ប្រទេសអង់គ្លេស ៖ ចំនួនអ្នកឆ្លងវីរុសប្រភេទ «អូមីក្រុង» កំពុងបន្តធ្លាក់ចុះខ្លាំងនៅបារាំង គឺចុះថយនាថ្ងៃទី១៤ ខែកុម្ភៈ ដល់៤៤% បើប្រៀបធៀបទៅនឹងចំនួនអ្នកឆ្លងកាលពីសប្ដាហ៍មុន។ បែបនោះ នាំឲ្យមានក្ដីសង្ឃឹមថា ការចាកចេញពីវិបត្តិ ហាក់មើលឃើញហើយ បើដរាបណា ពុំមានវីរុសបំប្លែងថ្មីណាដែលគ្រោះថ្នាក់លេចមកទៀតទេនោះ។ ប៉ុន្តែពេលនេះ នៅអង់គ្លេស បែរជារកឃើញអ្នកឆ្លងវីរុសបំប្លែងថ្មីប្រភេទ ដែលតាក្រុង (DELTACRON) កាលពីដំណាច់សប្ដាហ៍មុន។
«ដែលតាក្រុង» គេធ្លាប់និយាយពីវារួចហើយកាលពីដើមខែមករា។ នោះជាវីរុសប្រភេទថ្មីនៃកូវីដ-១៩ ដែលកើតចេញពីការរួមបញ្ចូលគ្នា រវាងវីរុសប្រភេទ «ដែលតា» និងប្រភេទ «អូមីក្រុង» ដែលគេហៅថា វីរុសកូនកាត់។ ពេលនោះក្រុមអ្នកស្រាវជ្រាវស៊ីប១ក្រុម បានអះអាងថា រកឃើញអ្នកឆ្លង «ដែលតាក្រុង» ២៥នាក់។ ចាប់តាំងពីពេលនោះមក គេមានការសង្ស័យខ្លាំង ចំពោះវត្តមាននៃវីរុសប្រភេទថ្មីនេះ។
កាលពីថ្ងៃទី១១ ខែកុម្ភៈ «ដែលតាក្រុង» បានលេចលើឆាកជាថ្មី។ ទីភ្នាក់ងារសន្តិសុខសុខាភិបាលអង់គ្លេសគូសបញ្ជាក់ថា បានរកឃើញអ្នកឆ្លង «ដែលតាក្រុង» លើកដំបូងម្នាក់។ ទោះបីយ៉ាងណា បណ្ដាអ្នកជំនាញការខាងសុខាភិបាលនិយាយថា គេនៅមិនទាន់ច្បាស់ពី «ដែលតាក្រុង» នោះ ដែលគេហៅថាវីរុសកូនកាត់ ដោយគេគិតថាវាអាចដែលករណីអ្នកឆ្លងម្នាក់នោះនៅអង់គ្លេស អាចឆ្លងវីរុសដល់២ប្រភេទ គឹ «ដែលតា» ផង និង «អូមីក្រុង» ផង ក្នុងពេលដំណាលគ្នា។
ពេលគិតពីគ្រោះថ្នាក់នៃ «ដែលតា» និងការឆ្លងខ្លាំងនៃ «អូមីក្រុង» ពាក្យ «ដែលតាក្រុង» គឺជាពាក្យដែលគេកាន់តែខ្លាច។ សម្រាប់ពេលនេះករណីអ្នកឆ្លង «ដែលតាក្រុង» កម្រខ្លាំង ហើយករណីអ្នកឆ្លងម្នាក់នៅអង់គ្លេស ជាករណីតែមួយគត់ដែលគេបានរាយការណ៍ជាផ្លូវការ។ ទោះបីយ៉ាងណា បណ្ដាទិន្នន័យនៅមិនគ្រប់គ្រាន់ ដើម្បីសន្និដ្ឋាន លើការឆ្លងវីរុសប្រភេទថ្មីនេះឡើយ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ