ប្រទេសរុស្សុី-អ៊ុយក្រែន ៖ សហរដ្ឋអាមេរិកអះអាងកាលពីថ្ងៃទី១១ ខែកុម្ភៈថា រុស្សុីអាចវាយលុកលុយចូលអ៊ុយក្រែន មុនបញ្ចប់ការប្រកួតកីឡាអូឡាំពិកក្រុងប៉េកាំង នាថ្ងៃទី២០ ខែកុម្ភៈ ហើយនឹងប្រើការវាយប្រហារតាមអាកាសយ៉ាងខ្លាំងក្លា។
យោងតាមបណ្ដាអ្នកទទួលខុសត្រូវជាន់ខ្ពស់អាមេរិកថា ក៏ទោះបីក្រុងវ៉ាស៊ិនតោនអះអាងថា មិនមានព័ត៌មានដែលបញ្ជាក់ថា លោកវ្ល៉ាឌីមៀរពូទីន បញ្ឈប់ការសម្រេចរបស់លោកក្ដី ក៏ទាហានអាមេរិក៣.០០០នាក់ ថែមទៀតត្រូវបានបញ្ជូនមកប៉ូឡូ្ញញនាបណ្ដាថ្ងៃខាងមុខ ចំណែកប្រទេសជាច្រើន មានអាមេរិក អាល្លឺម៉ង់ អង់គ្លេស បារាំង ហូឡង់ អ៊ីតាលី ន័រវែស បែលហ្សុិក លុចហ្សំបួរ អូស្ត្រាលី កាណាដា ជប៉ុន និងអ៊ីស្រាអែលជាដើម អំពាវនាវឲ្យពលរដ្ឋពួកគេចាកចេញជាបន្ទាន់ពីអ៊ុយក្រែន ក្នុងពេលត្រឹម២៤ឬ៤៨ម៉ោង។ រួចក្រសួងការបរទេសអាមេរិក ប្រកាសនាព្រឹកថ្ងៃទី១២កុម្ភៈ ឲ្យបណ្ដាបុគ្គលិកការទូតនៃស្ថានទូតអាមេរិកប្រចាំក្រុងគៀវចាកចេញ។
ក្នុងសន្និសីទសារព័ត៌មានមួយ ទីប្រឹក្សាសន្តិសុខជាតិសេតវិមាន លោកJAKE SULLIVANអះអាងថា លោកពូទីននឹងធ្វើសង្គ្រាម ក្នុងចុងសប្ដាហ៍នេះ ឬនាដើមសប្ដាហ៍ក្រោយ។ លោកថាលោកពូទីន នឹងឲ្យវាយប្រហារលើអ៊ុយក្រែន ហើយផ្នែកស៊ើបការណ៍អាមេរិក មានព័ត៌មានច្បាស់ក្នុងន័យនោះ ដែលពួកគេជូនដំណឹងដល់បណ្ដាសម្ព័ន្ធមិត្ត។
ចំណែកប្រធានាធិបតីអាមេរិកលោកចូបៃដិន បានព្រមានដល់សមភាគីរុស្សុី លោកវ្ល៉ាឌីមៀរពូទីន ពីការឡងវិញធ្ងន់ធ្ងរនិងដោយរហ័ស ដែលរុស្សុីនឹងទទួលរង ក្នុងករណីវាយប្រហារលើអ៊ុយក្រែន ខណៈមានការនិយាយទាក់ទងគ្នាតាមទូរស័ព្ទ អស់ពេលជាង១ម៉ោងកាលពីថ្ងៃទី១២ ខែកុម្ភៈ រវាងមេដឹកនាំទាំង២។ នេះជាការគូសបញ្ជាក់របស់សេតវិមាន ។ ប្រធានាធិបតីអាមេរិកគូសបញ្ជាក់ថា សហរដ្ឋអាមេរិកនិងបណ្ដាសម្ព័ន្ធមិត្ត នឹងឆ្លើយតបវិញដោយម៉ឺងម៉ាត់បំផុត និងនាំឲ្យមានការឡងទៅវិញដ៏ធ្ងន់ធ្ងរ និងដោយឆាប់រហ័សដល់រុស្សុី ប្រសិនបើរុស្សុី ហ៊ានវាយប្រហារអ៊ុយក្រែន។
អ្នកទទួលខុសត្រូវអាមេរិកម្នាក់និយាយថា ការសន្ទនាគ្នាតាមទូរស័ព្ទ រវាងប្រធានាធិបតីអាមេរិក និងសមភាគីរុស្សុីកាលពីថ្ងៃទី១២ ខែកុម្ភៈ ដើម្បីដោះស្រាយភាពតានតឹងជុំវិញសំណុំរឿងអ៊ុយក្រែន ពុំបាននាំឲ្យមានការផ្លាស់ប្ដូរសំខាន់ឡើយ។ ការនិយាយគ្នាពិតជាប្រព្រឹត្តទៅដោយវិជ្ជាជីវៈនិងប្រើពេលជាង១ម៉ោង តែពុំមានការផ្លាស់ប្ដូរដុំកំភួនឡើយ។
រីឯទីប្រឹក្សាការទូតម្នាក់របស់លោកពូទីន លោកអ៊ីអ៊ូរីអ៊ូឆាកូវថ្លែងក្នុងសនិ្នសីទសារព័ត៌មានមួយ ដោយបរិហារវោហារសាស្ត្ររបស់អាមេរិកថា ជ្រុលហួសហេតុពេកហើយ។ លោករិះគន់ថារយៈពេលប៉ុន្មានថ្ងៃនិងប៉ុន្មានម៉ោងចុងក្រោយនេះ សភាពការណ៍ត្រូវបានគេវាយតម្លៃមិនទំនង ដោយលោកអះអាងថា ពួកអាមេរិកប្រកាសរហូតដល់កាលបរិច្ឆេទនៃការវាយលុករបស់រុស្សុីហើយទន្ទឹមនឹងនេះ ខំបំប៉ោងសាច់ដុំយោធារបស់អ៊ុយក្រែន។ តែលោកធ្វើការកត់សម្គាល់ថា ការពិភាក្សាគ្នារវាងលោកបៃដិននិងលោកពូទីន មានតុល្យភាពនិងប្រកបដោយវិជ្ជាជីវៈ។
ចំណែកប្រធានាធិបតីអ៊ុយក្រែនលោកVOLODYMYR ZELENSKYវិញបានបរិហារនាថ្ងៃទី១២កុម្ភៈថា ការព្រមានរបស់អាមេរិក ដែលលើកឡើងពីការវាយប្រហារ ក្នុងពេលឆាប់ៗរបស់រុស្សុីប្រឆាំងអ៊ុយក្រែន គ្រាន់តែបង្កឲ្យមានភាពជ្រួលច្របល់ និងមិនបានជួយអ្វីឡើយដល់ពលរដ្ឋអ៊ុយក្រែន។
លោកថា ពេលនេះមិត្តដ៏ល្អរបស់យើងកំពុងបង្កឲ្យមានភាពចលាចល ក្នុងប្រទេសយើង។ រាល់ព័ត៌មានរបស់គេ ស្ដីពីលទ្ធភាពនៃការវាយប្រហារ គ្រាន់តែបណ្ដាលឲ្យមានភាពជ្រួលច្របល់ និងមិនជួយអ្វីដល់យើងឡើយ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ