ភ្នំពេញ៖ នេះចាត់ទុកថា គឺជាដំណឹងល្អផង មិនល្អផង សម្រាប់អ្នកគាំទ្រការប្រកួតបាល់ទាត់អន្តរជាតិ ដែលកម្ពុជា ធ្វើជាម្ចាស់ផ្ទះ ដោយសារតែទើបតែមានដំណឹងថា ក្រុមឥណ្ឌូនេស៊ី ដកខ្លួនពីការប្រកួតសោះ ពេលនេះ ក្រុមខ្លាំង គឺមីយ៉ាន់ម៉ា ក៏ប្រកាសដកខ្លួនថែមមួយក្រុមទៀតហើយ។ នេះក៏ចាត់ទុកថា គឺជាករណីមិនរលូនផងដែរ ប្រសិនបើក្រុមទាំងអស់ មិនអាចប្រជែងគ្នាស្មើភាព។

ការបន្តដកខ្លួននេះ ថ្វីត្បិតតែដើម្បីសុវត្ថិភាពកីឡាករ និងអ្នកគាំទ្រ ប៉ុន្តែប្រសិនបើម្ចាស់ផ្ទះ គឺក្រុមកម្ពុជា មានឱកាសចូលវគ្គ ៤ក្រុម ចុងក្រោយ ឬឈានដល់វគ្គផ្តាច់ព្រ័ត្រ ប្រជែងពាន ក៏មិនសូវពេញមុខពេញ​មាត់ផងដែរ ដោយសារតែក្នុងចំណោម ១១ក្រុម ទាំងម្ចាស់ផ្ទះ គឺដកខ្លួនអស់ ២ក្រុមទៅហើយ ខណៈដែល​ក្រុមដទៃ ក៏មិនទាន់ច្បាស់ថា តើមានសុវត្ថិភាពដល់ចប់ ឬមានកត្តាណាមួយ បង្ខំអោយដកខ្លួនពីការប្រកួត។

​សហព័ន្ធកីឡាបាល់ទាត់មីយ៉ាន់ម៉ា (MFF) បាន​ជូន​ដំណឹង​ដល់​សហព័ន្ធ​កី​ឡា​បាល់​ទាត់​អាស៊ាន (AFF) នៅ​ថ្ងៃទី១៥កុម្ភៈនេះ​​ថា ពួកគេ​សម្រេចដក​ខ្លួន​ ចេញ​ពី​ការប្រកួតពាន​រង្វាន់ AFF U23 Championship 2022 នេះហើយ ដោយ​សារ​ផល​វិបាក​នៃ​ជំងឺ​កូវីដ-១៩ ដែលធ្វើអោយក្រុមប្រទេសមីយ៉ាន់ម៉ា បារម្ភពីសុវត្ថិភាព។ ការប្រកាស​ដកខ្លួននេះ គឺបានធ្វើឡើង កាលពីរសៀលថ្ងៃទី១៥ កុម្ភៈ ឆ្នាំ២០២២ ​ខណៈដែល​មីយ៉ាន់ម៉ា ត្រូវប្រកួតជាមួយ​ម៉ាឡេស៊ី ក្នុងពូល B នាម៉ោង ៤រសៀលនេះ​។

ការប្រកាសរបស់មីយ៉ាន់ម៉ា គឺជាផ្នែកមួយ​នៃវិធានការសុខភាព និងសុវត្ថិភាព សម្រាប់ការប្រកួត ​ដែល​កំពុង​ដំណើរ​ការ U23 បើទោះជា ក្រុមមីយ៉ាន់ម៉ា បានឆ្លងកាត់ការធ្វើតេស្តជាប្រចាំមុន និង​ក្រោយ​ពេលមកដល់​កម្ពុជា។

បន្ទាប់​ពី​ការ​បញ្ជាក់​​ពីការធ្វើតេស្តវិជ្ជមាន ​ក្នុង​ចំណោមកីឡាករមួយចំនួន ការសម្រេចចិត្តមួយ ត្រូវបានធ្វើឡើង​ដោយ​មីយ៉ាន់ម៉ា ប្រកាសដកក្រុមចេញពីការប្រកួត ដើម្បី​ជួយ​កាត់​បន្ថយ​​ហានិ​ភ័យនៃការឆ្លងបន្ថែមទៀត។

កីឡាករ និង​បុគ្គលិក​ ដែលត្រូវ​បាន​គេកំណត់ថា ជាអ្នកមានទំនាក់ទំនងជិតស្និទ្ធ ក៏ត្រូវបានដាក់ឱ្យ​នៅ​ដាច់​ដោយឡែកផងដែរ។

គ្មានការរកឃើញថា កីឡាករក្រុមមីយ៉ាន់ម៉ានេះ មានកូវីត១៩ ដូចក្រុមឥណ្ឌូនេស៊ី ដែលប្រកាសដកខ្លួនមុន​នោះទេ។ តែក្រុមមីយ៉ាន់ម៉ា បានបង្ហាញពីការព្រួយបារម្ភ បន្ទាប់ពីក្រុមការងាររបស់ខ្លួន ជួបហានិភ័យ ហើយ​សម្រេចអោយកីឡាករទាំងអស់ ដកខ្លួនតែម្ដង ដោយចង់ទុកពេលអោយក្រុមមួយនេះ មានសុវត្ថិភាព និង​ដើម្បីត្រៀមខ្លួន ត្រលប់ទៅផ្ទះ​វិញតែម្ដង។

នាយឧត្តមសេនីយ៍ ខៀវ សាម៉េត ប្រធានសហព័ន្ធកីឡា​បាល់ទាត់អាស៊ាន (AFF) មានប្រសាសន៍ថា «ពិត​ជា​មាន​ការ​សោក​ស្តាយ​ជាខ្លាំង ដែលក្រុម U23 មីយ៉ាន់ម៉ា ដកខ្លួនចេញពីពានរង្វាន់ AFF U23 Championship។ ទោះជា​យ៉ាងណាក៏ដោយ សុខភាព និងសុវត្ថិភាពរបស់អ្នកគ្រប់គ្នា ដែលពាក់ព័ន្ធ គឺមានសារៈសំខាន់បំផុត ហើយយើង​យល់ច្បាស់អំពីការសម្រេចចិត្ត ដែលបានធ្វើឡើង។ យើងសូមជូនពរសមាជិក ដែលរងផលប៉ះពាល់ បានជាសះ​ស្បើយពេញលេញ និងឆាប់រហ័ស»។

តាមកម្មវិធី ដែលបានគ្រោងទុក មីយ៉ាន់ម៉ា  នៅក្នុងពូល B ត្រូវប្រកួត នៅថ្ងៃទី១៥ ខែកុម្ភៈនេះ ទល់នឹងម៉ាឡេស៊ី។ តែក្រោយការបោះបង់នេះ គឺធ្វើអោយពូលB បាត់បង់ក្រុមខ្លាំង អស់ ២ក្រុម គឺឥណ្ឌូនេស៊ី និងមីយ៉ាន់ម៉ា។

យ៉ាងណាមិញ រូបមន្តគឺនៅតែរក្សាដដែល ដែលមានន័យថា ក្នុងពូលទាំង៣ គឺស្វែងរកក្រុម១ ដែលមានពិន្ទុខ្ពស់​ជាងគេ អោយឡើងវគ្គ១ភាគ៤ ហើយក្រុមលេខ២ ក្នុងពូលនីមួយៗ គឺកំណត់យកតែក្រុមណា ដែលមានគ្រាប់​បាល់​ច្រើនជាងគេប៉ុណ្ណោះ អោយឡើងប្រកួតប្រកួតខ្វែង។

ការសម្រេចបោះបង់ការប្រកួតនេះ ក៏កំពុងក្លាយជាប្រវត្តិសាស្ត្រមួយផងដែរ ដែលការប្រកួតបាល់ទាត់អន្តរជាតិ AFF U23 គឺមានក្រុមខ្លាំងដល់ទៅ ២ សុំដកខ្លួន។  

សូមបញ្ជាក់ថា  ​ព្រឹត្តិការណ៍បាល់ទាត់ AFF U23 Championship 2022 ដែលកម្ពុជា ធ្វើជាម្ចាស់ផ្ទះ ធ្វើឡើង​ ចាប់ពីថ្ងៃទី ១៤-២៦ ខែកុម្ភៈ ដោយមាន ១៩ប្រកួត​ ​នៅពហុកីឡដ្ឋានជាតិមរតកតេជោ និងនៅពហុកីឡដ្ឋាន Prince។

ការប្រកួតនេះ មាន ១១ប្រទេសចូលរួម ​តែឥណ្ឌូ​នេស៊ី កាលពីប៉ុន្មានថ្ងៃមុនចាប់ផ្តើមប្រកួត​ បានសម្រេច​ដកខ្លួន​ចេញពីការប្រកួត ដោយសារតែមានកីឡាករច្រើននាក់ បានឆ្លងកូវីដ១៩​។ ប្រទេស ១០ ដែលចុះឈ្មោះ ប្រកួត ចែកជា ៣ពូល រួមមាន៖ ពូលA មានកម្ពុជា ទីម័រ ហ្វីលីពីន និង​ប្រ៊ុយណេ។ ពូលB មានឥណ្ឌូនេស៊ី ម៉ាឡេស៊ី មីយ៉ាន់ម៉ា និងឡាវ។ ពូលC មាន ថៃ វៀតណាម និងសិង្ហបុរី។​

តែពេលនេះ មីយ៉ាន់ម៉ា បានប្រកាសដកខ្លួនថែមទៀត។ នាំឱ្យពូល B នៅសល់តែ ២ក្រុមប៉ុណ្ណោះ គឺម៉ាឡេស៊ី និងឡាវ​។

នៅ​ពូល A ដែលប្រកួតលើកទី១ នៅថ្ងៃ​ទី​១៤​កុម្ភៈ បើក​ឆាក​នេះ កម្ពុជា ឈរនៅកំពូលតារាង មាន ៣ពិន្ទុ ដោយយកឈ្នះព្រុយណេ ៦-០ ទីម័រ លេខ២ មាន ១ពិន្ទុ ដោយស្នើជាមួយហ្វីលីពីន មាន ១ពិន្ទុដូចគ្នា។ រីឯប្រុយណេ នៅបាតតារាង ០ពិន្ទុ​៕