(ចិន)៖ តារាល្បីៗនៅលើបណ្តាញសង្គមក្នុងប្រទេសចិនមួយចំនួន ត្រូវបានអាជ្ញាធរផ្អាកមិនឱ្យលេងបណ្តាញសង្គម ដោយសារតែអាកប្បកិរិយាអួតអាងទ្រព្យសម្បត្តិរបស់ពួកគេ។
ក្នុងនោះមានKOLចំនួន៣រូប មានឈ្មោះ Wang Hongquanxin, Baoyu Jiajie និង Bo Gongzi ដោយគណនីបណ្តាញសង្គមរបស់ពួកគេមានអ្នកតាមដានរាប់លាននាក់ត្រូវបានបិទរកមិនឃើញតែម្តង។ តារាអនឡាញទាំង៣រូបនេះតែងតែបង្ហាញពីអចលនទ្រព្យថ្លៃៗ គ្រឿងអលង្ការលំដាប់ខ្ពស់ សុទ្ធតែបានទាក់ទាញការចាប់អារម្មណ៍ពីសហគមន៍អនឡាញ។
យោងតាមប្រភពព័ត៌មានកាលពីថ្ងៃទី២១ ខែឧសភា មាតិកាក៏ដូចជាគណនីបណ្តាញសង្គមរបស់ពួកគេទាំង៣ ត្រូវបានលុបចេញពីបណ្តាញទំនាក់ទំនងសង្គមចិន។ នេះត្រូវបានគេនិយាយថាជាសកម្មភាពមួយដើម្បីកាត់បន្ថយការបែងចែកសង្គម និងបញ្ចៀសផលប៉ះពាល់អវិជ្ជមានដល់សាធារណជនក្នុងប្រទេសនេះ។
១. លោក Wang Hongquanxin ជាតារាអ៊ីនធើណេតដ៏លេចធ្លោមួយដែលស្ថិតក្នុងបញ្ជីហាមឃាត់ ថ្មីៗនេះគាត់បានចូលរួមក្នុងព្រឹត្តិការណ៍មួយរបស់ម៉ាករថយន្ត BMW ក្នុងក្របខ័ណ្ឌនៃមហោស្រពភាពយន្ត Cannes ឆ្នាំ២០២៤ ។
នៅក្នុងបទសម្ភាសន៍ថ្មីមួយជាមួយ Phoenix News លោក Wang បានបង្ហាញពីអចលនទ្រព្យចំនួន៧ នៅក្នុងតំបន់លំនៅដ្ឋានប្រណីត Star River ក្នុងទីក្រុងប៉េកាំង ប្រទេសចិន ខណៈដែលលោកមានតម្លៃទ្រព្យសកម្មសរុបមានរហូតដល់ ១១០លានដុល្លារអាមេរិក ។
KOL រូបនេះបញ្ជាក់ថាលោកមិនដែលចេញទៅក្រៅទេ លុះត្រាតែគាត់ស្លៀកសម្លៀកបំពាក់ថ្លៃៗ និងគ្រឿងអលង្ការមានតម្លៃយ៉ាងតិច ១,៤លានដុល្លារ។ តារាអនឡាញរូបនេះ មានក្រុមការងារធ្វើការឱ្យខ្លួនចំនួន៨នាក់ ក្នុងនោះមានមនុស្ស៤នាក់ជាអង្គរក្សដែលតែងតែតាមដានយ៉ាងយកចិត្តទុកដាក់ដើម្បីការពារគាត់។
នៅលើបណ្តាញសង្គម Douyin លោកមានអ្នកតាមដានជាង៤លាននាក់ បច្ចុប្បន្ននេះ គណនីប្រព័ន្ធផ្សព្វផ្សាយសង្គមដីគោករបស់គាត់ទាំងអស់ត្រូវបានហាមឃាត់៕
២. លោក Bo Gongzi
ត្រូវបានគេស្គាល់ថាជាអតិថិជន VIP របស់កាបូបប្រេន Hermès។ តារាអ៊ីនធើណែតរូបនេះចែករំលែកជាទៀងទាត់នូវបទពិសោធន៍ទិញទំនិញ ការធ្វើដំណើរដ៏ប្រណីត និងឱកាសដើម្បីបង្ហាញខ្លួននៅក្នុងកម្មវិធីបង្ហាញម៉ូដលំដាប់ខ្ពស់នៅក្នុងប្រទេសជាច្រើនជុំវិញពិភពលោក។ វីដេអូទាំងអស់របស់លោកនៅលើ Douyin ត្រូវបានលុបចោល ហើយគណនី Weibo របស់គាត់ត្រូវបានហាមឃាត់ផងដែរ។
៣. លោកស្រី Baoyu Jiajie
តារាល្បីតាមអ៊ីនធឺណិតម្នាក់នេះជាស្ត្រីវ័យ៥០ឆ្នាំ មកពីខេត្ត Guangdong ភាគខាងត្បូងប្រទេសចិន ដែលឥឡូវនេះរស់នៅក្នុងទីក្រុងម៉ាកាវ នេះបើយោងតាម NetEase News។ មកពីគ្រួសារដែលជាម្ចាស់ខ្សែសង្វាក់ទំនិញដ៏ល្បីល្បាញនៅហុងកុង និងម៉ាកាវ។ ហាងទាំងនេះមានឯកទេសលើអាហារដែលមានតម្លៃខ្ពស់ដូចជា ប្រទាលកន្ទុយក្រពើ ព្រុយត្រីឆ្លាម និងសំបុកត្រចៀកកាំ។
នៅក្នុងការបង្ហោះនៅលើទំព័រផ្ទាល់ខ្លួនរបស់លោកស្រី Baoyu Jiajie បន្តបង្ហាញពីឱកាសដើម្បីចូលរួមអាហារពេលល្ងាចឯកជនជាមួយតារាល្បីៗ និងថ្នាក់ខ្ពស់នៅហុងកុង។ ហើយរាល់ពេលដែលចេញទៅក្រៅ តែងតែពាក់គ្រឿងអលង្ការពីត្បូងពេជ្រមានតម្លៃរាប់លានដុល្លារ។ គណនី Douyin របស់លោកស្រីមានអ្នកតាមដាន ២.៣លាននាក់ ប៉ុន្តែត្រូវបានហាមឃាត់។
យោងតាម The Cover ការដកចេញនូវមាតិកាដែលទាក់ទងនឹងតារាបណ្តាញទាំង៣ នេះបង្ហាញពីកិច្ចខិតខំប្រឹងប្រែងរបស់ប្រទេសចិនក្នុងការបង្កើត «បរិយាកាសស៊ីវិល័យ សុខភាពល្អ និងសុខដុមរមនា» កាត់បន្ថយនូវការមិនសប្បាយចិត្តក្នុងសង្គមដែលទាក់ទងនឹងបញ្ហានៃភាពខុសគ្នានៃទ្រព្យសម្បត្តិ។
ក្នុងអំឡុងពេលនៃការបោសសម្អាតដើម្បីលុបខ្លឹមសារមិនសមរម្យ រួមទាំងខ្លឹមសារអួតអាង Douyin បានលុបសារចំនួន ៤,៧០១ និងគណនីបណ្តាញសង្គមចំនួន១១ នៅចន្លោះថ្ងៃទី០១ ដល់ថ្ងៃទី៧ ខែឧសភា៕ ប្រភព៖ https://www.scmp.com/news/people-culture/china-personalities/article/3263781/wealth-flaunting-top-china-kols-have-social-media-accounts-shut-down-ongoing-official-crackdown?module=latest&pgtype=homepage
ចែករំលែកព័តមាននេះ