ខេត្តប៉ៃលិន ៖ រហូតមកដល់ថ្ងៃទី០១ ខែមីនា ឆ្នាំ២០២២នេះ គេសង្កេតឃើញកសិករជាច្រើនដែលមិនទាន់ប្រមូលផលមើមដំឡូងមីនៅតាមចម្ការរបស់ខ្លួនចាប់ផ្តើមជួលកម្មករចូលទៅដកមើមដំឡូងមី ដឹកយកទៅកាប់ចិញ្ច្រាំហាលលក់ នាពេលចុងរដូវ រួចភ្ជួរដីប្រញាប់ដាំដើមដំឡូងមីសារជាថ្មីឡើងវិញ ។…
ខេត្តប៉ៃលិន ៖ រហូតមកដល់ថ្ងៃទី០១ ខែមីនា ឆ្នាំ២០២២នេះ គេសង្កេតឃើញកសិករជាច្រើនដែលមិនទាន់ប្រមូលផលមើមដំឡូងមីនៅតាមចម្ការរបស់ខ្លួនចាប់ផ្តើមជួលកម្មករចូលទៅដកមើមដំឡូងមី ដឹកយកទៅកាប់ចិញ្ច្រាំហាលលក់ នាពេលចុងរដូវ រួចភ្ជួរដីប្រញាប់ដាំដើមដំឡូងមីសារជាថ្មីឡើងវិញ ។
តែចំពោះអ្នកខ្លះមិនបានកាប់ចិញ្ច្រាំមើមដំឡូងមីហាលលក់ខ្លួនឯងទេ គឺប្រមូលផលលក់បន្តឱ្យឈ្មួញទិញយកទៅជួលកម្មករកាប់ចិញ្ច្រាំ ដាក់ហាលស្ងួតលក់ឱ្យថៅកែធំៗ ដឹកយកទៅលក់បន្ត នៅប្រទេសថៃ ទទួលបានប្រាក់ចំណេញតិចតួចសម្រាប់ផ្គត់ផ្គង់ជីវភាពប្រចាំថ្ងៃ ។
បើតាមការរៀបរាប់ពីបុរសម្នាក់ ឈ្មោះ ខាន់ ដេត អាយុ៤៧ឆ្នាំ មានស្រុកកំណើតរស់នៅភូមិដងទង់ ឃុំដងទង់ ស្រុកដងទង់ ខេត្តកំពត បានប្រាប់អ្នកសារព័ត៌មានយើងឱ្យដឹងថា ៖ គាត់បានចូលទៅម៉ៅទិញមើមដំឡូងមី នៅក្នុងចំការរបស់កសិករ ក្នុងក្រុងប៉ៃលិន យកមកជួលឱ្យកម្មករកាប់ចិញ្ច្រាំ រួចដាក់ហាលឱ្យស្ងួតទើបលក់បន្តឱ្យឈ្មួញដឹកយកទៅលក់នៅតាមស្តង់ធំៗ ក្នុងខេត្ត ដើម្បីលក់ទៅឱ្យថៅកែថៃ។
ប្រភពបន្តទៀតថា គាត់បានចូលមកក្នុងខេត្តប៉ៃលិន តាំងពីខែវិច្ឆិកា ឆ្នាំ២០២១ ដោយជួលដីគេ ដើម្បីដាក់ហាលចំណិតដំឡូងមីហាល លុះប្រមូលទិញមើមដំឡូងមីរហូតដល់ខែមេសា ឆ្នាំ២០២២ ទើបអស់ដំឡូងមី និងនាំប្រពន្ធកូនត្រឡប់ទៅស្រុកកំណើតវិញ ។
ក្នុងការទិញមើមដំឡូងមីពីចំការកសិករគេលក់ដំឡូងមីស្រស់ ១គីឡូក្រាមតម្លៃ ២.២ទៅ២.៤បាត (ប្រាក់ថៃ) លុះកាប់ចិញ្ច្រាំហាលស្ងួតគាត់អាចលក់ក្នុង១គីឡូក្រាមតម្លៃ ៦.៥ ទៅ៦.៦បាត (ប្រាក់ថៃ) ហើយក៏ជួលកម្មករឱ្យកាប់ចិញ្ច្រាំក្នុង១កញ្ឆេ តម្លៃ១០០០រៀល ដោយក្នុង១ថ្ងៃៗ អ្នកខ្លះអាចកាប់ចិញ្ច្រាំមើមដំឡូងមីបានប្រហែល៣០ទៅ៦០កញ្ឆេ គឺទទួលបានប្រាក់កម្រៃចាប់ពី៣០០០០រៀលទៅ៦០០០០រៀលផងដែរ ។
ប្រភពដដែលបញ្ជាក់ថា ចំណែកម្ចាស់ស្តង់ដំឡូងមីខ្លះ គាត់មិនជួលកម្មករឱ្យកាប់ចិញ្ច្រាំមើមដំឡូងមីហាលនោះទេ គឺគេប្រើម៉ាស៊ីនកិនបំបែកមើមដំឡូងមីតែម្តង រួចប្រើត្រាក់ទ័រ ដើម្បីកកាយចំណិតដំឡូងមីហាល និងប្រើសម្រាប់ប្រមូលផ្តុំគ្នាដាក់លើរថយន្តដឹកយកទៅលក់បន្ត ។
បើតាមការឱ្យដឹងពីស្ត្រី ឈ្មោះ សុខ ផា អាយុ៤៥ឆ្នាំ និងស្ត្រី ឈ្មោះ មុំ អាយុ៣០ឆ្នាំ រស់នៅក្នុង ក្រុងប៉ៃលិន បានឱ្យដឹងថា ៖ ពួកគាត់ស៊ីឈ្នួលកាប់ចិញ្ច្រាំមើមដំឡូងមីឱ្យថៅកែ ដើម្បីបានប្រាក់ផ្គត់ផ្គង់ ជីវភាព ដោយក្នុង១ថ្ងៃៗ ពីរនាក់ប្តីអាចចិញ្ច្រាំមើមដំឡូងមីបានប្រហែល៤០ ទៅ៥០កញ្ឆេ ហើយជួនកាលគាត់អាចចិញ្ច្រាំម្នាក់ឯង ដោយប្តីទៅស៊ីឈ្នួលលើកមើមដំឡូងមីដាក់លើរថយន្តក្នុង១តោន គេឱ្យ២៥០០០រៀល លុះពេលល្ងាច ទើបត្រឡប់មកផ្ទះវិញ ។
ទោះបីជាយ៉ាងណា ពួកគាត់ ពិតជាមិនសូវហ៊ានឈប់សម្រាកច្រើនពេកនោះទេ ព្រោះនេះជារដូវប្រមូលផល ដោយនៅតែបន្តិចទៀត គេលេងកាប់ចិញ្ច្រាំហាលទៀតហើយ ខណ:មេឃភ្លៀងធ្លាក់ញឹកញាប់ អាចនឹងទទួលរងការខូចខាត ទើបគេប្រញឹកឱ្យឆាប់អស់រួចឈប់សម្រាករង់ចាំឆ្នាំក្រោយទៀត ៕
ចែករំលែកព័តមាននេះ