ប្រហុកចូលរាប់តោនពីវៀតណាម សង្ស័យមានគីមី
ខេត្តតាកែវ ៖ បើតាមការរៀបរាប់ពីប្រជាពលរដ្ឋដែលជាអ្នកទទួលយកប្រហុកត្រីរ៉ស់លក់បន្តបានឲ្យដឹងថា ឈ្មួញដែលត្រូវជាកូនបង្កើតរបស់លោកមេឃុំអង្កាញ់
ខេត្តតាកែវ ៖ បើតាមការរៀបរាប់ពីប្រជាពលរដ្ឋដែលជាអ្នកទទួលយកប្រហុកត្រីរ៉ស់លក់បន្តបានឲ្យដឹងថា ឈ្មួញដែលត្រូវជាកូនបង្កើតរបស់លោកមេឃុំអង្កាញ់ ស្រុកទ្រាំង ខេត្តតាកែវ គឺជាអ្នកនាំប្រហុកត្រីរ៉ស់ពីប្រទេសវៀតណាមដែលល្បីថា មានសារធាតុគីមី សូម្បីរុយអត់ហ៊ានរោមផង យកមកបោះដុំឲ្យពួកគាត់រាប់សិបគ្រួសារដែលរស់នៅភូមិសរសៃ ឃុំអង្កាញ់ ស្រុកទ្រាំង ខេត្តតាកែវ ដើម្បីយកទៅលក់បន្តតាមភូមិស្រុកដទៃទៀត។
ពួកគាត់បន្ថែមទៀតថា ក្នុងមួយថ្ងៃៗកូនលោកមេឃុំខាងលើបាននាំប្រហុកចូលមិនក្រោមពី៣០តោននោះទេមកបោះដុំឲ្យពួកគាត់តាមច្រកទ្វាអន្តរជាតិភ្នំដិន ហើយពួកគាត់បាននាំគ្នាទិញ និងយកមកកាត់ជាកង់ៗតូចៗនិងដាក់អំបិលបន្ថែមទៀតទើបយកទៅលក់បន្ត។ ជុំវិញករណីប្រជាពលរដ្ឋទទួលទិញប្រហុកត្រីរ៉ស់ពីឈ្មួញដែលនាំចូលពីប្រទេសវៀតណាមមានផ្ទុកសារធាតុគីមីខាងលើនេះ លោក ឡាយ វណ្ណៈ អភិបាលនៃគណៈអភិបាលខេត្តតាកែវបានមានប្រសាសន៍ថា វាមិនមែនជាភារៈកិច្ចរបស់លោកនោះទេ តែវាជាបន្ទុករបស់ប្រធានសាខាកាំកុងត្រូលខេត្តជាអ្នកទទួលខុសត្រូវ។
ចំណែកលោក លាង ប៉ោ ប្រធានសាខាកាំងកុងត្រូលខេត្តតាកែវវិញ បានមានប្រសាសន៍បែបមិនទទួលខុសត្រូវថា លោកមិនបានដឹងរឿងមានឈ្មួញនាំប្រហុកត្រីរ៉ស់ដែលមានផ្ទុកសារធាតុគីមីចូលពីវៀតណាមនោះទេ។ លោកបន្តថា បើមានការនាំចូលតាមច្រកទ្វារអន្តរជាតិភ្នំដិន គឺមន្ត្រីកាំកុងត្រូលដែលឈរជើងនៅទីនោះជាអ្នកទទួលខុសត្រូវ មិនមែនលោកនោះទេ។
ករណីមានឈ្មួញយកប្រហុកត្រីរ៉ស់ដែលមានផ្ទុកសារធាតុគីមីខាងលើមកលក់នេះ ប្រជាពលរដ្ឋដែលរស់នៅក្បែរៗទីតាំងខាងលើបានស្នើសុំឲ្យអាជ្ញាធរ និងមន្ត្រីពាក់ព័ន្ធទាំងអស់មេត្តាចុះទៅពិនិត្យ និងទប់ស្កាត់ផង ព្រោះកន្លងមករឿងនាំប្រហុកត្រីរ៉ស់ពីប្រទេសវៀតណាមយកមកលក់នេះ ត្រូវបានហាមឃាត់ និងបិទមិនឲ្យនាំចូលនោះទេ តែដោយសារមានការផ្លាស់ប្តូរប្រធានសាខាកាំកុងត្រូលខេត្តតាកែវថ្មី ស្រាប់តែផ្ទុះរឿងមានការនាំប្រហុកមានផ្ទុកសារធាតុគីមីនេះទៀត៕
ចែករំលែកព័តមាននេះ