ខេត្តព្រះសីហនុ៖ កំណាត់ផ្លូវជាតិលេខ៣ ពីវាលរេញ ទៅស្ពានត្រពាំងរពៅ ក្នុងស្រុកព្រៃនប់ ខេត្តព្រះសីហនុ មានចម្ងាយប្រមាណជា ២១គីឡូម៉ែត្រ ដែលរងការខូចខាត បច្ចុប្បន្ននេះ ត្រូវបាន​មន្ត្រីជំនាញរបស់​ក្រសួងសាធារណៈការ និងដឹកជញ្ជូន អះអាងថា នឹងមានការស្ថាបនាថ្មី ដោយប្រើបច្ចេកទេសបុកគ្រឹះ​ជ្រៅដូចជាគ្រឹះស្ពាន តាមស្ថានភាពដីផ្នែកខាងក្រោម។

គម្រោងស្ថាបនាកំណាត់​ផ្លូវជាតិលេខ៣ ដោយប្រើបច្ចេកទេស​បុកគ្រឹះជ្រៅ ដូចគ្រឹះស្ពាននេះ គឺក្រោយអ្នក​ជំនាញការចិន ​សិក្សា​​រក​ឃើញ​ថា ស្រទាប់ដីផ្នែកខាងក្រោមកំណាត់ផ្លូវនោះ ពិសេសចន្លោះពីរង្វង់មូលវាលរេញ ទៅស្ពានកំពង់ស្មាច់ ចម្ងាយប្រមាណជា ៤គីឡូម៉ែត្រ ជាប្រភេទដីភក់ មមោកសមុទ្រ (ទន់ជ្រាយ) បើមិនធ្វើគ្រឹះ ខាងក្រោមឲ្យជ្រៅទេ ការស្ថាបនាផ្លូវនេះ មិនជាប់ឡើយ។

ក្រៅពីចំណុចនេះ នៅតាមគន្លងផ្លូវ​ពីស្ពានកំពង់ស្មាច់ ក្នុងឃុំសាមគ្គី ទៅដល់ស្ពានត្រពាំងរពៅ ក្នុងឃុំទឹកថ្លា ស្រុកព្រៃនប់ ក៏នឹងមានរៀបចំគ្រឹះពីក្រោម ទៅតាមស្ថានភាពដី ដើម្បីធានាថា ការស្ថាបនាផ្លូវថ្មីនេះ នឹងមិនងាយរងការខូចខាតទៀតឡើយ។

មន្ត្រីជំនាញដដែលថ្លែងថា ការធ្វើផ្លូវត្រង់ចំណុចនេះ នឹងចំណាយថវិកាច្រើន ដោយសារតែចាំបាច់ ត្រូវបុកគ្រឹះ ដែលតាមការសិក្សារបស់ក្រុមហ៊ុនជំនាញផ្លូវថ្នល់ពីប្រទេសចិន ឲ្យដឹងថា លើកំណាត់ផ្លូវពី​វាលរេញ ទៅត្រពាំងរពៅ ប្រវែងប្រហែល ២១គីឡូម៉ែត្រនេះ គេរកឃើញថា មានស្រទាប់ដីខាងក្រោម ទន់ជ្រាយ ប្រភេទដី​ភក់ មមោកសមុទ្រប្រវែងយ៉ាងតិច ​៥គីឡូម៉ែត្រ។

សូមបញ្ជាក់ថា កំណាត់ផ្លូវជាតិលេខ៣ ពីវាលរេញ ទៅស្ពានត្រពាំងរពៅ ក្នុងស្រុកព្រៃនប់ ខេត្តព្រះសីហនុ កន្លងមក ត្រូវបាន​ជួសជុលជាបន្តបន្ទាប់។ ប៉ុន្តែមិនជាប់ល្អ ដែលមន្ត្រីជំនាញ អះអាងថា ដោយសារតែបញ្ហា​ស្រទាប់​ដី​ខាងក្រោមទន់ជ្រាយ​។ ចំពោះការជួសជុលស្ថាបនាថ្មីឡើងវិញ មន្ត្រីសាធារណៈការ ប្រាប់ថា អាចនឹងធ្វើឡើង នៅក្នុងឆ្នាំ២០២៣ ខាងមុខ៕