ខេត្តបន្ទាយមានជ័យ ៖ កាលពីព្រឹកថ្ងៃទី១៩ កុម្ភៈ អាជ្ញាធរខេត្ត និងសប្បុរសជនទូទាំងខេត្តបាននាំយកអំណោយជាគ្រឿងឧបភោគ បរិភោគ និងថវិកាសរុបទាំងអស់ជាង១៤២លានរៀលទៅចែកជូន និងសួរសុខទុក្ខដល់កងកម្លាំងប្រដាប់អាវុធនៅសមរភូមិមុខទិសស្រុកអន្លង់វែង និងខេត្តព្រះវិហារ។ លោកអ៊ុង អឿន អភិបាលខេត្តរួមដំណើរជាមួយថ្នាក់ដឹកនាំស្នងការដ្ឋាននគរបាលខេត្ត
ខេត្តបន្ទាយមានជ័យ ៖ កាលពីព្រឹកថ្ងៃទី១៩ កុម្ភៈ អាជ្ញាធរខេត្ត និងសប្បុរសជនទូទាំងខេត្តបាននាំយកអំណោយជាគ្រឿងឧបភោគ បរិភោគ និងថវិកាសរុបទាំងអស់ជាង១៤២លានរៀលទៅចែកជូន និងសួរសុខទុក្ខដល់កងកម្លាំងប្រដាប់អាវុធនៅសមរភូមិមុខទិសស្រុកអន្លង់វែង និងខេត្តព្រះវិហារ។
លោកអ៊ុង អឿន អភិបាលខេត្តរួមដំណើរជាមួយថ្នាក់ដឹកនាំស្នងការដ្ឋាននគរបាលខេត្ត កងរាជអាវុធហត្ថខេត្ត អាជ្ញាធរស្រុក ក្រុង និងសប្បុរសជនទូទាំងខេត្តបាននាំយកអំណោយជាគ្រឿងឧបភោគ បរិភោគរួមមានមីចំនួន៧០០កេស ត្រីខ១០៣កេស ទឹកស៊ីអ៊ីវ ទឹកត្រីសរុប៤០០យួរ ទឹកសុទ្ធ៦០០យួរ ប្រេងឆា១៩២ដប អំបិល២០០គីឡូក្រាម សាប៊ូ១.០០០កញ្ចប់ ចានជ័រ ខ្ទឹម ឆៃប៉ូវ ឆៃថាវ សាច់ជ្រូក ស្ករស ក្បឿងចំនួន៤.០០០សន្លឹក សរុបទឹកប្រាក់អស់១៤២.៤១២.០០០រៀល ក្នុងនោះនំធុងចំនួន៦០ធុង ជាអំណោយរបស់លោកកែ គឹមយ៉ាន ។
ក្នុងដំណើរសាកសួរសុខទុក្ខនោះដែរ អាជ្ញាធរខេត្តបានឧបត្ថម្ភថវិកាជូនបញ្ជាការដ្ឋានកងពលធំអន្តរាគមន៍លេខ២ប្រចាំស្រុកអន្លង់វែង ថវិកាចំនួន៥លានរៀល រួមទាំងស្បៀងអាហារមួយចំនួន និង៤០លានរៀលទៀតជូនដល់សមរភូមិមុខតំបន់ប្រាសាទព្រះវិហារ ដោយនាយឧត្តមសេនីយ៍ហ៊ីង ប៊ុនហៀង អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការអង្គរក្សជាអ្នកទទួល។
បន្ទាប់ពីលោកឧត្តមសេនីយ៍ទោ អ៊ុយ សុភាព មេបញ្ជាការជួរមុខស្រុកអន្លង់វែងថ្លែងអំណរគុណ និងរៀបរាប់ពីសកម្មភាពសៀមឈ្លានពានចង់បានទឹកដីខ្មែរ និងប្រាសាទព្រះវិហាររួចមក លោកនាយឧត្តមសេនីយ៍ហ៊ីង ប៊ុនហៀង បានថ្លែងថា ការសួរសុខទុក្ខ និងនាំយកអំណោយ រួមទាំងថវិការបស់អាជ្ញាធរខេត្តបន្ទាយមានជ័យ និងសប្បុរសជននាឱកាសនោះ គឺជាការរួមចំណែកក្នុងការការពារបូរណភាពទឹកដី និងជួយជំរុញលើកទឹកចិត្តយ៉ាងខ្លាំងក្លាដល់នាយ នាយទាហានរង ពលទាហានទាំងអស់ឱ្យរឹតតែមានទឹកចិត្ត និងឆន្ទៈប្តូរផ្តាច់ក្នុងការប្រយុទ្ធជាមួយទ័ពសៀមដែលមានបំណងឈ្លានពានបូរណភាពទឹកដី និងប្រាសាទជាកេរតំណែលមរតកពីដូនតាខ្មែរយើង ហើយក៏ជាសម្បត្តិបេតិកភណ្ឌពិភពលោកផងដែរ។ លោកនាយឧត្តមសេនីយ៍បញ្ជាក់ថា ពិសេសអំណោយ និងការសួរសុខទុក្ខនេះបញ្ជាក់ថា សមរភូមិក្រោយគឺជាប្រភពមិនចេះរីងស្ងួតសម្រាប់ទ្រទ្រង់សមរភូមិមុខ ហើយនេះបង្ហាញឱ្យឃើញថា ខ្មែរជួយខ្មែរ ខ្មែរស្រឡាញ់ខ្មែរ គឺមានបេះដូងតែមួយ។
លោកអ៊ុង អឿន មានប្រសាសន៍ថា ដោយមានការផ្សារភ្ជាប់រវាងសមរភូមិមុខ និងសមរភូមិក្រោយ និងការខិតខំប្រឹងប្រែងរបស់កងទ័ពសមរភូមិមុខក្នុងបុព្វហេតុការពារបូរណភាពទឹកដី និងប្រាសាទពីការឈ្លានពានរបស់ចោរសៀម បងប្អូនជាសប្បុរសជនដោយមានការបំផុសពីអាជ្ញាធរខេត្តបានប្រមូលថវិកា និងស្បៀងអាហារ ព្រមទាំងមានការនឹករលឹកបានមកសួរសុខទុក្ខ រួមទាំងនាំយកអំណោយជាស្បៀងអាហារ និងថវិកាមកផ្តល់ជូនផងដែរ ៕
ចែករំលែកព័តមាននេះ