះទាំងអាជ្ញាធរ ឬសមត្ថកិច្ចពិតជាបានដឹងច្បាស់មុនគេតែត្រង់ថា សមត្ថកិច្ចហ៊ានធ្វើ ឬមិនហ៊ាន ឬក៏អត់ធ្វើតែម្ដង ។ បច្ចុប្បន្ននេះសកម្មភាពនៃការចែកចាយ ឬប្រើប្រាស់គ្រឿងញៀនមានច្រើនណាស់ គឺមានពេលខ្លះមិនមានការលាក់បាំងឡើយ គេឃើញមានរថយន្ដបើកចូលតំបន់នោះ ហើយមានអ្នកយកថ្នាំទៅលក់ដល់រថយន្ដតែម្ដង ។
ចែករំលែកព័តមាននេះ