ប្រទេសកាណាដា ៖ ប៉ូលិសកាណាដាកាលពីថ្ងៃទី១៣ ខែកុម្ភៈ អាចធ្វើប្រតិបត្តិការបើកផ្លូវ លើស្ពាន AMBASSADOR ដែលរាំងខ្ទប់ដោយពួកបាតុករ ប្រឆាំងបណ្ដាវិធានការសុខាភិបាល ដែលនោះជាប្រតិបត្តិការមួយ ទទួលការសាទរពីសំណាក់អាមេរិក ដែលរង់ចាំការបើកឡើងវិញស្ពានយុទ្ធសាស្ត្រនេះសម្រាប់ការចេញចូលឆ្លងកាត់ព្រំដែន រវាងសហរដ្ឋអាមេរិកនិងកាណាដា តែពួកអ្នកតវ៉ា នៅបន្តសកម្មភាពក្នុងប្រទេស ពិសេសនៅរដ្ឋធានីអុតតាវ៉ា។
ទីប្រឹក្សាប្រធានាធិបតីអាមេរិកទទួលបន្ទុកបញ្ហាសន្តិសុខជាតិ លោកស្រី UZ SHERWOOD RANDALL បានសម្ដែងការអរគុណ ចំពោះការខិតខំប្រឹងប្រែង របស់កងកម្លាំងប៉ូលិសកាណាដា នៅតាមបណ្ដោយព្រំដែន សម្រេចបានការលុបបំបាត់ការរាំងខ្ទប់។
ក្រុងវ៉ាស៊ិនតោនចង់ធ្វើការគាបសង្កត់មួយចំនួន លើរដ្ឋាភិបាលកាណាដា ដោយស្នើកាលពីសប្ដាហ៍មុន ប្រើប្រាស់អំណាចសហព័ន្ធ បញ្ចប់ការបិទខ្ទប់ផ្លូវនិងស្ពាន ដែលនាំឲ្យមានផលវិបាកធ្ងន់ធ្ងរ ដល់សេដ្ឋកិច្ចអាមេរិកដោយសារស្ពាននោះជាស្ពានសំខាន់ ក្នុងការផ្លាស់ប្ដូរគ្នារវាងប្រទេសទាំង២។
កងកម្លាំងប៉ូលិសដ៏ច្រើនបានប្រមូលផ្ដុំនៅតាមច្រកចូលស្ពាន នាព្រឹកថ្ងៃទី១៣កុម្ភៈ ដោយចាប់ខ្លួនបាតុករទាំងឡាយ ហើយអូសយកចេញបណ្ដារថយន្តដែលដាក់រាំងផ្លូវមកកាន់ស្ពាននេះ តែអាជ្ញាធរមិនបានបញ្ជាក់ថា តើចរាចរណ៍ត្រូវបានបើកឡើងវិញឬយ៉ាងណានៅឡើយ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ