ការសម្រកទម្ងន់អាចមានភាពលំបាក ហើយខណៈដែលការអនុវត្តរបបអាហារដែលមានសុខភាពល្អ និងធ្វើតាមទម្លាប់នៃការហាត់ប្រាណ ប្រាកដជាអាចជួយអ្នកឱ្យមានរាងស្អាត  គេក៏មានមានវិធីងាយៗមួយចំនួនក្នុងការដុតបំផ្លាញជាតិខ្លាញ់ផងដែរ។ ជាការពិត ជាមួយនឹងការផ្លាស់ប្តូររបៀបរស់នៅមួយចំនួន អ្នកអាចដុតកាឡូរីក្នុងអត្រាលឿនជាងមុន សូម្បីតែនៅក្នុងការគេងរបស់អ្នកក៏ដោយ។

១. គេងដោយមិនគ្របភួយ

គ្មាន​អ្វី​អាច​យកឈ្នះ​អារម្មណ៍​កក់ក្ដៅ​នៃ​ការ​គេង​ក្រោម​ភួយ​ក្រាស់ក្នុងខែរងារ​នោះ​ទេ ប៉ុន្តែ​ប្រសិនបើ​អ្នក​ចង់​សម្រករាង​ចង្កេះ យក​ល្អ​គួរតែ​ចូល​គេង​ដោយ​គ្មានភួយគ្រប់ពីលើរាងកាយរបស់អ្នក។ នៅពេលអ្នកគេងក្នុងសីតុណ្ហភាពត្រជាក់ ការរំលាយអាហាររបស់អ្នកកើនឡើង ហើយអ្នកដុតកាឡូរីកាន់តែច្រើនពេលសម្រាក។ ភាពត្រជាក់នៅពេលយប់ក៏បង្កើនបរិមាណខ្លាញ់ពណ៌ត្នោតដែលមានសុខភាពល្អ ដែលអនុញ្ញាតឱ្យរាងកាយរបស់អ្នកកម្ចាត់ជាតិស្ករក្នុងឈាមដែលមិនចាំបាច់ និងដុតកាឡូរីកាន់តែច្រើន។

២. គេងឱ្យបានច្រើន

ការរាប់កាឡូរី និងការចំណាយពេលច្រើនម៉ោងនៅកន្លែងហាត់ប្រាណ ពិតជាអាចជួយអ្នកឱ្យមានរូបរាងស្អាត ប៉ុន្តែវិធីដ៏មានប្រសិទ្ធភាពបំផុតមួយក្នុងការសម្រកទម្ងន់បន្ថែមនោះគឺគ្រាន់តែគេងឱ្យបានច្រើន។ ប្រសិនបើអ្នកគិតថានេះស្តាប់ទៅដូចជាល្អលើសពីការពិត វាគឺពិតជាល្អបែបនេះមែន។ ការ​សិក្សា​បាន​បង្ហាញ​ថា​ ការ​គេង​បន្ថែម​មួយ​ម៉ោង​ជា​រៀង​រាល់​យប់​ជួយ​ឱ្យ​អ្នក​ញ៉ាំ​កាឡូរី​តិច​ជាង​២៧០​កាឡូរី​ក្នុង​មួយ​ថ្ងៃ​ ដោយ​មិន​បាច់​ប្រឹង​ប្រែង​ច្រើន។

៣. កុំចូលគេងទាំងឃ្លាន

ខណៈដែលការញ៉ាំកាឡូរីតិចគួរតែបណ្តាលឱ្យស្រកទម្ងន់ ការមិនទទួលទានអាហារពេលល្ងាច អាចធ្វើឱ្យអ្នកឡើងទម្ងន់។ នៅពេលដែលអ្នកបញ្ចុះបរិមាណកាឡូរីរបស់អ្នកភ្លាមៗ រាងកាយរបស់អ្នកនឹងដំណើរការក្នុងរបៀបសន្សំសំចៃថាមពល​ ដោយកាត់បន្ថយការរំលាយអាហារ ដែលជាលទ្ធផលធ្វើឱ្យអ្នកឡើងទម្ងន់នៅពេលយប់៕