រាជធានីភ្នំពេញ ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានចុះសួរសុខទុក្ខនិងចែកអំណោយដល់កុមារកំព្រា និងកុមារបាត់បង់កាយសម្បទានិងសតិបញ្ញាប្រមាណ២៥០នា
រាជធានីភ្នំពេញ ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានចុះសួរសុខទុក្ខនិងចែកអំណោយដល់កុមារកំព្រា និងកុមារបាត់បង់កាយសម្បទានិងសតិបញ្ញាប្រមាណ២៥០នាក់ មកពីអង្គការចំនួន៤ នៅបុរីទារកនិងកុមារជាតិ និងអង្គការជំនួយនៃក្តីសង្ឃឹមសម្រាប់សហគមន៍ ។
ពិធីនេះបានប្រារព្ធធ្វើឡើងកាលពីថ្ងៃទី១០ ខែសីហា ស្ថិតនៅក្នុងបរិវេណបុរីទារក និងកុមារជាតិ និងអង្គការជំនួយនៃក្តីសង្ឃឹមសម្រាប់សហគមន៍ នៅក្នុងភូមិដំណាក់ធំ៣ សង្កាត់ស្ទឹងមានជ័យ ខណ្ឌមានជ័យ ។
លោកស្រី ថោ ពៅ ប្រធានបុរីទារកនិងកុមារជាតិ បានឲ្យដឹងថា បុរីទារកនិងកុមារជាតិដែលពីមុនមានឈ្មោះថា មជ្ឈមណ្ឌលសង្គ្រោះទារក ត្រូវបានបង្កើតឡើងនៅខែឧសភា ឆ្នាំ១៩៨០ ក្នុងគោលបំណងទទួលទារក និងកុមារកំព្រាឪពុកម្តាយ ឬត្រូវឪពុកម្តាយបោះបង់ចោលឲ្យមករស់នៅក្នុងមជ្ឈមណ្ឌលមួយនេះ ដែលស្ថិតនៅក្រោមការគ្រប់គ្រងរបស់មន្ទីរសង្គមកិច្ច អតីតយុទ្ធជន និងយុវនីតិសម្បទា រាជធានីភ្នំពេញ ។ លោកស្រីបញ្ជាក់ថា នៅឆ្នាំ២០០៨ ក្រសួងបានសម្រេចប្តូរទីតាំងចាស់ដែលមានភាពតូចចង្អៀត មកទីតាំងថ្មីដល់សព្វថ្ងៃនេះ និងបានប្តូរឈ្មោះមកជាបុរីទារកនិងកុមារជាតិ ។
បើតាមលោកស្រី ថោ ពៅ ឲ្យដឹងទៀតថា ក្រោមការឧបត្ថម្ភថវិកាជារបបគោលនយោបាយពីរាជរដ្ឋាភិបាលសម្រាប់កុមារដែលមកស្នាក់នៅក្នុងទីនេះរួមមាន កុមារដែលមានសតិអន់ខ្សោយ គឺម្នាក់ៗទទួលបានថវិកា៥.០០០រៀលរៀងរាល់ថ្ងៃសម្រាប់អាហារ និងដើម្បីប្រើប្រាស់រាល់ការចាំបាច់ប្រចាំថ្ងៃ ក្នុងនោះកុមារដែលផ្ទុកមេរោគអេដស៍ និងកុមារពិការគឺទទួលបាននូវថវិកាបន្ថែមចំនួន២០.០០០រៀល ជារៀងរាល់ខែផងដែរ ។ បន្ថែមពីលើនេះទៀត ក៏មានការជួយឧបត្ថម្ភពីសប្បុរសជនទាំងក្នុងប្រទេសនិងក្រៅប្រទេស រួមមានសម្ភារប្រើប្រាស់ និងចំណីអាហារមួយចំនួយទៀត ។
លោកស្រី ថោ ពៅ បានថ្លែងនូវការអរគុណ និងដឹងគុណចំពោះវត្តមានរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលបានចំណាយពេលវេលាក្នុងការចុះមកសួរសុខទុក្ខដោយផ្ទាល់ដល់កុមារដែលកំពុងរស់នៅក្នុងបុរីទារក និងកុមារជាតិនាពេលនេះ ។ វត្តមានដ៏ឧត្តុង្គឧត្តមរបស់សម្តេចកិត្តិព្រឹទ្ធបណ្ឌិតនាពេលនេះ ពិតជាបានផ្តល់នូវភាពកក់ក្តៅ ភាពស្និទ្ធស្នាល ក្តីស្រឡាញ់ និងការលើកទឹកចិត្តដល់យើងទាំងអស់គ្នា ។ មនោសញ្ចេតនាប្រកបដោយព្រហ្មវិហារធម៌ និងទឹកចិត្តមនុស្សធម៌ដ៏ថ្លៃថ្លារបស់សម្តេច ធ្វើឲ្យយើងទាំងអស់គ្នាមានអារម្មណ៍រំភើបយ៉ាងខ្លាំងចំពោះការយកចិត្តទុកដាក់ខ្ពស់ និងការផ្តល់ក្តីអាណិតអាសូរ ពិសេសការចូលរួមដោះស្រាយទុក្ខលំបាករបស់ប្រជាពលរដ្ឋ និងកុមារងាយរងគ្រោះគ្រប់រូប ដោយមិនប្រកាន់ពណ៌សម្បុរ ឬនិន្នាការនយោបាយអ្វីឡើយ។
ក្នុងឱកាសនោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាបានមានប្រសាសន៍សម្តែងការកោតសសើរនិងអរគុណដល់បុគ្គលិកពេទ្យ និងគ្រូ ដែលបានមើលថែកុមារៗដែលភាគច្រើនត្រូវឪពុកម្តាយបោះបង់ចោលតាមមន្ទីរពេទ្យ ដោយយកចិត្តទុកដូចជាកូនបង្កើត បើទោះជាមិនជាប់សាច់ឈាមក្តី ក្នុងនោះសម្តេចក៏បានថ្លែងអំណរគុណអ្នកស្ម័គ្រចិត្តបរទេសដែលបានមកចូលរួមមើលថែទារក និងកុមារនៅបុរីទារកនិងកុមារជាតិនេះ ។
សម្តេចកិត្តិព្រឹទ្ធបណ្ឌិតបញ្ជាក់ថា មជ្ឈមណ្ឌលសម្រាប់កុមារដែលមានសភាពបែបនេះ គឺមិនមែនមានតែនៅក្នុងប្រទេសកម្ពុជាទេ ពោលគឺមានស្ទើរពាសពេញពិភពលោក ដោយគ្រាន់តែមានភាពខុសគ្នាខ្លះទៅតាមប្រទេសដែលជឿនលឿនប៉ុណ្ណោះ ។ ជាមួយគ្នានេះ សម្តេចកិត្តិព្រឹទ្ធបណ្ឌិត ក៏បានសំណូមពរដល់មាតាបិតា អាណាព្យាបាល សូមជួយបន្តថែរក្សាចិញ្ចឹមបីបាច់កូនៗ ហើយសំណូមពរដល់មាតាគ្រប់រូបពេលមានផ្ទៃពោះត្រូវទៅពិនិត្យសុខភាពនៅមន្ទីរពេទ្យឲ្យបានទៀងទាត់ ។
បន្ទាប់ពីបញ្ចប់ស័ង្កកថា សម្តេចប្រធានក៏បានចុះសំណេះសំណាលសួរសុខទុក្ខ និងពិនិត្យសកម្មភាពរស់នៅរបស់កុមារដែលកំពុងលេងល្បែងកម្សាន្ត និងកំពុងទទួលការស្តារនីតិសម្បទា នៅតាមបន្ទប់នីមួយៗរបស់ពួកគេផងដែរ ។
គួរបញ្ជាក់ថា អំណោយដែលបានផ្តល់ជូននាពេលនោះមាន ឧបត្ថម្ភកុមារចំនួន២៥០នាក់ ម្នាក់ៗទទួលបាន មុង១ ភួយ១ និងប្រាក់ ២០.០០០រៀល ក្នុងនោះមកពីបុរីទារកនិងកុមារជាតិចំនួន១២៥នាក់ មកពីអង្គការសាលាទន្សាយ៤៥នាក់ មកពីអង្គការហេបភីទ្រី ១០នាក់ និងមកពីអង្គការជំនួយនៃក្តីសង្ឃឹមសម្រាប់សហគមន៍ចំនួន៧០នាក់ ។ ឧបត្ថម្ភបុគ្គលិក គ្រូ និងពេទ្យចំនួន៩១នាក់ ម្នាក់ៗទទួលបាន មុង១ ភួយ១ សារុង១ ក្រមា១ និងប្រាក់ ១០០.០០០រៀល ក្នុងនោះមកពីបុរីទារកនិងកុមារជាតិចំនួន៥៦នាក់ មកពីអង្គការសាលាទន្សាយ១៣នាក់ មកពីអង្គការហេបភីទ្រី១០នាក់ និងមកពីអង្គការជំនួយនៃក្តីសង្ឃឹមសម្រាប់សហគមន៍ចំនួន១២នាក់ ។ ជាមួយនេះ ឧបត្ថម្ភអ្នកស្ម័គ្រចិត្តជនជាតិបរទេសនៃបុរីទារកនិងកុមារជាតិចំនួន២៥នាក់ ម្នាក់ៗប្រាក់ចំនួន ១០០.០០០រៀល។
អង្គការចំនួនពីរក្នុងនោះ បុរីទារកនិង កុមារជាតិ ទទួលបានការឧបត្ថម្ភជាថវិកា ១០.០០០.០០០រៀល អង្ករ២តោន មី៥០កេស ត្រីខ២០កេស សៀង(ប្រៃ,ផ្អែម)១០០គីឡូក្រាម ឆៃប៉ូវ(ប្រៃ,ផ្អែម)១០០គីឡូក្រាម ទឹកក្រូច៣០កេស ទឹកបរិសុទ្ធ៥០កេស នំធុង ២០ធុង ផ្លែប៉ោម១០កេស ផ្លែទំពាំងបាយជូរ១០កេស ម្សៅសាប៊ូ៦០គីឡូក្រាម សាប៊ូដុំ ៣៦០ដុំ ថ្នាំបាញ់មូស៦០ដប ទឹកជូតឥដ្ឋ២០ធុងតូច ឆ្នាំង៣២ ខ្ទះធំ២ ចានដែកធំបោកខោអាវ ២ វែកសម្ល១៥ វែកឆាធំ២ ពូក(មានស្រោម) ទំហំ២ម៉ែត្រគុណ២,៥ម៉ែត្រ ចំនួន២០ និងខ្នើយកើយចំនួន១២៥ ។
ដោយឡែក អង្គការជំនួយនៃក្តីសង្ឃឹមសម្រាប់សហគមន៍ដែលមកពីក្រុងតាខ្មៅ ខេត្តកណ្តាល ទទួលបានថវិកា ៥.០០០.០០០រៀល មី១០កេស ត្រីខ២កេស ទឹកក្រូច៥កេស ទឹកបរិសុទ្ធ១០កេស ផ្លែប៉ោម២កេស និងផ្លែទំពាំងបាយជូរ ២កេស ។
ជាមួយគ្នានេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក៏បានឧបត្ថម្ភថវិកាចំនួន៥ម៉ឺនដុល្លារអាមេរិក សម្រាប់ការសាង់សង់អគារជូនអង្គការជំនួយនៃក្ដីសង្ឃឹមសម្រាប់សហគមន៍ស្នាក់នៅនិងបណ្ដុះបណ្ដាលកុមារខ្សោយសតិបញ្ញាចំនួន៧០នាក់ ដែលមានទីតាំងបណ្ដោះាសន្ននៅអនុវិទ្យាល័យអនុវត្តក្រុងតាខ្មៅ ខេត្តកណ្ដាល ៕
ចែករំលែកព័តមាននេះ