បន្ទាយមានជ័យ ៖ ឃាត់ខ្លួនជនសង្ស័យ៤នាក់ មានម្នាក់ធ្វើសកម្មភាពលួចកន្ទុយម៉ាស៊ីនត្រជាក់ ចំនួន២៣គ្រឿង និង៣នាក់ទៀតអ្នកទទួលទិញផលចោកម្ម ត្រូវបានបញ្ចូនទៅសាលាដំបូងខេត្តបន្ទាយមានជ័យនៅថ្ងៃទី២៤ ខែកុម្ភៈនេះ។
លោកវរៈសេនីយ៍ឯក សៅ សារឿន អធិការនគរបាលក្រុងប៉ោយប៉ែតបានប្រាប់ថា ៖ ជនសង្ស័យ៤នាក់ មាន១.ឈ្មោះ ម៉ិល យ៉ុង ភេទប្រុស អាយុ២៩ឆ្នាំ (ធ្វើសកម្មភាពលួច) ២.ឈ្មោះ ឈន់ តារាវុធ ភេទប្រុស អាយុ៣៥ឆ្នាំ(អ្នកទិញផលចោកម្ម) ៣.ឈ្មោះ សេង បូរី ភេទប្រុស អាយុ៣០ឆ្នាំ (អ្នកទិញផលចោកម្ម) ៤.ឈ្មោះ ម៉ៅ មករា ភេទប្រុស អាយុ៣៤ឆ្នាំ(អ្នកទិញផលចោកម្ម) រស់នៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ។
លោកបានបញ្ជាក់ថា ៖ ក្រោយទទួលពាក្យបណ្តឹងឈ្មោះ ពៅ រដ្ឋា ភេទប្រុស អាយុ៣០ឆ្នាំ រស់នៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត បានប្តឹងជនសង្ស័យធ្វើសកម្មភាពលួចកន្ទុយម៉ាស៊ីនត្រជាក់ចំនួន២៣គ្រឿង នៅវេលាម៉ោង១២យប់ ថ្ងៃទី២៣ ខែកុម្ភៈនេះ នៅចំណុចបូរីសុខស្រេងពីរស្ថិតភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងសិរីសោភ័ណ ។
លោកវរៈសេនីយ៍ឯក សៅ សារឿន បានបញ្ជាក់ថា ៖ ក្រោយទទួលបណ្តឹងកម្លាំងអធិការដ្ឋាននគរបាលក្រុងប៉ោយប៉ែតបានស្រាវជ្រាវកំណត់មុខសញ្ញាឃាត់ខ្លួនជនសង្ស័យឈ្មោះ ម៉ិល យ៉ុង ដែលធ្វើសកម្មភាពលួចកន្ទុយម៉ាស៊ីនត្រជាក់ នាំយកមកសាកសួរ តាមចម្លើយសារភាពជនសង្ស័យបានយកកន្ទុយម៉ាស៊ីនត្រជាក់ទៅលក់ហើយកម្លាំងនគរបាលជំនាញបានចុះបង្ក្រាបឃាត់ខ្លួនអ្នកទិញផលចោកម្ម ចំនួន៣នាក់មាន១.ឈ្មោះ ឈន់ តារាវុធ ២.ឈ្មោះ សេង បូរី ៣.ឈ្មោះ ម៉ៅ មករា និងយកបានមកវិញ មានម៉ាស៊ីនត្រជាក់៣ឈុតនិងកន្ទុយម៉ាស៊ីនត្រជាក់២៣គ្រឿង ប្រគល់ជូនម្ចាស់វិញ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ